ନୂଆଦିଲ୍ଲୀ: କେନ୍ଦ୍ରର ମୋଦୀ ସରକାର ରାଷ୍ଟ୍ରୀୟ ଇସ୍ପାତ ନିଗମ ଲିମିଟେଡ୍ ପାଇଁ ଏକ ବଡ଼ ନିଷ୍ପତ୍ତି ନେଇଛନ୍ତି । କେନ୍ଦ୍ରୀୟ ମନ୍ତ୍ରିମଣ୍ଡଳ ରାଷ୍ଟ୍ରୀୟ ଇସ୍ପାତ ନିଗମ ଲିମିଟେଡ୍ ପାଇଁ ୧୧,୪୪୦ କୋଟି ଟଙ୍କାର ପୁନରୁଦ୍ଧାର ପ୍ୟାକେଜକୁ ମଞ୍ଜୁରି ଦେଇଛନ୍ତି । ଏ ବାବଦରେ ସୂଚନା ଦେଇ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି, ପ୍ରଧାନମନ୍ତ୍ରୀ ମୋଦୀ ରାଷ୍ଟ୍ରୀୟ ଇଷ୍ପାତ ନିଗମ ମିଲିଟେଡ୍ର ପୁନରୁଦ୍ଧାର ପାଇଁ ୧୧,୪୪୦ କୋଟି ଟଙ୍କାର ପ୍ୟାକେଜକୁ ମଞ୍ଜୁର କରିଛନ୍ତି । ଏହାଦ୍ୱାରା ରାଷ୍ଟ୍ରୀୟ ଇସ୍ପାତ ନିଗମ ଲିମିଟେଡ୍ର କାମରେ ସୁଧାର ଆସିବ । ପ୍ରଧାନମନ୍ତ୍ରୀ ମୋଦୀଙ୍କ ଆତ୍ମନିର୍ଭର ଭାରତ ସଂକଳ୍ପରେ କମ୍ପାନିର ଗୁରୁତ୍ୱପୂର୍ଣ୍ଣ ଭୂମିକା ରହିଛି ।
ଉଲ୍ଲେଖଯୋଗ୍ୟ ଯେ ରାଷ୍ଟ୍ରୀୟ ଇସ୍ପାତ ନିଗମ ମିଲିଟେଡ୍ କମ୍ପାନି ଋଣରେ ବୁଡ଼ି ରହିଛି । ଅନୁମାନ ଅନୁସାରେ ଏହି କମ୍ପାନି ଉପରେ ମୋଟ ୩୫ ହଜାର କୋଟି ଟଙ୍କାର ଋଣ ରହିଛି । ଏହି କମ୍ପାନି ଆନ୍ଧ୍ର ପ୍ରଦେଶର ବିଶାଖପାଟନମରେ ୭.୫ ମିଲିୟନ ଟନ୍ (ଏମଟି)ର ଇଣ୍ଟିଗ୍ରେଟେଡ୍ ଷ୍ଟିଲ୍ ପ୍ଲାଣ୍ଟ ପରିଚାଳନା କରୁଛି ।
ଆରଆଇଏନଏଲକୁ ଭାଇଜାକ୍ ଷ୍ଟିଲ୍ ପ୍ଲାଣ୍ଟ ନାଁରେ ମଧ୍ୟ ଜଣାଯାଏ । ଏହି କମ୍ପାନିର ପ୍ରତିଷ୍ଠା ପରଠୁ ଭାରତର ଷ୍ଟିଲ୍ ଉତ୍ପାଦନରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଆସୁଛି । ଗତ କିଛି ବର୍ଷରେ କମ୍ପାନି ବଢୁଥିବା ଋଣ, ପରିଚାଳନା ଏବଂ ବୈଶ୍ୱିକ ବଜାରରେ ସୃଷ୍ଟି ବାଧା ଯୋଗୁଁ ଆର୍ଥିକ ଆହ୍ୱାନର ସାମନା କରୁଛି । କେନ୍ଦ୍ର ସରକାରଙ୍କ ଏହି ନିଷ୍ପତ୍ତି ପରେ ପ୍ରାୟ ୩୫ ହଜାର କର୍ମଚାରୀଙ୍କ ଭବିଷ୍ୟତ ସୁରକ୍ଷିତ ହେବା ନେଇ ଆଶା କରାଯାଉଛି । ଏଥିରେ ବେତନଭୋଗୀ ଏବଂ ଠିକାରେ କାମ କରୁଥିବା କର୍ମଚାରୀ ସାମିଲ ଅଛନ୍ତି ।
