ମୁମ୍ବାଇ: ରିଲିଜ୍ର ୨୭ ଦିନ ପରେ ବି ବକ୍ସ ଅଫିସ୍ରେ ‘ପୁଷ୍ପା ୨: ଦ ରୁଲ୍’ର ଜଲଓ୍ଵା ଥମିବାର ନାଁ ନେଉନି। ଡିସେମ୍ବର ୫ରେ ବଡ଼ ପରଦାକୁ ଆସିଥିବା ଅଲ୍ଲୁ ଅର୍ଜୁନଙ୍କ ଏହି ଫିଲ୍ମ ପ୍ରତି ଦିନ କୋଟି କୋଟି ବ୍ୟବସାୟ କରି ନିଜ ନାଁରେ ନୂଆ ରେକର୍ଡ ଯୋଡ଼ି ଚାଲିଛି।
ସାକନିଲ୍କର ରିପୋର୍ଟ ଅନୁଯାୟୀ, ପୁଷ୍ପା ୨ ୨୭ ଦିନରେ ବକ୍ସ ଅଫିସ୍ରେ ମୋଟ୍ ୧୧୭୧.୬ କୋଟି ଟଙ୍କା ବ୍ୟବସାୟ କରିଥିଲା। ଏବେ ୨୮ତମ ଦିନ ଅର୍ଥାତ ନୂଆ ବର୍ଷର ପ୍ରଥମ ଦିନରେ ସନ୍ଧ୍ୟା ୭ଟା ସୁଦ୍ଧା ଫିଲ୍ମ ୧୧.୧୮ କୋଟି ଟଙ୍କାର ଆୟ କରି ସାରିଛି। ଏହା ସହିତ ଘରୋଇ ବକ୍ସ ଅଫିସ୍ରେ ଅଲ୍ଲୁ ଅର୍ଜୁନଙ୍କ ଫିଲ୍ମ ୧୨୦୦ କୋଟି କ୍ଲବର ନିକଟତର ହୋଇଛି।
‘ପୁଷ୍ପା ୨: ଦ ରୁଲ୍’ ରିଲିଜ୍ ପରେ ଡିସେମ୍ବର ୨୫ରେ ବରୁଣ ଧାଓ୍ଵନଙ୍କ ଫିଲ୍ମ ବେବି ଜନ ଓ ନାନା ପାଟେକରଙ୍କ ବନବାସ ରିଲିଜ୍ ହୋଇଥିଲା। ଏହି ଦୁଇ ଫିଲ୍ମର ରିଲିଜ୍ରେ ବି ଅଲ୍ଲୁ ଅର୍ଜୁନଙ୍କ ପୁଷ୍ପା ୨ ଉପରେ କୌଣସି ପ୍ରଭାବ ପଡ଼ି ନାହିଁ। ପୁଷ୍ପା ୨ ଆଗରେ ଏହି ଦୁଇ ଫିଲ୍ମ ଧରାଶାୟୀ ହୋଇ ସାରିଛନ୍ତି। ୨୮ତମ ଦିନର କଲେକ୍ସନ ସହିତ ପୁଷ୍ପା ୨ର ଭାରତରେ ଏ ପର୍ଯ୍ୟନ୍ତ ମୋଟ୍ ୧୧୮୨.୭୮ କୋଟି ଟଙ୍କାର ଆୟ କରି ସାରିଛି।
ସମଗ୍ର ଦୁନିଆରେ ଫିଲ୍ମ ୧୭୬୦ କୋଟି ଟଙ୍କାର କାରବାର କରି ସାରିଛି। ଏହି କଲେକ୍ସନ ସହିତ ଫିଲ୍ମ ବାହୁବଳୀ ୨ର ଓ୍ଵାର୍ଲ୍ଡଓ୍ଵାଇଡ କଲେକ୍ସନକୁ ମାତ୍ ଦେବାର ନିକଟତର ହୋଇଛି। ପ୍ରଭାସଙ୍କ ଏହି ଫିଲ୍ମ ସମଗ୍ର ଦୁନିଆରେ ୧୭୮୮.୦୬ କୋଟି ଟଙ୍କାର ଆୟ କରିଛି।
