ନୂଆଦିଲ୍ଲୀ ୦୮।୦୧: ବିଦାୟ ନେବେ ବର୍ତ୍ତମାନର ISRO ମୁଖ୍ୟ । ଜାନୁଆରୀ ୧୪ରେ ସରୁଛି ଏସ ସୋମନାଥଙ୍କ କାର୍ଯ୍ୟକାଳ । ମଙ୍ଗଳବାର ଭାରତୀୟ ମହାକାଶ ଗବେଷଣା ସଂଗଠନର ନୂଆ ମୁଖ୍ୟଙ୍କ ନାଁ ଘୋଷଣା ହୋଇଛି । ଇସ୍ରୋ ମୁଖ୍ୟ ହେବେ ଡକ୍ଟର ଭି ନାରାୟଣନ୍ । ତେବେ କିଏ ଏହି ଡକ୍ଟର ଭି ନାରାୟଣନ୍ ? ଭି ନାରାୟଣନ୍ ଜଣେ ଜଣାଶୁଣା ବୈଜ୍ଞାନିକ। ରକେଟ୍ ଏବଂ ମହାକାଶଯାନ ପ୍ରବୃତ୍ତିରେ ତାଙ୍କର ବିପୁଳ ଅଭିଜ୍ଞତା ଅଛି। ସେ ଏରୋସ୍ପେସ୍ ଇଞ୍ଜିନିୟରିଂରେ ପିଏଚଡି କରିଛନ୍ତି ।
ଭାରତୀୟ ମହାକାଶ ସଂଗଠନରେ ତାଙ୍କର ଚାରି ଦଶନ୍ଧିରୁ ଅଧିକ ଦିନର ରହିଛି ଅଭିଜ୍ଞତା । ବର୍ତ୍ତମାନ ସେ LPSC ଅର୍ଥାତ୍ ଲିକ୍ୱିଡ୍ ପ୍ରୋପଲସନ୍ ସିଷ୍ଟମ୍ ସେଣ୍ଟରର ନିର୍ଦ୍ଦେଶକ । ସେ ତାଙ୍କ କାର୍ଯ୍ୟକାଳ ମଧ୍ୟରେ ଅନେକ ଗୁରୁତ୍ୱପୂର୍ଣ୍ଣ ପଦବୀରେ ରହିଆସିଛନ୍ତି । କୁହାଯାଏ ଯେ ସେ ରକେଟ୍ ଏବଂ ମହାକାଶଯାନ ପ୍ରୋପଲସନ୍ର ବିଦ୍ବାନ । ତାଙ୍କ ସଫଳତା ମଧ୍ୟରେ GSLV Mk III ଯାନର C-25 କ୍ରାୟୋଜେନିକ୍ ପ୍ରୋଜେକ୍ଟ ସାମିଲ୍ ରହିଛି । ସେ ଏହାର ପ୍ରକଳ୍ପ ନିର୍ଦ୍ଦେଶକ ରହିଥିଲେ ।
ଡକ୍ଟର ନାରାୟଣନ୍ ୧୯୮୪ରେ ISROକୁ ଆସିଥିଲେ । ପ୍ରାରମ୍ଭରେ ପ୍ରାୟ ସାଢେ ଚାରି ବର୍ଷ ଧରି ସେ ବିକ୍ରମ ସାରବାଇ ସ୍ପେସ୍ ସେଣ୍ଟରରେ ସାଉଣ୍ଡିଂ ରକେଟ୍, ଅଗୁମେଣ୍ଟେଡ୍ ସାଟେଲାଇଟ୍ ଲଞ୍ଚ ଭେଇକିଲ୍ ଏବଂ ପୋଲାର ସାଟେଲାଇଟ୍ ଲଞ୍ଚ ଭେଇକିଲର କଠିନ ପ୍ରୋପଲସନ୍ କ୍ଷେତ୍ରରେ କାର୍ଯ୍ୟ କରିଥିଲେ । ସେ ପ୍ରୋଜେକ୍ଟ ମ୍ୟାନେଜମେଣ୍ଟ କାଉନସିଲ୍-ସ୍ପେସ୍ ଟ୍ରାନ୍ସପୋର୍ଟ ସିଷ୍ଟମ୍ (ପିଏମସି-ଏସ୍ଟିଏସ୍)ର ଚେୟାରମ୍ୟାନ୍ ମଧ୍ୟ ରହିଛନ୍ତି । HRCB ବୋର୍ଡର ଚେୟାରମ୍ୟାନ୍ ମଧ୍ୟ ରହିଥିଲେ । ଡକ୍ଟର ନାରାୟଣନଙ୍କ ନେତୃତ୍ୱରେ LPSC ISROର ବିଭିନ୍ନ ମିଶନ ପାଇଁ ୧୯୦ଟି ଲିକ୍ବିଡ୍ ପ୍ରୋପଲସନ୍ ସିଷ୍ଟମ ଏବଂ କଣ୍ଟ୍ରୋଲ୍ ପାୱାର ପ୍ଲାଣ୍ଟ ଯୋଗାଇଛି । ଭି ନାରାୟଣନ ଆଦିତ୍ୟ ମହାକାଶଯାନ ଏବଂ ଜିଏସଏଲଭି ମାର୍କ-୩ମିଶନ, ଚନ୍ଦ୍ରୟାନ-୨ ଏବଂ ଚନ୍ଦ୍ରାୟନ-3ର ପ୍ରୋପଲସନ୍ ସିଷ୍ଟମରେ ସହଯୋଗ କରିଥିଲେ । ଡକ୍ଟର ନାରାୟଣନ ମେକାନିକାଲ୍ ଇଞ୍ଜିନିୟରିଂରେ AMIE ସହିତ ସମାପ୍ତ କରିଛନ୍ତି ।
ସେ ଏରୋସ୍ପେସ୍ ଇଞ୍ଜିନିୟରିଂରେ ପିଏଚଡି ସହିତ କ୍ରିଏଜେନିକ୍ ଇଞ୍ଜିନିୟରିଂରେ M.Tech ସମାପ୍ତ କରିଥିଲେ । ସେ ୧୯୮୪ରେ ISRO ରେ ଯୋଗ ଦେଇଥିଲେ ଏବଂ ଜାନୁଆରୀ ୨୦୧୮ରେ LPSC ର ନିର୍ଦ୍ଦେଶକ ହେବା ପୂର୍ବରୁ ବିଭିନ୍ନ କ୍ଷମତାରେ କାର୍ଯ୍ୟ କରିଥିଲେ। ଭି ନାରାୟଣନ ଆଇଆଇଟି ଖଡଗପୁରରୁ ରୌପ୍ୟ ପଦକ, ASI ଅର୍ଥାତ୍ ଜ୍ୟୋତିର୍ବିଜ୍ଞାନ ସୋସାଇଟି ଅଫ୍ ଇଣ୍ଡିଆରୁ ସ୍ୱର୍ଣ୍ଣ ପଦକ ଏବଂ NDRF ତରଫରୁ ଜାତୀୟ ଡିଜାଇନ୍ ପୁରସ୍କାର ସହିତ ୨୫ଟି ପୁରସ୍କାର ପାଇଛନ୍ତି ।
ତେବେ ବର୍ତ୍ତମାନର ଇସ୍ରୋ ମୁଖ୍ୟ ଏସ୍ ସୋମନାଥ ଜାନୁଆରୀ ୨୦୨୨ରେ ISRO ମୁଖ୍ୟ ଭାବେ ଦାୟିତ୍ୱ ଗ୍ରହଣ କରିଥିଲେ । ତାଙ୍କ ନେତୃତ୍ୱରେ ଆମେରିକା, ସୋଭିଏତ୍ ୟୁନିଅନ୍ ଏବଂ ଚୀନ୍ ପରେ ଭାରତ ଚନ୍ଦ୍ରପୃଷ୍ଠରେ ଏକ ସଫ୍ଟ ଲ୍ୟାଣ୍ଡି କରି ଭାରତ ବିଶ୍ୱର ଚତୁର୍ଥ ଦେଶ ହୋଇଥିଲା । ୨୩ ଅଗଷ୍ଟ ୨୦୨୩ରେ ଭାରତ ଚନ୍ଦ୍ରର ଦକ୍ଷିଣ ପୋଲ ଉପରେ ଏକ ସଫ୍ଟ ଲ୍ୟାଣ୍ଡି କରିଥିଲା । ବର୍ତ୍ତମାନ ଭାରତ ମହାକାଶ ମଣିଷକୁ ପଠାଇବାକୁ ପ୍ରସ୍ତୁତ ହେଉଛି।
