ବେଜିଂ ୧୭।୧: ଚୀନ୍ ଜନସଂଖ୍ୟା ୨୦୨୪ରେ ମଧ୍ୟ ହ୍ରାସ ହୋଇଛି, ଏହା ଲଗାତାର ତୃତୀୟ ହ୍ରାସ। ତେବେ ବିଶେଷଜ୍ଞଙ୍କ ଚେତାବନୀ ଏବେ ଚିନ୍ତାର କାରଣ ପାଲଟିଛି। ଆଗାମୀ ବର୍ଷମାନଙ୍କରେ ଏହି ହ୍ରାସ ଆହୁରି ବୃଦ୍ଧିପାଇପାରେ ବୋଲି ସେମାନେ ଚେତାଇ ଦେଇଛନ୍ତି। ଜନସଂଖ୍ୟାରେ ଏପରି ହ୍ରାସ ଏବେ ଚୀନ୍ ଅର୍ଥବ୍ୟବସ୍ଥା ଓ ସରକାରଙ୍କ ନିମନ୍ତେ ଏକ ମସ୍ତବଡ଼ ଆହ୍ୱାନ ପାଲଟିଛି। କେବଳ ଚୀନ୍ ନୁହେଁ ଜାପାନ, ଦକ୍ଷିଣକୋରିଆ ଓ ଇଟାଲୀ ଭଳି ଦେଶମାନଙ୍କରେ ମଧ୍ୟ ଜନସଂଖ୍ୟା ହ୍ରାସ ସାଙ୍ଗକୁ ବୃଦ୍ଧଙ୍କ ସଂଖ୍ୟା ବୃଦ୍ଧି ଚିନ୍ତାର କାରଣ ପାଲଟିଛି।
ଏପରି ଜନସଂଖ୍ୟା ହ୍ରାସର ମୁଖ୍ୟକାରଣ ହେଉଛନ୍ତି ଯୁବ ପିଢୀ । ସେମାନେ ଏବେ କମ୍ ସନ୍ତାନ ଉତ୍ପାଦନ ବିକଳ୍ପକୁ ଆପଣେଇ ନେଇଛନ୍ତି। ଅପରପଟେ ସ୍ୱାସ୍ଥ୍ୟା ସେବାରେ ସୁଧାର ଆୟୁ ବୃଦ୍ଧିର କାରଣ ହୋଇଛି। ଚୀନ୍ ଜାତୀୟ ଷ୍ଟାଟିଷ୍ଟିକ୍ସ ବ୍ୟୁରୋଙ୍କ ଅନୁସାରେ ୨୦୨୪ରେ ଚୀନ ଜନସଂଖ୍ୟା ପାଖାପାଖି ୧୪ଲକ୍ଷ ହ୍ରାସ ହୋଇ ମୋଟ ୨.୪୦୮ ବିଲିୟନ ହୋଇଯାଇଛି। ଶୁକ୍ରବାର ଏହି ତଥ୍ୟ ଆସିବା ପରେ ଏହା ଏବେ ଚିନ୍ତାର ବିଷୟ ପାଲଟିଛି। ଶ୍ରମିକ ଓ ଖାଉଟିଙ୍କ ସଂଖ୍ୟା ହ୍ରାସ କାରଣରୁ ବିଶ୍ୱରେ ଦ୍ୱିତୀୟ ସର୍ବ ବୃହତ୍ତ ଅର୍ଥନୀତି ପାଲଟିଥିବା ଚୀନକୁ ସଂଘର୍ଷ କରିବାକୁ ପଡିବ ବୋଲି ଅନୁମାନ କରାଯାଉଛି।
କେବଳ ଦେଶରେ ଜନସଂଖ୍ୟା ହ୍ରାସ ହେଉ ନାହିଁ ବୟଷ୍କ ନାଗରିକଙ୍କ ଦେଖାଶୁଣା ଖର୍ଚ୍ଚ ମଧ୍ୟ ବଢିବାରେ ଲାଗିଛି। ଏଣୁ ସେବା ନିବୃତ୍ତି ଲାଭର ବୋଝ ପୂର୍ବରୁ ଋଣରେ ଥିବା ସ୍ଥାନୀୟ ସରକାରଙ୍କ ଉପରେ ଅତିରିକ୍ତ ଚାପ ପକାଇବ ବୋଲି ଅନୁମାନ କରାଗଲାଣି। ଜାପାନ ଜନସଂଖ୍ୟା ଗତ ୧୫ ବର୍ଷ ହେଲା ହ୍ରାସ ହେବାରେ ଲାଗିଛି। ତେବେ ଦକ୍ଷିଣ କୋରିଆରେ ଏପରି ନକରାତ୍ମକ ପରିଣାମ ୨୦୨୧ରୁ ଆସିବା ଆରମ୍ଭ ହୋଇଛି। ସେହିପରି ଇଟାଲୀରେ ଉନବିଂଶ ଶତାବ୍ଦୀ ଆରମ୍ଭ ପରେ ଦ୍ୱିତୀୟବାର ଜନ୍ମହାର ୪ଲକ୍ଷରୁ ତଳକୁ ହ୍ରାସ ହୋଇଛି।
