ନୂଆଦିଲ୍ଲୀ: ମଣିପୁର ଆକାଶରେ ଅଶାନ୍ତିର କଳାବାଦଲ ଛାଇଯାଇଛି । ରାଜ୍ୟରେ ହିଂସାକୁ ନେଇ ରାଜନୀତି ଗରମ ହୋଇଛି । ହିଂସା ସହିତ ରାଜନୈତିକ ଆରୋପ-ପ୍ରତ୍ୟାରୋପ ଚରମ ସ୍ତରରେ ପହଞ୍ଚିଛି । ମଣିପୁର ପ୍ରସଂଗକୁ ନେଇ ବିରୋଧୀ ପାର୍ଟିମାନେ କେନ୍ଦ୍ରଙ୍କୁ ଟାର୍ଗେଟ୍ କରୁଛନ୍ତି । ଏପଟେ ହିଂସା ଉପରେ ବ୍ରେକ୍ ଲଗାଇବାକୁ କେନ୍ଦ୍ର ସରକାର ଏବେ ଆକ୍ସନକୁ ଆସିଛି । ଶନିବାର ମଣିପୁର ବିବାଦକୁ ନେଇ କେନ୍ଦ୍ର ମୈତେଇ ଓ କୁକି ସମୁଦାୟର ପ୍ରତିନିଧିମାନଙ୍କ ସହିତ ଗୁରୁତ୍ବପୂର୍ଣ୍ଣ ବୈଠକ କରିଛନ୍ତି । ରାଜ୍ୟ ଆଇନ ଶୃଙ୍ଖଳା ବ୍ୟବସ୍ଥା ବଜାୟ ରଖିବାକୁ ଦୁଇ ପକ୍ଷକୁ ପରମର୍ଶ ଦେଇଛନ୍ତି ।
ବୈଠକରେ କିଏ କିଏ ସାମିଲ୍ ?
ଏହି ମିଟିଂରେ ଅଲ୍ ମଣିପୁର ୟୁନାଇଟେଡ୍ କ୍ଲବ୍ସ ଅର୍ଗାନାଇଜେସନ ଏବଂ ଫେଡେରସନ ଅଫ୍ ସିଭିଲ୍ ସୋସାଇଟ୍ ଅର୍ଗାନାଇଜେସନର ପ୍ରତିନିଧିମଣ୍ଡଳ ଭାଗ ନେଇଛନ୍ତି । କୁକି ସମୁଦାୟର ୯ଜଣ ପ୍ରତିନିଧି ସାମିଲ୍ ଅଛନ୍ତି । କେନ୍ଦ୍ର ସରକାରଙ୍କ ପକ୍ଷରୁ ଗୁଇନ୍ଦା ବିଭାଗର ଅବସର ପ୍ରାପ୍ତ ନିର୍ଦ୍ଦେଶକ ଏକ. ମିଶ୍ରା ବୈଠକରେ ଉପସ୍ଥିତ ରହିଛନ୍ତି ।
ଗୁରୁବାର ଲୋକସଭାରେ ମଣିପୁର ହିଂସା ପ୍ରସଂଗରେ ବିତର୍କ ହୋଇଥିଲା । ଏଥିରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ କହିଥିଲେ, କେନ୍ଦ୍ର ସରକାର ପୂର୍ବରୁ ମୈତେଇ ଓ କୁକି ସମୁଦାୟର ପ୍ରତିନିଧିମାନଙ୍କ ସହିତ ଆଲୋଚନା କରିଥିଲେ । ଉଭୟ ପକ୍ଷର ବିଭିନ୍ନ ସଂଗଠନ ସହିତ ସରକାରଙ୍କ ପୃଥକ ପୃଥକ ବୈଠକ ହୋଇଛି ।
ଏହାଛଡ଼ା ଗୃହ ମନ୍ତ୍ରୀ କହିଥିଲେ, ଦୁଇ ସମୁଦାୟକୁ ନେଇ ଏକ ସଂଯୁକ୍ତ ବୈଠକ ବସିବ । କେନ୍ଦ୍ର ସରକାର ଏଥିରେ ହିଂସା ସମାପ୍ତ କରିବା ପାଇଁ ରାସ୍ତା ବାହାର କରିବେ । ମିଟିଂରେ ରାଜ୍ୟରେ ଶାନ୍ତି ପ୍ରତିଷ୍ଠା କରିବା ସର୍ବୋଚ୍ଚ ପ୍ରାଥମିକତା ରହିବ ବୋଲି ଅମିତ ଶାହ କହିଥିଲେ । ଗତ ୪ମାସକୁ ଦେଖିଲେ, ମଣିପୁରରେ ହିଂସା ସର୍ବାଧିକ ନିୟନ୍ତ୍ରଣ ଆସିଛି । ଏହି ସମୟରେ ଗୋଟିଏ ବି ହତ୍ୟା ହୋଇନାହିଁ ।
ଫେବ୍ରୁଆରୀ ୧୩ ତାରିଖରୁ ରାଜ୍ୟରେ ରାଷ୍ଟ୍ରପତି ଶାସନ ଲାଗୁ:
ଫେବ୍ରୁଆରୀ ୯ ତାରିଖରେ ମଣିପୁର ମୁଖ୍ୟମନ୍ତ୍ରୀ ଏନ୍ ବିରେନ ସିଂହ ଇସ୍ତଫା ଦେଇଥିଲେ । ଏହା ପରେ ଅର୍ଥାତ୍ ଫେବ୍ରୁଆରୀ ୧୩ରୁ ରାଜ୍ୟରେ ରାଷ୍ଟ୍ରପତି ଶାସନ ଲାଗୁ ହୋଇଛି । ସୂଚନା ୨୦୨୩ ମେ’ରେ ଇମ୍ଫାଲ ଘାଟିରେ ରହୁଥିବା ମୈତେଇ ଓ ପାହାଡି ଅଞ୍ଚଳରେ ରହୁଥିବା କୁକି ସମୁଦାୟ ମଧ୍ୟରେ ହିଂସା ସୃଷ୍ଟି ହୋଇଥିଲା । ଏଥିରେ ପ୍ରାୟ ୨୬୦ ଲୋକ ପ୍ରାଣ ହରାଇଥିବା ବେଳେ ଅନେକ ଲୋକ ଆହତ ହୋଇଛନ୍ତି । ସେହିପରି ଶତାଧିକ ଲୋକ ବେଘର ହୋଇଛନ୍ତି । ଏବେ ରାଜ୍ୟରେ ଶାନ୍ତି ସ୍ଥାପନା ପାଇଁ କେନ୍ଦ୍ର ସରକାର ଲାଗିପଡ଼ିଛନ୍ତି ।
