ନୀଳଗିରି ୧୫।୮: ଦେଶ ଆଜି ସ୍ୱାଧୀନ ହୋଇଛି ସତ, ହେଲେ ଯେଉଁ ମହାପୁରୁଷ ମାନେ ଦେଶବାସୀଙ୍କୁ ଏକତ୍ରିତ କରି ଆଜି ସ୍ୱାଧୀନତା ଆଣିଦେଇଛନ୍ତି ତାଙ୍କୁ ମନେ ପକାଇବାର ବେଳ ଆସିଛି । ମୋର ମନେ ଅଛି ବ୍ରିଟିଶ ମାନଙ୍କର ବର୍ବରତା କଥା । ସେକଥା ମନେ ପଡିଗଲେ ଆଜି ବି ମୋତେ ଭୟ ଲାଗି ଛାତି ଥରି ଉଠେ । ଏଭଳି କିଛି ସ୍ମୃତି ବଖାଣିଛନ୍ତି ନୀଳଗିରି ଅଞ୍ଚଳର ୯୮ ବର୍ଷୀୟ ସ୍ୱାଧୀନତା ସଂଗ୍ରାମୀ କେଶବ ପାଣିଗ୍ରାହୀ ।
ବାଲେଶ୍ୱର ଜିଲ୍ଲା ନୀଳଗିରି ଉପଖଣ୍ଡ ଔପଦା ବ୍ଲକ ଦକ୍ଷିଣ ନରସିଂହପୁର ଗ୍ରାମର ବାସିନ୍ଦା ତଥା ସ୍ୱାଧୀନତା ସଂଗ୍ରାମୀ କେଶବ ପାଣିଗ୍ରାହୀ । ସହଧର୍ମିଣୀ ସବୁ କ୍ଷେତ୍ରରେ ତାଙ୍କୁ ପ୍ରେରଣା ଦିଅନ୍ତି । ହେଲେ ୩ ବର୍ଷ ପୂର୍ବେ ସେ ଆରପାରିକୁ ଚାଲିଯାଇଛନ୍ତି । ୪ ପୁତ୍ର, ପୁତ୍ରବଧୂ, ୮ ନାତିନାତୁଣୀ ଅଛନ୍ତି । କେଶବଙ୍କ ଛାତ୍ର ଜୀବନରେ ସଂଗ୍ରାମୀ ମନୋଭାବ ଦେଖା ଦେଇଥିଲା । ବାମପନ୍ଥୀ ନେତା ବନମାଳୀ ଦାସଙ୍କ ସହିତ ପ୍ରାଣବନ୍ଧୁ ଅଗସ୍ତି, ବଳରାମ ରାଜ, କରୁଣାକର ପାଣିଗ୍ରାହୀ, ଶୈଳେନ୍ ମହାରଣା, ବୈଷ୍ଣବ ପଟ୍ଟନାୟକ ଇଂରେଜ ଓ ରାଜାଙ୍କ ବିରୋଧରେ ମେଳି ବାନ୍ଧିଥିଲେ । ସେମାନଙ୍କ ନେତୃତ୍ୱରୁ ପ୍ରେରଣା ପାଇ କେଶବ ଦେଶ ମାତୃକା ପାଇଁ ସ୍ୱାଧୀନତା ସଂଗ୍ରାମରେ ସାମିଲ ହୋଇଥିଲେ । ସେହି ସମୟରେ ତାଙ୍କର ବୟସ ମାତ୍ର ୧୭ ବର୍ଷ । ମହାତ୍ମା ଗାନ୍ଧୀ ଯେତେବେଳେ ଷ୍ଟେସନରେ ପହଞ୍ଚି ଯାଉଥିଲେ ସେ ତାଙ୍କୁ ଦେଖା କରିବା ପାଇଁ ଦୌଡ଼ି ଯାଉଥିଲେ । ତାଙ୍କଠାରୁ ମଧ୍ୟ ପ୍ରେରଣା ପାଇଥିଲେ । ଏପରିକି ଇଂରେଜଙ୍କ ବିରୋଧରେ ମେଳି ବାନ୍ଧି ଜେଲ ମଧ୍ୟ ଭୋଗିବାକୁ ପଡ଼ିଥିଲା । ଜେଲରେ ସଶ୍ରମ କାରାଦଣ୍ଡ ଭୋଗିବା ବେଳେ ଇଂରେଜମାନଙ୍କର ନିର୍ମମ ମାଡ଼ ଓ ଅକଥନୀୟ ନିର୍ଯାତନା ସହିବାକୁ ପଡ଼ିଥିଲା ।
ଯାହା ଆଜି ବି ତାଙ୍କର ମନେ ରହିଛି । ସେତେବେଳେ ଇଂରେଜ ଶାସନର ବର୍ବରତା ଏତେ ଥିଲା ଯେ ଘରେ ଝିଅ ବୋହୂ ରହିବାକୁ ଉଚିତ୍ ମଣୁନଥିଲେ । ଗୋଟିଏ ପଟେ ଇଂରେଜ, ଅନ୍ୟପଟେ ନୀଳଗିରି ରାଜାଙ୍କ ଶୋଷଣରେ ନୀଳଗିରିବାସୀ ତ୍ରାହି ତ୍ରାହି ଡାକୁଥିଲେ । ୧୯୪୭ ମସିହାରେ ଦେଶ ସ୍ୱାଧୀନ ହେଲା ସତ, ହେଲେ ନୀଳଗିରି ରାଜ୍ୟ ଗଣତନ୍ତ୍ରରେ ମିଶିନଥିଲା । ନୀଳଗିରିର ଯୁବ ଗୋଷ୍ଠୀ ରାଜାଙ୍କ ବିରୋଧରେ ମେଳି ବାନ୍ଧି ବିଦ୍ରୋହ କରିଥିଲେ । ସେଥିରେ ମଧ୍ୟ ଶ୍ରୀ ପାଣିଗ୍ରାହୀ ସାମିଲ ହୋଇଥିଲେ । ଶେଷରେ ପ୍ରଜା ମେଳି ଆନ୍ଦୋଳନ ପରେ ସରକାର ଚାପର ବଶବର୍ତ୍ତୀ ହୋଇ ନୀଳଗିରିକୁ ଗଣତନ୍ତ୍ରରେ ମିଶାଇବା ପୂର୍ବରୁ ତତ୍କାଳୀନ ନୀଳଗିରି ରାଜା ନୀଳଗିରି ଗଡ଼ଜାତକୁ କିଛି ସର୍ତ୍ତମୂଳକ ଭାବେ ଗଣତନ୍ତ୍ରରେ ସାମିଲ ହେବାକୁ ବାଧ୍ୟ ହୋଇଥିଲେ । ପରେ ପରେ ଦେଶରେ ଥିବା ସମସ୍ତ ରାଜାଙ୍କ ଅଧୀନସ୍ଥ ରାଜ୍ୟ ଗଣତନ୍ତ୍ରରେ ସାମିଲ ହୋଇଥିଲା ।
ଶ୍ରୀ ପାଣିଗ୍ରାହୀଙ୍କ କହିବା ଅନୁସାରେ ଏକତା ହିଁ ସଫଳତାର ଶ୍ରେୟ । ଆଜିର ଯୁବପିଢିଙ୍କ ଠାରେ ସେଭଳି କିଛି ଦେଖିବାକୁ ମିଳୁନି । ସମସ୍ତେ ଯେପରି ପାଠ ପଢି ଟଙ୍କା ରୋଜଗାର ପାଇଁ ଏକ ମିଶନରେ ବାହାରିଛନ୍ତି । ହେଲେ ଭୁଲିଯାଉଛନ୍ତି ଭାରତ ଆମର ମାଆ । ମା’କୁ ଯେପରି ଭୁଲି ହୁଏନା, ସେହିଭଳି ମାଟି ମାଆ କଥା ଭୁଲିଯିବା କିପରି? ସୀମାରେ ସେନାବାହିନୀ ଦେଶକୁ ସୁରକ୍ଷା ଦେଉଛନ୍ତି । ତେଣୁ ଆମେ ଅଚିନ୍ତାରେ ରହୁଛୁ । ଏ ମାଟି ପାଇଁ ମଧ୍ୟ ସାଧାରଣ ଜନତାଙ୍କର କିଛି ଭୂମିକା ରହିଛି । ଯେଉଁଦିନ ଏ ମାଟିର ସୁରକ୍ଷା ପାଇଁ ଘରେ ଘରେ ଯୁବପିଢି ଆଗକୁ ଆସିବେ । ସେଇଦିନ ଆମର ଭାରତ ମାଟିକୁ କେହି ବିଦେଶୀ ନାଲି ଆଖି ଦେଖାଇ ପାରିବ ନାହିଁ ବୋଲି ଶ୍ରୀ ପାଣିଗ୍ରାହୀ କହିଛନ୍ତି ।
ସେହିପରି ଦେଶ ମାତୃକା ପାଇଁ ବଳିଦାନ ଦେଇଥିବା ସେହି ମହାନ ବ୍ୟକ୍ତିତ୍ୱଙ୍କୁ ସର୍ବଦା ମନେ ରଖିବା ଉଚିତ୍ । ସରକାର ସ୍ୱାଧୀନତା ସଂଗ୍ରାମୀଙ୍କ ପରିବାର କଥା ଚିନ୍ତା କରିଛନ୍ତି ସତ ହେଲେ ସମାଜରେ ସମ୍ମାନ ମିଳିବାର ଆବଶ୍ୟକତା ରହିଛି । ଯାହା ଯୁବପିଢ଼ିଙ୍କ ପାଇଁ ଏକ ଶିକ୍ଷଣୀୟ ହୋଇ ରହିବ । ସରକାର ସଂଗ୍ରାମୀଙ୍କ ପରିବାର ପାଇଁ ଯେଉଁ କୁଟୁମ୍ବ ଯୋଜନା ଆଣିଛନ୍ତି ତା’କୁ ନିଶ୍ଚିତ ସ୍ୱାଗତ କରିବି । କାରଣ ଏହା ହେବ ସଂଗ୍ରାମୀ ପରିବାର ପାଇଁ ଏକ ପୁରସ୍କାର । ଆସନ୍ତୁ ମୋ ଭାରତ ମାଟିର ସନ୍ତାନ ସ୍ୱାଧୀନତା ଦିବସକୁ ଆନନ୍ଦ ଉଲ୍ଲାସରେ ପାଳନ କରିବା ।
You Can Read:
କର୍ମଜୀବୀ ମହିଳାଙ୍କ ପାଇଁ ଉପ ମୁଖ୍ୟମନ୍ତ୍ରୀଙ୍କ ବଡ଼ ଘୋଷଣା, ଏହି ଦିନ ମିଳିବ ଛୁଟି
