କୋଣାର୍କ ୧୬।୦୧ : ଅଧା ରହିଗଲା ସ୍ୱପ୍ନ । ରାତିପାହିଲେ ଦେଇଥାନ୍ତେ ଆଇନ୍ ପରୀକ୍ଷା । ହେଲେ ଅଧାରେ ରହିଗଲା । ପୋଖରୀ ଭିତରକୁ ପଶିଗଲା କାର୍ । ଆଉ ଚାଲିଗଲା ଦୁଇ ଆଇନ୍ ପରୀକ୍ଷାର୍ଥୀଙ୍କ ଜୀବନ । ବାକି ଆଉ ଦୁଇ ଜଣ ଗୁରୁତର ହୋଇଛନ୍ତି । ଗୁରୁତର ଯାତ୍ରୀଙ୍କୁ ଉଦ୍ଧାର କରି ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି । ପୁରୀ ଜିଲ୍ଲା କୋଣାର୍କ ନିମାପଡ଼ା ରାସ୍ତା ନିକଟରେ ଘଟିଛି ଏହି ଘଟଣା ।
ଖବର ଅନୁଯାୟୀ, ବୁଧବାର ବିଳମ୍ବିତ ରାତିରେ କୋଣାର୍କ-ନିମାପଡ଼ା ରାସ୍ତାର ଜୁଣେଇ ସଂଖ ନିକଟରେ ଏକ ନିମାପଡ଼ା ଅଭିମୁଖେ ଯାଉଥିଲା । ଏହି ସମୟରେ କାର୍ଟି ଭାରସାମ୍ୟ ହରାଇ ପୋଖରୀ ଭିତରକୁ ପଶିଯାଇଥିଲା । ତେବେ ଦୁର୍ଘଟଣା ଦେଖି ସ୍ଥାନୀୟ ଲୋକ ତୁରନ୍ତ ଚମ୍ପାହାର ଅଗ୍ନିଶମ ବାହିନୀକୁ ଖବର ଦେଇଥିଲେ । ଅଗ୍ନିଶମ ବାହିନୀ ଖବର ପାଇ ତୁରନ୍ତ ଘଟଣାସ୍ଥଳରେ ପହଞ୍ଚି କାର୍ ଭିତରକୁ ମୃତାହତଙ୍କୁ ଉଦ୍ଧାର କରି ଗୋପ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ହେଲେ ସେଠାରେ ଡାକ୍ତର ଦୁଇ ଜଣଙ୍କୁ ମୃତ୍ୟୁ ଘୋଷଣା କରିଥିବା ବେଳେ ଦୁଇ ଜଣ ଗୁରୁତର ହୋଇଛନ୍ତି । ମୃତ ଯୁବକ ଦୁଇ ଜଣ ସାଙ୍ଗ ହୋଇଥିବା ବେଳେ ଗୁରୁବାର ଦିନ ପୁରୀରେ ଆଇନ୍ ପରୀକ୍ଷା ଦେଇଥାନ୍ତେ । ହେଲେ ତାହା ଅଧାରେ ରହିଗଲା ।
ତେବେ କୋଣାର୍କ ବୁଲି ନିମାପଡ଼ା ଅଭିମୁଖେ ଫେରୁଥିବା ବେଳେ ଦୁର୍ଘଟଣା ଘଟିଥିବା ଜଣାପଡିଛି । ମୃତ ଦୁଇ ଜଣଙ୍କ ମଧ୍ୟରୁ ଜଣେ କାର୍ ଚାଳକ ନିମାପଡ଼ା ଗୁହାଳପଡ଼ା ଅଞ୍ଚଳର ସନ୍ଦୀପ ମହାପାତ୍ର ଓ ଅନ୍ୟ ଜଣକ ପଶ୍ଚିମବଙ୍ଗ ଦାନ୍ତୁନି ଅଞ୍ଚଳର ସନାତନ ସେନାପତି ବୋଲି ଜଣାପଡିଛି । ସେହିପରି ଗୁରୁତର ଥିବା ଦୁଇ ଜଣ ହେଲେ ମନୀଷ ସେନାପତି ଓ ବାଲିପାଟଣା ଅଞ୍ଚଳର ପୁପୁଲ ପରିଡା ବୋଲି ଜଣାପଡିଛି । ଗୁରୁତର ଗୋପ ମେଡିକାଲରେ ଭର୍ତ୍ତି ହୋଇଛନ୍ତି । କୋଣାର୍କ ପୋଲିସ ଘଟଣାସ୍ଥଳରେ ପହଞ୍ଚି ଗାଡି ଉଦ୍ଧାର କରିଛନ୍ତି ।
