ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ସହ ଫୋନରେ କଥା ହୋଇଛନ୍ତି । ଏହି ଅବସରରେ ଦୁଇ ନେତା ପଶ୍ଚିମ ଏସିଆ ସ୍ଥିତି ଉପରେ ଚର୍ଚ୍ଚା କରିଛନ୍ତି । ପ୍ରଧାନମନ୍ତ୍ରୀ ଏହି କଥାବର୍ତ୍ତାରେ ନିଜ ବନ୍ଧୁ ଏବଂ ଇସ୍ରାଏଲ୍ ସମକକ୍ଷଙ୍କୁ କହିଛନ୍ତି ଯେ ଦୁନିଆରେ ଆତଙ୍କବାଦର କୌଣସି ସ୍ଥାନ ନାହିଁ । ପିଏମ୍ ମୋଦୀ ନିଜେ ଟ୍ୱିଟ୍ କରି ଏହି ସୂଚନା ଦେଇଛନ୍ତି । ଗୁରୁତ୍ୱପୂର୍ଣ୍ଣ କଥା ହେଉଛି ଏହି ନେତାଙ୍କ ମଧ୍ୟରେ ଏହି କଥାବର୍ତ୍ତା ଏପରି ସମୟରେ ହୋଇଛି, ଯେତେବେଳେ ଇସ୍ରାଏଲ୍ ଏକାସଙ୍ଗରେ ଅନେକ ମୋର୍ଚ୍ଚାରୁ ଯୁଦ୍ଧ ଲଢୁଛି ଏବଂ ଅନେକ ଇସଲାମିକ ନେତା ବେଞ୍ଜାମିନ ନେତାନ୍ୟାହୁଙ୍କୁ ନରସଂହାର ପାଇଁ ଦୋଷ ଦେଉଛନ୍ତି ।
ପ୍ରଧାନମନ୍ତ୍ରୀ ମୋଦୀ ସୋସିଆଲ୍ ମିଡିଆ ପ୍ଲାଟପର୍ମ ଏକ୍ସରେ ଲେଖିଛନ୍ତି, 'ପଶ୍ଚିମ ଏସିଆରେ ସମ୍ପ୍ରତି ଘଟଣାକ୍ରମ ଉପରେ ପ୍ରଧାନମନ୍ତ୍ରୀ ନେତାନ୍ୟାହୁଙ୍କ ସହ କଥା ହୋଇଛି । ଆତଙ୍କବାଦର ଆମ ଦୁନିଆରେ କୌଣସି ସ୍ଥାନ ନାହିଁ । କ୍ଷେତ୍ରୀୟ ଉତ୍ତେଜନାକୁ ରୋକିବା ଏବଂ ସବୁ ବନ୍ଦୀଙ୍କ ସୁରକ୍ଷିତ ମୁକ୍ତି ସୁନିଶ୍ଚିତ କରିବା ଗୁରୁତ୍ୱପୂର୍ଣ୍ଣ ଅଟେ । ଭାରତ ଶାନ୍ତି ଏବଂ ସ୍ଥିରତାର ଶୀଘ୍ର ଫେରାଇ ଆଣିବା ପ୍ରୟାସର ସମର୍ଥନ କରିବା ପାଇଁ ପ୍ରତିବଦ୍ଧ ଅଟେ ।'
Spoke to Prime Minister @netanyahu about recent developments in West Asia. Terrorism has no place in our world. It is crucial to prevent regional escalation and ensure the safe release of all hostages. India is committed to supporting efforts for an early restoration of peace and…
— Narendra Modi (@narendramodi) September 30, 2024
ତେବେ ପ୍ରଧାନମନ୍ତ୍ରୀ ମୋଦୀ କୌଣସି ବିଶେଷ ଘଟଣା କଥା ଉଲ୍ଲେଖ କରିନାହାନ୍ତି । କିନ୍ତୁ ଗତ ସପ୍ତାହ ଲେବାନନରେ ଇସ୍ରାଏଲୀ ଏୟାର ଷ୍ଟ୍ରାଇକରେ ହେଜବୁଲ୍ଲା ମୁଖ୍ୟ ନସରଲ୍ଲା ଏବଂ ଅନ୍ୟ ଶୀର୍ଷ କମାଣ୍ଡର ନିହତ ହୋଇଥିଲେ । ଉଲ୍ଲେଖଯୋଗ୍ୟ ଯେ ଗତ କିଛି ଦିନ ଭିତରେ ଇସ୍ରାଏଲ ଦ୍ୱାରା ଲେବାନନରେ ଇରାନ ସମର୍ଥିତ ଆତଙ୍କୀ ସଂଗଠନ ହେଜବୁଲ୍ଲାର ବିଭିନ୍ନ ଠିକଣା ଉପରେ ଏୟାର ଷ୍ଟ୍ରାଇକ୍ କରାଯାଇଥିଲା । ଗତ ୨୪ ଘଣ୍ଟା ଭିତରେ ଲେବାନନରେ ଇସ୍ରାଏଲ ଷ୍ଟ୍ରାଇକରେ ୧୩୬ ଜଣଙ୍କ ମୃତ୍ୟୁ ହୋଇଛି ।
