ରାଇରଙ୍ଗପୁର ୩୧/୧: ଲୋକପ୍ରିୟ ଟିଭି ସୋ KBC(କୋନ୍ ବନେଗା କରୋଡପତି)ରେ ଓଡ଼ିଆ ଝିଅ କରିସ୍ମାଙ୍କ କମାଲ୍ । କେବିସିରେ ସଠିକ ଉତ୍ତର ଦେଇ ୧୨ ଲକ୍ଷ ୫୦ ହଜାର ଟଙ୍କା ଜିତିଛନ୍ତି କରିସ୍ମା । ଏହି ସଫଳତା ହାସଲ କରିଛନ୍ତି ମୟୁରଭଞ୍ଜ ଜିଲ୍ଲା ରାଇରଙ୍ଗପୁରର ବିଶିଷ୍ଟ ବ୍ୟବସାୟୀ ବିଜୟ ଶର୍ମା ଓ କାନ୍ତିଦେବୀ ଶର୍ମାଙ୍କ ଝିଅ କରିସ୍ମା । କରିସ୍ମାଙ୍କ ସଫଳତା ଓଡ଼ିଶାକୁ ଅଧିକ ଗର୍ବିତ କରିଛି ।
ସୋନି ଟିଭିରେ ପ୍ରସାରିତ ଲୋକପ୍ରିୟ ରିୟଲିଟି ସୋ କେବିସିରେ ସାଢେ ୧୨ ଲକ୍ଷ ଟଙ୍କା ଜିତିଛନ୍ତି କରିସ୍ମା । ଗତ ୨୩ ତାରିଖ ଓ ୨୭ ତାରିଖ ପ୍ରସାରିତ ହୋଇଥିଲା ଏପିସୋଡ୍ । ବଲିଉଡର ବାଦଶାହ ଅମିତାଭ ବଚ୍ଚନଙ୍କ ସହ ହଟ୍ ସିଟ୍ରେ ବସିଥିଲେ ରାଇରଙ୍ଗପୁରର ଝିଅ କରିସ୍ମା । କାର୍ଯ୍ୟକ୍ରମରେ ଉପସ୍ଥିତ ରହି କରିସ୍ମାଙ୍କ ପରିବାର ଲୋକ ତାଙ୍କ ଉତ୍ସାହକୁ ଦ୍ବିଗୁଣିତ କରିଥିଲେ । ଅମିତାଭଙ୍କ ଗୋଟିଏ ପରେ ଗୋଟିଏ ପ୍ରଶ୍ନର ଉତ୍ତର ଦେଇଥିଲେ କରିସ୍ମା । ଆଉ ଶେଷରେ ୧୨ ଲକ୍ଷ ୫୦ ହଜାର ଟଙ୍କା ପୁରସ୍କାର ଜିତିନେଇଥିଲେ ।
ଅମିତାଭଙ୍କ ପରି ବ୍ୟକ୍ତିତ୍ବଙ୍କ ସାମ୍ନାରେ ହଟ୍ ସିଟ୍ରେ ବସିବା ତାଙ୍କ ପାଇଁ ଅବିଶ୍ବସନୀୟ ଓ ସ୍ବପ୍ନ ଥିବା ସେ କହିଛନ୍ତି । କେବିସି ସିଜନ ସରିବା ପରେ ଅମିତାଭ ବଚ୍ଚନଙ୍କ ଦ୍ବାରା ଆୟୋଜିତ ଭୋଜିରେ ପରିବାର ଲୋକଙ୍କ ସହ ନିୟନ୍ତ୍ରିତ ପ୍ରତିଯୋଗୀ ଭାବରେ ଯୋଗ ଦେବେ କରିସ୍ମା । କରିସ୍ମାଙ୍କ ଏହି ସଫଳତା ପାଇଁ ତାଙ୍କୁ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟୁଛି । ପିଲାଟି ଦିନରୁ ବେଶ ମେଧାବୀ ଛାତ୍ରୀ ଭାବରେ ବିଭିନ୍ନ ପ୍ରତିଯୋଗିତାରେ ସଫଳତା ହାସଲ କରିଛନ୍ତି କରିସ୍ମା । ଏବେ କରିସ୍ମା ଭାରତୀୟ ପ୍ରଶାସନିକ ସେବା ପରୀକ୍ଷା ପାଇଁ ପ୍ରସ୍ତୁତି ଚଳାଇଛନ୍ତି ।
