କଳାହାଣ୍ଡି ୧୫/୯: ଭୁଶୁଡିଲା ବେଦାନ୍ତର ରେଡ୍ ମଡ୍ ପଣ୍ଡ । ଚାଷ ଜମି, ରାସ୍ତା ଓ ନଦୀରେ ମିଶୁଛି ବିଷାକ୍ତ କେମିକାଲ ପାଣି। ଆତଙ୍କିତ ଲୋକେ । କଳାହାଣ୍ଡି ଜିଲ୍ଲା ଲାଞ୍ଜିଗଡରେ ଥିବା ବେଦାନ୍ତ କଂପାନୀର ବସନ୍ତପଡାରେ ନିର୍ମାଣ କରାଯାଇଥିବା ରେଡ୍ ପଣ୍ଡ ଭୁଶୁଡି ପଡିଛି । ଫଳରେ ବସନ୍ତପଡା ସମେତ ବନ୍ଧଗୁଡା,ଟୁରିଗୁଡାର ହେକ୍ଟର ହେକ୍ଟର ଚାଷ ଜମିରେ କାଦୁଅ ପାଣି ମାଡି ଯାଇଛି ।
ଲାଞ୍ଜିଗଡ-ମୁନିଗୁଡା ରାସ୍ତାରେ ଯାତାୟତ ଠପ୍ ହୋଇଯାଇଛି । ବଂଶଧାରା ନଦୀରେ ପାଣି ମିଶୁଥିବାରୁ ବିଭିନ୍ନ ପ୍ରକାର ଚର୍ମ ରୋଗର ଆଶଙ୍କା ଦେଖାଦେଇଛି । ଚାରିଆଡେ ଲାଲ ମାଟି ପାଣି ମାଡିଯିବାରୁ ବନ୍ୟା ପରିସ୍ଥିତି ସୃଷ୍ଟି ହୋଇଛି । ଏହି ପଣ୍ଡକୁ ଠିକ ଭାବରେ ରକ୍ଷଣାବେକ୍ଷଣ କରାଯାଇନଥିବାରୁ ଏଭଳି ସ୍ଥିତି ସୃଷ୍ଟି ହୋଇଥିବା ଅଭିଯୋଗ ହୋଇଛି । ତେବେ ଏ ସଂପର୍କରେ କଂପାନୀ କର୍ତ୍ତୃପକ୍ଷଙ୍କର କୌଣସି ପ୍ରତିକ୍ରିୟା ମିଳିପାରିନି । ଶନିବାର ରାତି ପ୍ରାୟ ୩ଟା ସମୟରେ ରେଡ୍ ମଡ୍ ପଣ୍ଡଟି ଭୁଶୁଡି ପଡିଥିବା କୁହାଯାଉଛି ।
