ସିଲଂ ୨୪।୩: ଦେଶର ସବୁଠୁ ପୁରୁଣା ଓ ପ୍ରତିଷ୍ଠିତ ଅର୍ଦ୍ଧସାମରିକ ବଳ ମଧ୍ୟରେ ଅନ୍ୟତମ ଆସାମ ରାଇଫଲସ୍ ସୋମବାର ୧୯୦ତମ ସ୍ଥାପନା ଦିବସ ପାଳନ କରିଛି। ସିଲଂ ସ୍ଥିତ ମୁଖ୍ୟାଳୟରେ ଗର୍ବ ଓ ଶ୍ରଦ୍ଧାର ସହିତ ଏହି ସ୍ଥାପନା ଦିବସ ପାଳନ କରାଯାଇଛି। ଏହି ଅବସରରେ ଆସାମ ରାଇଫଲସର ଲେଫ୍ଟନାଣ୍ଟ ଜେନେରାଲ ବିକାଶ ଲଖେଡା, ଡିଜି ଆସାମ ରାଇଫଲସ୍ ଓ ଫୋର୍ସର ସମସ୍ତ ରାଙ୍କ ଅଧିକାରୀ ସିଲଂ ଯୁଦ୍ଧ ସ୍ମାରକରେ ସହିଦ ଜବାନମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି ଯେଉଁମାନେ ଅତୀତରେ ସର୍ବୋଚ୍ଚ ବଳିଦାନ ଦେଇଛନ୍ତି।
ଆସାମ ରାଇଫଲସ ଡିଜି କାର୍ଯ୍ୟକ୍ରମକୁ ସମ୍ବୋଧିତ କରି ପୂର୍ବୋତ୍ତର ଓ କାଶ୍ମୀରରେ ଉଗ୍ରବାଦର ମୁକାବିଲା ଲାଗି ଉତ୍କୃଷ୍ଟ ଯୋଗଦାନକୁ ଉଚ୍ଚ ପ୍ରଶଂସା କରିଛନ୍ତି। ଏହି ଅବସରରେ ସମସ୍ତଙ୍କ ନଜର ୨୦୨୩-୨୪ ଡିଜି ଏଆର ଧ୍ୱଜ ଉପରେ ଥିଲା, ଯାହାକୁ ସର୍ବୋତ୍ତମ ପ୍ରଦର୍ଶନ ନିମନ୍ତେ ୟୁନିଟ୍-୪ ଆସାମ ରାଇଫଲସକୁ ପ୍ରଦାନ କରାଯାଇଛି। ଏଥିରେ ୩୬ ଆସାମ ରାଇଫଲସ୍ ଦ୍ୱିତୀୟ ସ୍ଥାନରେ ଥିବା ବେଳେ ତୃତୀୟ ଆସାମ ରାଇଫଲସକୁ ପ୍ରଥମ ରନର୍ସ ଅପ ଘୋଷଣା କରାଯାଇଛି।
ଆସାମ ରାଇଫଲସ ୨୦୨୪-୨୫ରେ ଅପରେସନ ମାନଙ୍କରେ ନିଜର ଦୃଢତାକୁ ପ୍ରମାଣିତ କରିଛି। ଗତବର୍ଷ ଆସାମ ରାଇଫଲସର ୪ଟି ବଟାଲିୟନକୁ ‘ଚିଫ ଅଫ ଆର୍ମିଷ୍ଟାଫ ୟୁନିଟ ଷ୍ଟେସନ’ ଓ ୬ଟି ବଟାଲିୟନକୁ ‘ଜେନେରାଲ ଅଫିସର କମାଣ୍ଡିଂ-ଇନ୍-ଚିଫ ୟୁନିଟ୍ ଷ୍ଟେସନ’ ପ୍ରଦାନ କରାଯାଇଛି। ଏହା ଛଡା ଆସାମ ରାଇଫଲସର ଜବାନମାନଙ୍କ ମଧ୍ୟରୁ ଜଣକୁ ଶୌର୍ଯ୍ୟ ଚକ୍ର, ୮ ଜଣଙ୍କୁ ସେନା ମେଡାଲ ଓ ୪୦୦ଜଣଙ୍କୁ ରାଷ୍ଟ୍ରପତି ଏବଂ ଗଭର୍ଣ୍ଣର ମେଡାଲରେ ସମ୍ବର୍ଦ୍ଧିତ କରାଯାଇଛି। ଆସାମ ରାଇଫଲସ୍ କ୍ରିଡା କ୍ଷେତ୍ରରେ ମଧ୍ୟ ଉତ୍କୃଷ୍ଟ ପ୍ରଦର୍ଶନ କରିଛି। ୨୦୨୪-୨୫ରେ ଜାତୀୟ ସ୍ତରରେ ୨୫୪ଟି ପଦକ ପ୍ରାପ୍ତ କରିଥିବା ବେଳେ ଅନ୍ତର୍ଜାତୀୟ ସ୍ତରରେ ୨୧ଟି ପଦକ ହାସଲ କରିଛି।
