ନ୍ୟୁୟର୍କ, ୮/୭: କୋପା ଆମେରିକା କପ୍ରୁ ୯ଥର ଚାମ୍ପିଅନ୍ ବ୍ରାଜିଲ୍ର ବିଦାୟ । ଚମତ୍କାର ଖେଳ ପ୍ରଦର୍ଶନ କରି ସେମିରେ ପ୍ରବେଶ କରିଛି ଉରୁଗୁଏ ଓ କଲମ୍ବିଆ । ତୃତୀୟ କ୍ୱାର୍ଟର ଫାଇନାଲ୍ରେ କଲମ୍ବିଆ ୫-୦ ଗୋଲ୍ରେ ପାନାମାକୁ ପରାସ୍ତ କରିଛି । ସେହିପରି ଅନ୍ୟ ଏକ କ୍ୱାର୍ଟର ଫାଇନାଲ୍ ମୁକାବିଲାରେ ବ୍ରାଜିଲ୍ ୨-୪ ପେନାଲ୍ଟି ସୁଟ୍ ଆଉଟ୍ ଗୋଲ୍ରେ ଉରୁଗୁଏ ଠାରୁ ପରାଜିତ ହୋଇଥିଲା ।
ଲାସ ଭେଗାସ ସ୍ଥିତ ଆଲେଜାଏଣ୍ଟ୍ ଷ୍ଟାଡ଼ିୟମ୍ରେ ଅନୁଷ୍ଠିତ ଏହି ମ୍ୟାଚ୍ ନିର୍ଦ୍ଧାରିତ ସମୟ ସୁଦ୍ଧା ଗୋଲ ଶୂନ୍ୟ ରହିଥିଲା । ୯୦ମିନିଟର ମୁକାବିଲା ମଧ୍ୟରେ ମୋଟ୍ ୪୧ଟି ଫାଉଲ ମାରିଥିଲେ ଉଭୟ ଦଳର ଖେଳାଳି । ମାତ୍ର ଗୋଲ୍ ପୋଷ୍ଟରେ ବଲ୍ ପହଞ୍ଚାଇବାରେ ସବୁ ବିଫଳ ହୋଇଥିଲେ । ଟାଇବ୍ରେକରରେ ଉରୁଗୁଏ ୪ଟି ଗୋଲ୍ କରିଥିଲା । ମାତ୍ର ବ୍ରାଜିଲ୍ ଖେଳାଳି ପେନାଲ୍ଟି ମାରିବାରେ ବିଫଳ ହୋଇଥିଲେ । କେବଳ ଆନ୍ଦ୍ରେସ ପେରେରା ଓ ଗାବ୍ରିଏଲ ମାର୍ଟିନେଲି ପେନାଲ୍ଟିରେ ସଫଳ ହୋଇଥିଲେ । ଉରୁଗୁଏ ପକ୍ଷରୁ ଫେଡେରିକୋ ଭାଲଭର୍ଡ, ରୋଡ୍ରିଗୋ ବେଣ୍ଟାଙ୍କର, ଜର୍ଜିଆନ ଡି ଆରାସକେଟା ଓ ମାନୁଏଲ ୟୁଗ୍ରେଟ୍ ପେନାଲ୍ଟିକୁ ଗୋଲ୍ରେ ପରିଣତ କରିଥିଲେ ।
ସେହିପରି ଫୋନିକ୍ସ ଷ୍ଟାଡ଼ିୟମ୍ରେ ଅନୁଷ୍ଠିତ ମ୍ୟାଚ୍ରେ କଲମ୍ବିଆ ଆଧିପତ୍ୟ ବିସ୍ତାର କରି ଖେଳି ୫-୦ ଗୋଲ୍ରେ ବିଜୟ ହାସଲ କରିଥିଲା । ଦଳ ପକ୍ଷରୁ ଅଷ୍ଟମ ମିନିଟ୍ରେ ଜନ୍ କୋର୍ଡୋବା, ୧୫ତମ ମିନିଟ୍ରେ ଜେମ୍ସ ରୋଡ୍ରିଗୁଏଜ(ପେନାଲ୍ଟି), ୪୧ତମ ମିନିଟ୍ରେ ଲୁଇସ ଡାଏଜ, ୭୦ତମ ମିନିଟ୍ରେ ରିଚାର୍ଡ ରିୟସ ଓ ୯୦ତମ ମିନିଟ୍ରେ ମିଗ୍ୱେଲ ବୋର୍ଜା(ପେନାଲ୍ଟି) ଗୋଲ୍ କରିଥିଲେ । କଲମ୍ବିଆ ଓ ଉରୁଗୁଏର ବିଜୟ ସହ ସେମି ଫାଇନାଲ୍ ଲାଇନ୍ ଅପ୍ ଚୂଡ଼ାନ୍ତ ହୋଇଛି । ପ୍ରଥମ ସେମି ଫାଇନାଲ୍ରେ ଆର୍ଜେଣ୍ଟିନା ଓ କାନାଡ଼ା ପରସ୍ପରକୁ ଭେଟିବେ । ସେହିପରି ଉରୁଗୁଏ ଓ କଲମ୍ବିଆ ମଧ୍ୟରେ ଦ୍ୱିତୀୟ ସେମି ଫାଇନାଲ ଖେଳାଯିବ ।