ପ୍ରୟାଗରାଜ ୩୦।୧: ଏକାଭଳି ଦେଖାଯାଉଥିବା ଦୁଇଜଣଙ୍କୁ ଦେଖିଲେ ଲୋକେ ପ୍ରାୟ କହନ୍ତି ବୋଧେ ‘କୁମ୍ଭରେ ହଜିଯାଇଥିବା ଭାଇ’। ହେଲେ ବାସ୍ତବ ଜୀବନରେ ବି ଏପରି ହୁଏ କେହି କଳ୍ପନା ବି କରିନଥିବେ। ଏଥର କୁମ୍ଭରେ ଭାଇ ତ ହଜି ନାହାନ୍ତି ହେଲେ ୨୭ ବର୍ଷ ପୂର୍ବେ ହଜିଯାଇଥିବା ସ୍ୱାମୀ ମହିଳାଙ୍କୁ ମିଳିଛନ୍ତି। ହଁ, ଆଜ୍ଞା ଝାଡ଼ଖଣ୍ଡର ଏକ ପରିବାରକୁ ପ୍ରୟାଗରାଜରେ ଚାଲିଥିବା ମହାକୁମ୍ଭରେ ୨୭ ବର୍ଷ ପୂର୍ବେ ହଜି ଯାଇଥିବା ପୁଅ, ଭାଇ ଓ ସ୍ୱାମୀ ମିଳିଯାଇଛନ୍ତି, ଯାହା ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
ସ୍ୱାମୀଙ୍କ ଅନୁପସ୍ଥିତିରେ ପତ୍ନୀ ଧନୱା ଦେବୀ ଦୁଇ ପୁଅ କମଲେଶ ଓ ବିମଲେଶଙ୍କୁ ଏକାକୀ ପାଳନ ପୋଷଣ କରିଛନ୍ତି। ୧୯୯୮ ମସିହାରେ ଧନୱା ଦେବୀଙ୍କ ଜୀବନରେ ଅନ୍ଧକାର ଛାଇ ଯାଇଥିଲା, ଯେତେବେଳେ ତାଙ୍କ ସ୍ୱାମୀ ଅଚାନକ କେଉଁ ଆଡେ ନିଖୋଜ ହୋଇଯାଇଥିଲେ। ତାଙ୍କୁ ଖୋଜିବା ପାଇଁ ପରିବାର ସବୁପ୍ରକାର ଉଦ୍ୟମ କରିଥିଲା, ହେଲେ ତାଙ୍କର କୌଣସି ସୂଚନା ମିଳି ନଥିଲା। ଏମିତିରେ ୨୭ ବର୍ଷ ବିତିଯାଇଥିଲା। ମହିଳା ନିଜ ଭାଗ୍ୟକୁ ଆଦରି ପିଲାଙ୍କ ଲାଳନପାଳନରେ ମନନିବେଶ କରିଥିଲେ। ହେଲେ ୨୦୨୫ ମହାକୁମ୍ଭରେ ଯାହା ଘଟିଲା ତାହା ପରିବାର ପାଇଁ ଅକଳ୍ପନୀୟ।
ପ୍ରୟାଗରାଜ ମହାକୁମ୍ଭ ମେଳାରେ ଲକ୍ଷଲକ୍ଷ ଶ୍ରଦ୍ଧାଳୁ ଓ ସାଧୁ ସନ୍ଥ ଏକାଠି ହୋଇଛନ୍ତି। ଏଠାରେ ମହିଳା ଜଣେ ଅଘୋରୀ ସାଧୁଙ୍କୁ ଦେଖିଲେ ଯେଉଁଥିରେ ତାଙ୍କ ଚେହେରା କିଛିକିଛି ନିଖୋଜ ସ୍ୱାମୀଙ୍କ ସହ ମେଳ ଖାଉଥିଲା। ପ୍ରଥମେ ସେ ଭାବିଲେ ଏହା ମନର ଭ୍ରମ, ହେଲେ ଯେତେବେଳେ ପାଖକୁ ଯାଇ ଦେଖିଲେ ଜାଣିଗଲେ ଇଏ ଆଉ କେହି ନୁହନ୍ତି ତାଙ୍କ ସ୍ୱାମୀ ଗଙ୍ଗାସାଗର ଯାଦବ, ଯିଏ ଅଘୋରୀ ସାଧୁ ହୋଇ ସାରିଥିଲେ। ଗଙ୍ଗାସାଗର ଯାଦବ ଏବେ ରାଜକୁମାର ବାବା ଭାବେ ପରିଚୟ ଦେଉଛନ୍ତି।
ଏହି ଘଟଣା ସୋସିଆଲ ମିଡିଆରେ ଭାଇରାଲ ହେବାରୁ ୟୁଜର ମଧ୍ୟ ସେମାନଙ୍କ ପ୍ରତିକ୍ରିୟା ଦେବା ଆରମ୍ଭ କରିଦେଇଛନ୍ତି। ଏଥିରେ ଜଣେ ୟୁଜର ଲେଖିଛନ୍ତି ‘ଆଜି ପର୍ଯ୍ୟନ୍ତ ଶୁଣିଥିଲି କୁମ୍ଭରେ ଲୋକେ ହଜି ଯାଆନ୍ତି, ହେଲେ ପ୍ରଥମ ଥର କୁମ୍ଭରେ ପରିବାରର ମିଳିନ ହେଉଥିବା ଜାଣି ଖୁସି ଲାଗିଲା’। ଏଥିରେ ଆଉ ଜଣେ ଜୟ ହୋ ଅଘୋରୀ ବାବା କି ବୋଲି ଉଲ୍ଲେଖ କରିଥିବା ବେଳେ ଆଉ ଜଣେ ଲୁଚି ପଳେଇବା ଅପେକ୍ଷା ଘୋଷଣା କରିଯାଇଥିଲେ ଭଲ ହୋଇଥାନ୍ତା ବୋଲି ଉଲ୍ଲେଖ କରିଛନ୍ତି।
