ପୁରୀ ୨୪/୦୬: ଅତ୍ୟଧିକ ସ୍ନାନ ଯୋଗୁଁ ଜ୍ବରରେ ଆକ୍ରାନ୍ତ ଶ୍ରୀଜିଉ ଏବେ ଅଣସର ଘରେ ଅଛନ୍ତି। ଦଇତାପତି ସେବକମାନେ ଶ୍ରୀଜୀଉଙ୍କ ଗୁପ୍ତ ସେବା କରୁଛନ୍ତି। ତେବେ ଆଜି ଦଇତାପତିମାନେ ଶ୍ରୀଜୀଉଙ୍କ ପରିଧାନ ଓଦା ବସ୍ତ୍ରକୁ ଓଲାଗି କରିବାର ବିଧି ଥିବା ବେଳେ ଅଣସର ସମୟରେ ଶ୍ରୀଜିଉ ଶ୍ୱେତବସ୍ତ୍ର ପରିଧାନ କରିବାର ବିଧି ରହିଛି।
ଏହି ଅଣସର ସମୟରେ ଶ୍ରୀଜିଉଙ୍କୁ ତୁଳସୀ ଲାଗି କରାନଯାଇ ଧଳାଫୁଲ ଲାଗି ଲାଗି କରାଯାଇଥାଏ। ଅଣସର ଘରେ ଥିବା ମହାପ୍ରଭୁଙ୍କ ପାଖରେ ଚକଟା ଏବଂ ପଣା ଭୋଗ କରାଯାଉଥିବା ବେଳେ ପଟିଦିଅଁଙ୍କୁ ଅନ୍ନ ମହାପ୍ରସାଦ ଭୋଗ କରାଯାଉଛି। ସେହିପରି ପଟିଦିଅଁ ରୂପରେ ପ୍ରଭୁ ବଳଭଦ୍ରଙ୍କ ସ୍ଥାନରେ ଅନନ୍ତ ବାସୁଦେବ, ଦେବୀ ସୁଭଦ୍ରାଙ୍କ ସ୍ଥାନରେ ମାଆ ଭୁବନେଶ୍ୱରୀ ଓ ମହାପ୍ରଭୁ ଶ୍ରୀଜଗନ୍ନାଥଙ୍କ ସ୍ଥାନରେ ଅନନ୍ତ ନାରାୟଣ ପୂଜା ପାଉଛନ୍ତି।