ନୂଆଦିଲ୍ଲୀ,: ରାଜଧାନୀ ଦିଲ୍ଲୀ ସମେତ ଅଧିକାଂଶ ରାଜ୍ୟରେ ପ୍ରଚଣ୍ଡ ଗ୍ରୀଷ୍ମ ପ୍ରବାହ ଜାରି । ଅସହ୍ୟ ଗୁଳୁଗୁଳି ସ୍ୱାଭାବିକ ଜୀବନ ଦୁର୍ବିଷହ ହୋଇପଡ଼ିଛି । ଘରୁ ବାହାରିବା ଲୋକଙ୍କ ପାଇଁ ମୁସ୍କିଲ ହେଉଛି । ସାଙ୍ଘାତିକ ତାତିରୁ ନିସ୍ତାର ପାଇଁ ଲୋକେ ଘର ଭିତରେ ଆବଦ୍ଧ ରହୁଛନ୍ତି । ଦିଲ୍ଲୀରେ ଅଂଶୁଘାତଜନିତ ମୃତ୍ୟୁ ଏ ବର୍ଷ ୨୦ ପାର୍ କରିଛି । ୪ ମାସ ମଧ୍ୟରେ ଦେଶବ୍ୟାପୀ ହିଟଓ୍ବେଭ୍ ଜନିତ ମୃତ୍ୟୁ ସଂଖ୍ୟା ୧୧୦ ଟପିଥିବା ବେଳେ ୪୦ହଜାରରୁ ଅଧିକ ଅସୁସ୍ଥ ହୋଇଛନ୍ତି ।
କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ସଦ୍ୟ ରିପୋର୍ଟ ଅନୁଯାୟୀ, ଚଳିତବର୍ଷ ମାର୍ଚ୍ଚରୁ ଜୁନ୍ ୧୮ ପର୍ଯ୍ୟନ୍ତ ୪୦,୨୭୨ ଅଂଶୁଘାତ ମାମଲା ସାମ୍ନାକୁ ଆସିଛି । ରିପୋର୍ଟ ମୁତାବକ ଗ୍ରୀଷ୍ମ ପ୍ରବାହ ଯୋଗୁ ଉତ୍ତର ପ୍ରଦେଶରେ ସର୍ବାଧିକ ୩୬ ଲୋକଙ୍କ ମୃତ୍ୟୁ ହୋଇଛି । ଏହା ପଛକୁ ବିହାର, ରାଜସ୍ଥାନ ଏବଂ ଓଡ଼ିଶା ରହିଛି । କିନ୍ତୁ ପ୍ରକୃତ ଅଂଶୁଘାତଜନିତ ମୃତ୍ୟୁ ସଂଖ୍ୟା ଏହାଠାରୁ ଆହୁରି ଅଧିକ ହେବା ନେଇ କୁହାଯାଉଛି । କାରଣ ଗ୍ରାମାଞ୍ଚଳରେ ହେଉଥିବା ଅଂଶୁଘାତ ମୃତ୍ୟୁ ବାବଦରେ କମ୍ ରିପୋର୍ଟ ସାମ୍ନାକୁ ଆସୁଛି । ଏ ବର୍ଷ ତାପମାତ୍ରା ପ୍ରାୟ ୫୦ ଡିଗ୍ରୀ ସେଲସିୟସ ନିକଟତର ହୋଇଛି । ଜୁନ୍ରେ ସର୍ବାଧିକ ତାପମାତ୍ରା ୪୭ ଡିଗ୍ରୀ ଛୁଇଁଥିଲା । ୨୦୨୩ରେ ଏହା ସର୍ବାଧିକ ୪୧.୮ ଡିଗ୍ରୀ ପର୍ଯ୍ୟନ୍ତ ଯାଇଥିଲା ବେଳେ ୨୦୨୨ରେ ୪୪.୨ ଡିଗ୍ରୀ ଏବଂ ୨୦୨୧ରେ ୪୩ ଡିଗ୍ରୀ ହୋଇଥିଲା ।
ରିପୋର୍ଟ ଅନୁସାରେ, ଏ ବର୍ଷ ମଧ୍ୟପ୍ରଦେଶରେ ସର୍ବାଧିକ ୧୦,୬୩୬ ଅଂଶୁଘାତ ମାମଲା ସାମ୍ନାକୁ ଆସିଛି । ଏହା ପଛକୁ ଥିବା ରାଜସ୍ଥାନରେ ୬, ୫୪୬, ଆନ୍ଧ୍ର ପ୍ରଦେଶରେ ୩, ୯୯୪, ଉତ୍ତର ପ୍ରଦେଶରେ ୩, ୫୯୦, ଓଡ଼ିଶାରେ ୩, ୫୭୪, ଛତିଶଗଡ଼ରେ ୩, ୨୭୮ ଏବଂ ବିହାରରେ ୨, ୦୫୪ ମାମଲା ରେକର୍ଡ କରାଯାଇଛି । ୟୁପିରେ ସର୍ବାଧିକ ୩୬ ଜଣଙ୍କ ମୃତ୍ୟୁ ହୋଇଥିବା ବେଳେ ବିହାରରେ ୧୭, ରାଜସ୍ଥାନରେ ୧୬, ଓଡ଼ିଶାରେ ୧୩, ତେଲଙ୍ଗାନାରେ ୭ ଏବଂ ମଧ୍ୟ ପ୍ରଦେଶରେ ୩ ଜଣଙ୍କ ମୃତ୍ୟୁ ହୋଇଛି । ବୁଧବାର କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଜେ.ପି ନଡ୍ଡା ହସ୍ପିଟାଲଗୁଡ଼ିକରେ ପ୍ରସ୍ତୁତି ବ୍ୟବସ୍ଥାର ସମୀକ୍ଷା କରିଥିଲେ । ଅଂଶୁଘାତର ଶିକାର ହେଉଥିବା ଲୋକଙ୍କ ଚିକିତ୍ସା ପାଇଁ କିଭଳି ବ୍ୟବସ୍ଥା କରାଯାଇଛି, ତାହା ପରଖିଥିଲେ । ଅଂଶୁଘାତ ରୋଗୀଙ୍କ ପାଇଁ ସର୍ବୋତ୍କୃଷ୍ଟ ଚିକିତ୍ସା ସେବା ଯୋଗାଇବା ଲାଗି ନଡ୍ଡା ସମସ୍ତ ହସ୍ପିଟାଲକୁ ନିର୍ଦ୍ଦେଶ ଦେଇଛନ୍ତି
