ଭଦ୍ରକ ୦୫।୦୪ : ଯାତ୍ରା ଦୁନିଆରୁ ନରି ପଣ୍ଡାଙ୍କୁ ବ୍ୟାନ୍ ଏବେ ସବୁଠି ଚର୍ଚ୍ଚା । କିଏ ଠିକ୍ କହୁଛି, କିଏ ଭୁଲ୍ କହୁଛି । ତାକୁ ନେଇ ଆରମ୍ଭ ହେଲାଣି ତର୍ଜମା । ଅନେକ ସ୍ଥାନରୁ ଯାତ୍ରା ପାର୍ଟି ସଂଘ ନେଇଥିବା ନିଷ୍ପତ୍ତିକୁ ବିରୋଧୀ କଲେଣି । କହିଲେନି ଯେ, ନରିଙ୍କୁ ବ୍ୟାନ୍ ପୁରା ଏକପାଖିଆ ନିଷ୍ପତ୍ତି ।
ଯାତ୍ରା ଦୁନିଆରୁ ହାସ୍ୟ ଅଭିନେତା ନରି ପଣ୍ଡା ବ୍ୟାନ୍ ହୋଇଛନ୍ତି । ତୁଳସୀ ଯାତ୍ରା ପାର୍ଟି ମାଲିକଙ୍କୁ ଦୁର୍ବ୍ୟବହାର ଅଭିଯୋଗରେ ଏଭଳି ନିଷ୍ପତ୍ତି ନେଇଛି ମାଲିକ ସଂଘ । ଏହି ନିଷ୍ପତ୍ତି ଏକ ପାଖିଆ ବୋଲି କହିଲେଣି ନରିଙ୍କ ଗାଁଲୋକେ । ଯାତ୍ରା ପାର୍ଟି ମାଲିକମାନେ ନରିଙ୍କୁ ବ୍ୟାନ୍ କରିବା ପୂର୍ବରୁ ତାଙ୍କ ସହିତ ଆଲୋଚନା କରିଥାନ୍ତେ, ତେବେ ପୁରା ସତ ପଦାକୁ ଆସିଥାନ୍ତା । ନରିଙ୍କ ଗାଁ ଟିଲୋରୁ ଆସିଲାଣି ବିରୋଧର ସ୍ୱର । ସ୍ଥାନୀୟ ଲୋକ ପ୍ରତିନିଧି, ସରପଞ୍ଚ, ଗ୍ରାମାବାସୀ ଏବେ ନରିଙ୍କ ସପକ୍ଷରେ ବାହାରିଲେଣି । ସେମାନଙ୍କ ଅନୁସାରେ, ନରିଙ୍କୁ ମାଡ଼ ଘଟଣା ଗ୍ରହଣ କରିଲେ ନାହିଁ ସଂଘ, କିନ୍ତୁ ସଂଘ ତାଙ୍କୁ ବ୍ୟାନ କରିଛି । କଳାକାର ଥିଲେ ସିନା ଯାତ୍ରା ହେବ । ଯାତ୍ରା ହେଲେ ଯାତ୍ରା ପାର୍ଟି ଓ ମାଲିକ ରହିବେ । ତେଣୁ କଳାକାରକୁ ପ୍ରାଥମିକତା ଦିଆଯିବା ଉଚିତ୍ । ଏଠାରେ କିନ୍ତୁ କଥା ଅଲଗା । ନରି ପଣ୍ଡାଙ୍କ ଅଞ୍ଚଳ ହେଉଛି ଓଡ଼ିଶା ଅପେରାର ଆଖଡ଼ା ଶାଳ । ତେଣୁ ନରିଙ୍କ ପ୍ରତି ଅବିଚାର ଆଦୌ ଗ୍ରହଣୀୟ ନୁହେଁ । ତେଣୁ ବନ୍ତ, ଭଦ୍ରକ ଓ ଆଖପାଖ ଅଞ୍ଚଳରେ ଯାତ୍ରା ପାର୍ଟିକୁ ବିରୋଧ କରାଯିବ । ଭଦ୍ରକର କଳାକାରଙ୍କ ପ୍ରତି ଅବିଚାର ହୁଏ, ତେବେ ଆବଶ୍ୟକ ପଡିଲେ ଯାତ୍ରାକୁ ବନ୍ଦ କରାଯିବ ବୋଲି କହିଛନ୍ତି ସ୍ଥାନୀୟ ଲୋକେ ।
