ନୂଆଦିଲ୍ଲୀ: ୧୮/୦୧: ହମାସ-ଇସ୍ରାଏଲ ଯୁଦ୍ଧରେ ପଡ଼ିବ ଯବନିକା । ଅସ୍ତ୍ର ରାଜିନାମାରେ ସ୍ବାକ୍ଷର କରିଛି ଇସ୍ରାଏଲ । ଜାନୁଆରୀ ୧୯ ତାରିଖ ଅର୍ଥାତ୍ ରବିବାରଠୁ ଦୁଇ ଦେଶ ମଧ୍ୟରେ ଯୁଦ୍ଧବିରତି ଲାଗୁ ହେବ । ଶୁକ୍ରବାର ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ଅଧ୍ୟକ୍ଷତାରେ ବସିଥିବା ଦେଶ ସୁରକ୍ଷା ସମ୍ପର୍କିତ କ୍ୟାବିନେଟରେ ରାଜିନାମାକୁ ସହମତି ମିଳିଛି । ଏହି ଯୁଦ୍ଧବିରତି ୪୨ ଦିନ ଯାଏ କାଏମ ରହିବ । ଏପଟେ ହମାସ କବଳରେ ଥିବା ଇସ୍ରାଏଲ ପଣବନ୍ଦୀ ମୁକୁଳିବେ ।
ଆସନ୍ତା ୧୯ ତାରିଖ ଅର୍ଥାତ୍ ରବିବାରଠୁ ଏହା ଲାଗୁ ହେବ । ଗୁରୁବାର ଯୁଦ୍ଧବିରତି ଚୁକ୍ତି ପ୍ରସ୍ତାବରେ ଉପରେ ସ୍ବାକ୍ଷର ନେଇ ପ୍ରଥମେ ସ୍ଥିର ହୋଇଥିଲା । ହେଲେ ହମାସ ନୂଆ ଦାବି ଉଠାଇ ଯୁଦ୍ଧବିରତି ପ୍ରସ୍ତାବରୁ ପଛକୁ ଓହରବା ନେଇ ଇସ୍ରାଏଲ ପ୍ରଧାନମନ୍ତ୍ରୀ ଅଭିଯୋଗ କରିଥିଲେ । ମାତ୍ର ବେଞ୍ଚାମିନ୍ ନେତାନ୍ୟାହୁଙ୍କ ଅଭିଯୋଗକୁ ଖଣ୍ତନ କରିଛି ହମାସ । ସେପଟେ ଗାଜା ସିଟିର ବିଭିନ୍ନ ସ୍ଥାନରେ ଇସ୍ରାଏଲ ସେନା ପ୍ରଚଣ୍ଡ ଆକ୍ରମଣ କରିବାରୁ ୮୦ରୁ ଅଧିକ ଲୋକଙ୍କ ମୃତ୍ୟୁ ଘଟିଥିଲା । ଉଭୟ ପକ୍ଷ ମଧ୍ୟରେ ହୋଇଥିବା ରାଜିନାମା ଅନୁସାରେ ପ୍ରଥମ ପର୍ଯ୍ୟାୟରେ ହମାସ ୩୩ ଜଣ ପଣବନ୍ଦୀଙ୍କୁ ଛାଡିବ । ସେମାନଙ୍କ ଭିତରେ ୫ଜଣ ମହିଳା ସୈନିକ ରହିଛନ୍ତି । ଏହି ୫ ମହିଳା ସୈନିକଙ୍କ ବଦଳରେ ଇସ୍ରାଏଲ ୨୫୦ ଜଣ ପାଲେଷ୍ଟିନୀୟ ବନ୍ଦୀଙ୍କୁ ମୁକ୍ତ କରିବ । ହମାସ ନିକଟରେ ବର୍ତ୍ତମାନ ସମୟରେ ୯୪ ଜଣ ଇସ୍ରାଏଲୀ ପଣବନ୍ଦୀ ଅଛନ୍ତି ।
ଇସ୍ରାଏଲ-ହମାସ ମଧ୍ୟରେ ଯୁଦ୍ଧବିରତି ୪୨ ଦିନ ପାଇଁ କାଏମ ରହିବ । ପରବର୍ତ୍ତୀ ସମୟରେ ସ୍ଥାୟୀ ଯୁଦ୍ଧବିରତି ନେଇ ଆଲୋଚନା ହେବ । ଉଭୟ ଦେଶର ସୀମାରେ ବଫର ଜୋନ ପ୍ରତିଷ୍ଠା ହେବ । ଅନ୍ୟପକ୍ଷରେ ହମାସ ସହ ହୋଇଥିବା ଯୁଦ୍ଧବିରତି ରାଜିନାମାକୁ ପ୍ରତିରକ୍ଷା ମନ୍ତ୍ରୀ ବେନ-ଗ୍ୱିର ଇତାମାର ବିରୋଧ କରିଛନ୍ତି । ସେ ହମାସ ସହ ବୁଝାମଣାକୁ ଭୁଲ ବୋଲି ଦର୍ଶାଇ ନେତନ୍ୟାହୁଙ୍କ ସରକାରରୁ ସମର୍ଥନ ପ୍ରତ୍ୟାହାର କରିବାକୁ ଧମକ ଦେଇଛନ୍ତି । ସେ କହିଛନ୍ତି, ତାଙ୍କ ଓତ୍ୟୋଜ୍ମା ୟେହୁଦିତ ପାର୍ଟି ନେତନ୍ୟାହୁଙ୍କ ଲିକୁଡ ପାର୍ଟି ଠାରୁ ସମର୍ଥନ ପ୍ରତ୍ୟାହାର କରିନେବ ।
