ପୁରୀ ୦୯।୦୩ : ବଡ଼ଦେଉଳରୁ ଖସିଲା ପଥର । ପୁରୀ ବଡ଼ଦେଉଳକୁ ଲାଗି ରହିଥିବା ବରାହ ମନ୍ଦିରରୁ ଖସିଛି ପଥର । ତେବେ ପଥର ଖସିବାରୁ ଏକାଦଶୀ ମନ୍ଦିରର ଟିଣ ଛାତ କଣା ହୋଇଯାଇଛି ।
ଖବର ଅନୁଯାୟୀ, ଶନିବାର ଦିନ ଭୋର ସମୟରେ ପୁରୀ ବଡ଼ଦେଉଳରୁ ଆସିଛି ଏପରି ଖବର । ମହାପ୍ରଭୁଙ୍କ ବଡ଼ଦେଉଳକୁ ଲାଗି ରହିଥିବା ବରାହ ମନ୍ଦିରରୁ ଖସିଛି ପଥର। ତେବେ ପଥର ଖସିବାରୁ ଏକାଦଶୀ ମନ୍ଦିର ଟିଣ ଛାତ ହୋଇଛି କଣା। ଶ୍ରୀମନ୍ଦିର କମାଣ୍ଡର ପଥରକୁ ସଂଗ୍ରହ କରି ଏଏସଆଇକୁ ଏହି ସୂଚନା ଦେଇଛନ୍ତି। ଦକ୍ଷିଣ ଘର ପଛ ପାଖ ତଥା ବିମଳା ମନ୍ଦିର ସମ୍ମୁଖରେ ରହିଛି ବରାହ ମନ୍ଦିର। ଏଏସଆଇ ପକ୍ଷରୁ ଦକ୍ଷିଣ ଘର ଉପର ଅଂଶର ମରାମତି କରାଯାଇଥିଲା। ତେବେ ଖସିଥିବା ପଥର ୫ ଇଞ୍ଚ ଓସାର ଓ ୧୦ଇଞ୍ଚ ଲମ୍ବର ବୋଲି ଜଣାପଡିଛି ।
ସୂଚନାଯୋଗ୍ୟ ଯେ, କିଛି ଦିନ ତଳେ ପୁରୀ ଶ୍ରୀମନ୍ଦିର ଚର୍ଚ୍ଚା ଘରୁ ଖସିଥିଲା ପଥର। ଜେଟିପି ବସୁଥିବା ଚର୍ଚ୍ଚା ଘର ସାମ୍ନା ନାଟମଣ୍ଡପ-ଜଗମୋହନ ଜଏଣ୍ଟ ସ୍ଥଳର ଏକ ଚାଳିରୁ ପଥର ଖଣ୍ଡ ଖସିଥିଲା। ତେବେ ଖସିଥିବା ପଥରର ଓଜନ ପ୍ରାୟ ୨-୩ କେଜି ହେବ ବୋଲି ସୂଚନା ମିଳିଥିଲା ।