ନୂଆଦିଲ୍ଲୀ ୧୭/୦୨ : ମହାକାଶରେ ସାଟେଲାଇଟ୍ ଯୁଦ୍ଧ ! କୋଲାପ୍ସ ହେବ କୃତ୍ରିମ ଉପଗ୍ରହ । କାମ କରିବନି ସାଟେସାଇଟ୍ ସିଷ୍ଟମ । ନାଭିଗେସନ୍, ନିରୀକ୍ଷଣ ଓ ଯୋଗାଯୋଗ ବିଚ୍ଛିନ୍ନ ! ଅଧାରୁ ଅଟକି ଯିବ ଗୁଗୁଲ୍ ମ୍ୟାପ୍ । ମିଳିବନି ଜରୁରୀ ସୂଚନା । ହଁ ଆଜ୍ଞା ! ଏଭଳି କିଛି ହେବାକୁ ଯାଉଛି। ଏକଥା ଆମେ କହୁନାହିୁଁ, ଏପରି ଆଶଙ୍କା କରିଛି ହ୍ବାଇଟ୍ ହାଉସ୍ । ଋଷ୍ ମୋଷ୍ଟ୍ ପାଓ୍ବାରଫୁଲ୍ ହେବାକୁ ମହାକାଶରେ ମାୟା ଜାଲ ବିଛାଉଥିବା ଆମେରିକା ସ୍ପଷ୍ଟ କରିଛି । ମହାକାଶରେ ସାଟେଲାଇଟ୍ ସିଷ୍ଟମକୁ କୋଲାପ୍ସ କରି ସର୍ବଶକ୍ତିମାନ ହେବାକୁ ମସ୍କୋ ପ୍ରସ୍ତୁତି କରିଛି ବ୍ଲୁ-ପ୍ରିଣ୍ଟ୍ । ଏଥିପାଇଁ ଋଷ୍ ଆଣ୍ଟି ସାଟେଲାଇଟ୍ ଅସ୍ତ୍ର ବିକାଶିତ କରୁଛି ।
ରୁଷିଆ ନିର୍ମାଣ କରୁଛି ଆଣ୍ଟି ସାଟେଲାଇଟ୍ ଅସ୍ତ୍ର । ଏହି ଅସ୍ତ୍ର କୃତ୍ରିମ ଉପଗ୍ରହକୁ ଟାର୍ଗେଟ୍ କରିବ । ମହାକାଶରେ ଆକ୍ରମଣ କରି ଖସାଇ ଶତ୍ରୁ ଦେଶର ସାଟେଲାଇଟ୍କୁ ଖସାଇ ଦେବ । ଫଳରେ ଯୋଗାଯୋଗ, ନାଭିଗେସନ, ନିରୀକ୍ଷଣ ଆଦି ଅନେକ ସୁବିଧା ଅଚଳ ହୋଇଯିବ । ବିଶେଷ କରି ପ୍ରତିରକ୍ଷା ବିଭାଗ ପ୍ରଭାବିତ ହେବ । ନାଭିଗେସନ ଫେଲ୍ ହେବା ଫଳରେ କାମ କରିବନି ମିସାଇଲ୍ ଓ ଆଣ୍ଟି ମିସାଇଲ୍ ସିଷ୍ଟମ୍ । ମହାସମୁଦ୍ରରେ ଦିଗ ହରା ହେବ ଜଳସେନାର ଯୁଦ୍ଧଜାହାଜ । ଟାର୍ଗେଟକୁ ହିଟ୍ କରିବାରେ ବିଫଳ ହେବ ଫାଇଟର ଜେଟ୍ । ମସ୍କୋର ଏହି ଅସ୍ତ୍ରକୁ ନେଇ ଏଭଳି କିଛି ଦାବି କରିଛି ଆମେରିକା । ହ୍ୱାଇଟ୍ ହାଉସ୍ର ଜଣେ ଅଧିକାରୀ କହିଛନ୍ତି, ରୁଷ୍ର ଏହି ଅସ୍ତ୍ର ଆମେରିକାର ସାଟେଲାଇଟ୍ ନେଟ୍ୱର୍କକୁ ନଷ୍ଟ କରିବାକୁ ଡିଜାଇନ କରାଯାଇଛି । ଏଭଳି ଅସ୍ତ୍ରର ମୁକାବିଲା କରିବା ଓ ନିଜ ଉପଗ୍ରହକୁ ସୁରକ୍ଷା ଦେବାରେ ଅକ୍ଷମ ଆମେରିକା । ଯାହା ଜୋ ବାଇଡେନଙ୍କ ମୁଣ୍ଡ ବିନ୍ଧା ବଢ଼ାଇ ଦେଇଛି ।
ମାତ୍ର ହ୍ବାଇଟ୍ ହାଉସର ଏଭଳି ଦାବିକୁ ଖଣ୍ଡନ କରି ମସ୍କୋ । ରୁଷ୍ ଉପ-ବିଦେଶ ମନ୍ତ୍ରୀ ସର୍ଗେଇ ରୟାବକୋଭ ଆମେରିକାର ଏହି ଦାବି କପୋଳକଳ୍ପିତ କହିଛନ୍ତି । ଏହାକୁ ମନଗଢ଼ା କାହାଣି ବୋଲି ଦର୍ଶାଇଛନ୍ତି । ସେହିପରି ରୁଷ୍ ରାଷ୍ଟ୍ରପତି ଭବନ କ୍ରେମ୍ଲିନ୍ର ମୁଖପାତ୍ର ଦିମିତ୍ରି ପେସ୍କୋଭ କହିଛନ୍ତି, ଆମେରିକା ଯେ ପର୍ଯ୍ୟନ୍ତ ଏ ସଂକ୍ରାନ୍ତ ସମ୍ପୂର୍ଣ୍ଣ ତଥ୍ୟ ଜାରି ନ କରିଛି, ସେ ଯାଏ କୌଣସି ଟିପ୍ପଣୀ ଦିଆଯିବ ନାହିଁ । ସେପଟେ ଆମେରିକାର ସେନା ଅଧିକାରୀ ଚେତାବନୀ ଦେଇଛନ୍ତି, ଉଭୟ ରୁଷ୍ ଏବଂ ଚୀନ୍ ମହାକାଶକୁ ସାମରିକ ଭୂମି ବନାଇବା ଦିଗରେ ଆଗକୁ ବଢ଼ୁଛନ୍ତି ।
ମହାକାଶରେ ଅସ୍ତ୍ରଶସ୍ତ୍ର ମୁତୟନ କରିବା ଉଦ୍ୟମ ୫୦ ବର୍ଷ ପୁରୁଣା । ଏହି ଉଦ୍ୟମକୁ ରୋକିବା ପାଇଁ ୧୯୬୭ରେ ଆଉଟର୍ ସ୍ପେସ୍ ଟ୍ରିଟି ସ୍ୱାକ୍ଷରିତ ହୋଇଥିଲା । ଏହା ମୁତାବକ ମହାକାଶର କକ୍ଷରେ ପରମାଣୁ ଅସ୍ତ୍ରଶସ୍ତ୍ର ମୁତୟନ କରାଯାଇ ପାରିବ ନାହିଁ । ସେହିଭଳି ୨୦୨୨ ଏପ୍ରିଲରେ ଆମେରିକା ପ୍ରଥମ ଦେଶ ଭାବେ ମିସାଇଲ ଦ୍ୱାରା ସାଟେଲାଇଟ୍କୁ ଖସାଇବା ଉପରେ ପ୍ରତିବନ୍ଧକ ଲଗାଇଥିଲା ।
