ଗୁଣୁପୁର: ରେଗେଇସିଂ ଗାଁ ନିକଟ ପାହାଡ଼ରୁ ଜଣେ ବ୍ୟକ୍ତି ମୃତ ଦେହ ଉଦ୍ଧାର ଘଟଣାରେ ନୂଆ ମୋଡ଼। ବ୍ୟକ୍ତିଙ୍କୁ ହତ୍ୟା କରିଥିଲା ତାଙ୍କ ପୁଅ। ଏନେଇ ବୁଧବାର ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଅତିରିକ୍ତ ଏସପି ଅମୂଲ୍ୟ ଧର। ସେ କହିଛନ୍ତି ଗୁଣି ଗାରେଡ଼ି ସନ୍ଦେହରେ ବାପାକୁ ତାଙ୍କ ପୁଅ ହତ୍ୟା କରିଥିଲା । ଏହି ମାମଲାରେ ତିନି ଜଣ ଗିରଫ ହୋଇଥିବା ସୂଚନା ଦେଇଛନ୍ତି ଏସପି। ଗତ ବର୍ଷ ଡିସେମ୍ବର ୧୮ ତାରିଖରେ ପାହାଡ଼ରୁ ମିଳିଥିଲା ମୃତ ଡାନିଏଲ ଶବରଙ୍କ ଶବ।
ସୂଚନାଥାଉକି, ଘଟଣାଦିନ ୫୦ ବର୍ଷୀୟ ଡାନିଏଲ ନିଜ ବାଡ଼ିକୁ ଲଙ୍କା ତୋଳିବାକୁ ଆଉ ଫେରିନଥିଲେ। ଘର ଲୋକ ଖୋଜିଖୋଜି କରି ବାଡ଼ିକୁ ଯାଇଥିଲେ । ସେଠାରେ ଡାନିଏଲଙ୍କ ମୃତଦେହ ପଡ଼ିଥିବା ଦେଖିବାକୁ ପାଇଥିଲେ । ଡାନିଏଲଙ୍କ ଗଳା ଓ ଗୋଡ଼ରେ ଧାରୁଆ ଅସ୍ତ୍ରରେ ଆକ୍ରମଣ କରାଯାଇଥିବା ଦେଖିବାକୁ ମିଳିଛି ।
ତାଙ୍କୁ କେହି ନିର୍ମମ ହତ୍ୟା କରିଥିବା ନେଇ ପରିବାର ପକ୍ଷରୁ ପୁଟାସିଂ ଥାନାରେ ଲିଖିତ ଅଭିଯୋଗ ହୋଇଥିଲା। ତେବେ ପୋଲିସ ମାମଲା ରୁଜୁ କରିବା ସହ ମୃତଦେହକୁ ଜବତ କରି ଅନୁସନ୍ଧାନ ଚଳାଇଥିଲା। ଆଉ ଶେଷରେ ପୁଅକୁ ଗିରଫ କରିଛି ପୋଲିସ।
