ନୂଆଦିଲ୍ଲୀ ୧୨।୬: ଭାରତୀୟ ରାଜନୀତି ଓ ମାର୍କସବାଦୀ କମ୍ୟୁନିଷ୍ଟ ପାର୍ଟିର ମୁଖ୍ୟ ନେତା ସୀତାରାମ ୟେଚୁରୀଙ୍କର ଗୁରୁବାର ଅପରାହ୍ନ ୩ଟା ୫ ମିନିଟରେ ପରଲୋକ ହୋଇଛି। ପରଲୋକ ବେଳକୁ ତାଙ୍କୁ ୭୨ ବର୍ଷ ବୟସ ହୋଇଥିଲା ଓ ତାଙ୍କୁ ଗତ ଅଗଷ୍ଟ ୧୯ ତାରିଖ ଦିନ ଅସୁସ୍ଥତା କାରଣରୁ ଅଖିଳ ଭାରତୀୟ ଆୟୁର୍ବିଜ୍ଞାନ ସଂସ୍ଥାନ (ଏମସ୍)ରେ ଭର୍ତ୍ତି କରାଯାଇଥିଲା। ତାଙ୍କ ପରିବାର ୟେଚୁରୀଙ୍କ ଶରୀରକୁ ଶିକ୍ଷା ଓ ଗବେଷଣା ଉଦ୍ଦେଶ୍ୟରେ ଏମସ୍କୁ ଦାନ କରିଦେଇଛନ୍ତି।
ୟେଚୁରୀ ଦୀର୍ଘ ସମୟରୁ ଅସୁସ୍ଥ ଥିଲେ। ସେ ଜୀବିତାବସ୍ଥାରେ ତାଙ୍କ ସ୍ୱାସ୍ଥ୍ୟ ସମ୍ପର୍କିତ ସମସ୍ୟା ନେଇ ଖୋଲାଖୋଲି କହିଥିଲେ, ଯେଉଁଥିରେ ସେ ଟାଇପ-୨ ଡାୟବେଟିଜ୍ ଓ ଉଚ୍ଚ ରକ୍ତଚାପ ସମ୍ପର୍କିତ ଚିକିତ୍ସା ବିଷୟରେ କହିଥିଲେ। ଏତେ ସବୁ ସ୍ୱାସ୍ଥ୍ୟଗତ ସମସ୍ୟା ସତ୍ତ୍ୱେ ସେ ତାଙ୍କ କାମ ପ୍ରତି ସଂକଳ୍ପବଦ୍ଧ ରହିବା ସହ ଭାରତୀୟ ରାଜନୀତିରେ ଜଣେ ପ୍ରଭାବଶାଳୀ ବ୍ୟକ୍ତି ହୋଇ ରହିଥିଲେ। ସୀତାରାମ ୟେଚୁରୀ ୭୦ ଦଶକରେ ତାଙ୍କ ରାଜନୈତିକ ଜୀବନ ଆରମ୍ଭ କରିଥିଲେ।
ସେ ମାର୍କସବାଦୀ କମ୍ୟୁନିଷ୍ଟ ପାର୍ଟିର ବିଭିନ୍ନ ପଦପଦବୀରେ ଥିଲେ। ୨୦୧୫ ମସିହାରେ ତାଙ୍କୁ ପାର୍ଟି ସାଧାରଣ ସମ୍ପାଦକ କରାଯାଇଥିଲା। ସେ ସଂସଦରେ ମଧ୍ୟ ଗୁରୁତ୍ୱପୂର୍ଣ୍ଣ ପଦପଦବୀରେ କାର୍ଯ୍ୟ କରିଛନ୍ତି, ଯେଉଁଥିରେ ସେ ରାଜ୍ୟସଭା ସଦସ୍ୟ ଭାବେ କାମ କରିବା ମଧ୍ୟ ସାମିଲ। ସେ ବିଭିନ୍ନ ସାମାଜିକ ଓ ଆର୍ଥିକ ପ୍ରସଙ୍ଗରେ ମଧ୍ୟ କାମ କରିଛନ୍ତି ଓ ଜଣେ ପ୍ରଭାବଶାଳୀ ନେତାଭାବେ ଗଣ୍ୟ ହେଉଥିଲେ। ଶରୀର ଦାନ ଏକ ନିଶ୍ୱାର୍ଥ ଦାନ, ଯାହା ସ୍ୱାସ୍ଥ୍ୟ ସେବା ଓ ଚିକିତ୍ସା ପ୍ରଗତିର ଭବିଷ୍ୟକୁ ଲାଭାନ୍ୱିତ କରିଥାଏ।
ଡାକ୍ତରୀ ଛାତ୍ର ଓ ପେଷାଦାରମାନେ ଦାନ କରାଯାଇଥିବା ଶରୀରକୁ ମାନବ ଶରୀର ରଚନା ବିସ୍ତାରପୂର୍ବକ ଅଧ୍ୟୟନ ନିମନ୍ତେ ବ୍ୟବହାର କରିଥାନ୍ତି। ସର୍ଜନ ଓ ଚିକିତ୍ସା ବ୍ୟବସାୟୀ ଦାନ କରାଯାଇଥିବା ଶରୀରକୁ ନୂଆ ଟେକନିକ୍ ଅଭ୍ୟାସ କରିବା ପାଇଁ ଉପଯୋଗ କରିଥାନ୍ତି। ସେହିପରି ବୈଜ୍ଞାନିକ ଓ ଗବେଷକମାନେ ଦାନ କରାଯାଇଥିବା ଶରୀରକୁ ରୋଗର ସନ୍ଧାନ କରିବା, ବିଭିନ୍ନ ଅଙ୍ଗ ଉପରେ ଚିକିତ୍ସା ସ୍ଥିତିର ପ୍ରଭାବକୁ ଅଧ୍ୟୟନ କରିବା ଓ ନୂଆ ଉପଚାର ଏବଂ ଔଷଧ ବିକଶିତ କରିବା ପାଇଁ ବ୍ୟବହାର କରିଥାନ୍ତି।
