ବେଜିଂ,୧୬/୦୬: ଦକ୍ଷିଣ ଚୀନ୍ ସାଗରକୁ କବଜା କରିବାକୁ ଚାହୁଁଛି ଚୀନ୍ । ସମୁଦ୍ରରେ ନିଜର ଦବଦବା ଜାହିର କରିବାକୁ ଚେଷ୍ଟା କରୁଛି । ଦକ୍ଷିଣ ଚୀନ୍ ସାଗରରେ ଅନ୍ୟଦେଶ ମାନଙ୍କ ଗତିବିଧିକୁ ସମ୍ପୂର୍ଣ୍ଣ ଶେଷ କରିବାକୁ ଉଦ୍ୟମ କରୁଛି । ଏଥିପାଇଁ ବେଜିଂ ଏକ ନୂଆ ମେରିଟାଇମ୍ ଆଇନ ଆଣିଛି । ଏହା ମୁତାବକ, ଯେ କୌଣସି ବିଦେଶୀ ବିନା ଅନୁମତିରେ ଦକ୍ଷିଣ ଚୀନ୍ ସାଗରରେ ଅନୁପ୍ରବେଶ କରିପାରିବ ନାହିଁ । ଯଦି କୌଣସି ଅନୁମତି ବିନା, ଦକ୍ଷିଣ ଚୀନ ସମୁଦ୍ରରେ ଅନ୍ୟ ଦେଶଗୁଡ଼ିକର ଗତିବିଧି ଦେଖାଯାଏ, ତେବେ ଚୀନ୍ ତଟରକ୍ଷୀ ବାହିନୀ ଗିରଫ କରିବ ।
ରିପୋର୍ଟ ମୁତାବକ, ଦକ୍ଷିଣ ଚୀନ୍ ସାଗରରେ ଅନୁପ୍ରବେଶ କଲେ ଚୀନ୍ ଏହାକୁ ଗୁରୁତ୍ୱର ସହ ନେବ ଏବଂ ଅଭିଯୁକ୍ତକୁ ବିନା ଶୁଣାଣିରେ ୬୦ ଦିନ ପର୍ଯ୍ୟନ୍ତ ଜେଲରେ ରଖିବ । ଏହାପରେ ଶୁଣାଣି ହେବ ଏବଂ ରାୟ ଅନୁସାରେ ଦଣ୍ଡ ବିଧାନ କରାଯିବ । ଚୀନ୍ ସମଗ୍ର ଦକ୍ଷିଣ ଚୀନ୍ ସାଗରକୁ ନିଜର ଅଂଶ ଦର୍ଶାଉଛି । ଯେବେ କି ଦକ୍ଷିଣ ଏସିଆର ଅନେକ ଦେଶ ଯଥା ଫିଲିପାଇନ୍ସ, ଭିଏତନାମ, ଇଣ୍ଡୋନେସିଆ ମଧ୍ୟ ଏହା ଉପରେ ନିଜ ହକ୍ ଜାହିର କରୁଛନ୍ତି । ଦକ୍ଷିଣ ଚୀନ୍ ସାଗରରେ ବିବାଦ ବଢ଼ିବାକୁ ନେଇ ଏଠାରେ ଚୀନ୍ ନିଜର ଅନେକ ବୋଟ୍ ଏବଂ ତଟରକ୍ଷୀ କର୍ମଚାରୀଙ୍କୁ ମୁତୟନ କରି ରଖିଛି । ଏଠାରେ ଦିନକୁ ଦିନ ବିବାଦ ବଢ଼ିବାରେ ଲାଗିଛି ।