ଦୁବାଇ: ଆଇସିସି ଚାମ୍ପିଅନ୍ସ ଟ୍ରଫିରେ ସନଡେ’ ବିଗ୍ ଫାଇଟ୍ । ଦୁଲୁକୁଛି ଦୁବାଇ ଗ୍ରାଉଣ୍ଡ, ମୁହାଁମୁହିଁ ଦୁଇ ପାରମ୍ପରିକ ପ୍ରତିଦ୍ବନ୍ଦୀ । ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଛି ପାକିସ୍ତାନ । ତେଣୁ ପ୍ରଥମେ ବୋଲିଂ କରିବ ଟିମ୍ ଇଣ୍ଡିଆ । ୧୬ ମାସ ପରେ ଦିନିକିଆ ଫର୍ମାଟରେ ଦେଖିବାକୁ ମିଳିବ ମହାଲଢ଼େଇ । ଏହି ମ୍ୟାଚ୍କୁ ନେଇ କ୍ରିକେଟ୍ ପ୍ରେମୀଙ୍କ ମଧ୍ୟରେ ଉତ୍ସୁକତା ବଡ଼ିବାରେ ଲାଗିଛି ।
ଟିମ୍ ରିଜଓ୍ବାନକୁ ମାତ୍ ଦେବାକୁ ରୋହିତ ସେନା ନୂଆ ରଣନୀତି ପ୍ରସ୍ତୁତ କରିଛି । ଟିମ୍ ଇଣ୍ଡିଆ ଆଜି ବିଜୟୀ ହେଲେ ସିଧା ସେମି ଫାଇନାଲରେ ପ୍ରବେଶ କରିବ । ମାତ୍ର ପାକିସ୍ତାନ ପାଇଁ କଠିନ ସମୟ । ଆଜିର ମ୍ୟାଚ୍ ‘କର ବା ମର’ ପରିସ୍ଥିତି ସୃଷ୍ଟି କରିଛି । ନ୍ୟୁଜିଲାଣ୍ଡ ବିପକ୍ଷରେ ପ୍ରଥମ ମ୍ୟାଚ୍ ହାରି ସାରିଥିବା ପାକ୍ ଦଳ ଆଉ ଗୋଟିଏ ମ୍ୟାଚ୍ ହାରିଲେ ଟାଇଟଲ ଦୌଡ଼ରୁ ବାଦ୍ ପଡ଼ିବ । ଭାରତ ବିପକ୍ଷରେ ପାକିସ୍ତାନର ରେକର୍ଡ ଭଲ ରହିଛି । ଉଭୟ ଦଳ ଚାମ୍ପିଅନ୍ସ ଟ୍ରଫିରେ ପରସ୍ପରକୁ ୫ଥର ଭେଟିଛନ୍ତି । ଏଥିରୁ ପାକିସ୍ତାନ ୩ଟି ମ୍ୟାଚ୍ ଜିତିଥିବା ବେଳେ ଭାରତକୁ ୨ଥର ବିଜୟ ମିଳିଛି ।
୨୦୧୭ ସଂସ୍କରଣର ଫାଇନାଲ୍ ପରାଜୟକୁ ଭୁଲି ନାହିଁ ଭାରତ । ପାକିସ୍ତାନର କ୍ଷମତା ସହ ବେଶ୍ ଭଲ ଭାବେ ପରିଚିତ ଟିମ୍ ଇଣ୍ଡିଆ । ତେଣୁ ଆଜିର ମ୍ୟାଚ୍କୁ ହାଲକାରେ ନେବ ନାହିଁ ଦଳ । ପାକିସ୍ତାନକୁ ହରାଇ ୮ବର୍ଷ ତଳର ପରାଜୟର ପ୍ରତିଶୋଧ ନେବାକୁ ଦଳ ପ୍ରୟାସ କରିବ । ସୁପର ସନଡେ’ ମ୍ୟାଚରେ ସମସ୍ତଙ୍କ ନଜର ଶୁଭମନ ଗିଲ୍ଙ୍କ ଉପରେ ରହିବ । ବାଂଲାଦେଶ ବିପକ୍ଷରେ ସେ ମ୍ୟାଚରେ ବିଜୟୀ ଶତକ ମାରିଥିଲେ ସେ । ଦିନିକିଆ ଫର୍ମାଟରେ ଟପ୍ ଫର୍ମରେ ରହି ଶୀର୍ଷ ମାନ୍ୟତା ପ୍ରାପ୍ତ କରିଥିବା ବ୍ୟାଟରଙ୍କ ଠାରୁ ଆଉ ଏକ ବଡ଼ ଇନିଂସର ଆଶା ରଖିବେ କ୍ରିକେଟ୍ ପ୍ରେମୀ ।
