ବ୍ରିଜଟାଉନ୍,୨୩/୦୬: ଟି-୨୦ ବିଶ୍ବକପରେ ରବିବାର ଦୁଇଟି ମ୍ୟାଚ୍ ଖେଳାଯାଉଛି ଦୁଇଟି ମ୍ୟାଚ୍ । ପ୍ରଥମ ମୁକାବିଲା ଅଷ୍ଟ୍ରେଲିଆ-ଆଫଗାନିସ୍ତାନ ମଧ୍ୟରେ ହୋଇଛି । ତେବେ ଦ୍ବିତୀୟରେ ମ୍ୟାଚରେ ମୁହାଁମୁହିଁ ହେବେ ଗ୍ରୁପ୍-୨ରେ ଇଂଲଣ୍ଡ ଓ ୟୁଏସଏ । ଆମେରିକା ପ୍ରଥମ ୨ଟି ମ୍ୟାଚ୍ ପରାଜିତ ହୋଇ ସେମି ଦୌଡ଼ରୁ ବାଦ୍ ପଡ଼ିଛି । ଯାହା ଫଳରେ ଇଂଲଣ୍ଡ ସେମି ଆଶା ଉଜ୍ଜୀବିତ ରହିଛି । ତଥାପି ସେମିରେ ପହଞ୍ଚିବାକୁ ହେଲେ ଇଂଲଣ୍ଡକୁ ବଡ଼ ବ୍ୟବଧାନରେ ଜିତି ରନ୍ ରେଟ୍ରେ ଉନ୍ନତି କରିବାକୁ ପଡ଼ିବ । କାରଣ ଏହି ଗ୍ରୁପ୍ରେ ଦକ୍ଷିଣ ଆଫ୍ରିକା ୨ଟି ମ୍ୟାଚ୍ ଜିତି ସାରିଛି । ଶେଷ ମ୍ୟାଚ୍ରେ ଦଳ ୱେଷ୍ଟ ଇଣ୍ଡିଜକୁ ଭେଟିବ । କାରବିୟାନ ଦଳ ପ୍ରଥମ ମ୍ୟାଚ୍ରେ ଇଂଲଣ୍ଡ ଠାରୁ ପରାଜିତ ହୋଇଥିଲେ ହେଁ ଦ୍ୱିତୀୟ ମ୍ୟାଚ୍ରେ ୟୁଏସଏକୁ ୫୫ଟି ବଲ୍ ବାକି ଥାଇ ହରାଇ ରନ୍ ରେଟ୍ ବୃଦ୍ଧି କରିସାରିଛି । ଗ୍ରୁପ୍-୨ ପଏଣ୍ଟ ତାଲିକାରେ ଇଂଲଣ୍ଡ ତୃତୀୟ ସ୍ଥାନରେ ରହିଛି ।
ୟୁଏସଏ ପ୍ରାଥମିକ ଲିଗ୍ ରାଉଣ୍ଡ୍ରେ ଉନ୍ନତ ପ୍ରଦର୍ଶନ କରିଥିଲା । ମାତ୍ର ସୁପର-୮ ରାଉଣ୍ଡ ପୂର୍ବରୁ ଦଳର ଅଧିନାୟକ ମୋନାଙ୍କ ପଟେଲ ଆହତ ହେବାରୁ ବ୍ୟାଟିଂ ବିଭାଗର ସନ୍ତୁଳନ ବିଗିଡ଼ି ଯାଇଛି । ବୋଲିଂ ବିଭାଗର ପ୍ରଦର୍ଶନ ଠିକ୍ ଠାକ୍ ରହିଥିଲେ ହେଁ ଅଭିଜ୍ଞତାର ଅଭାବ ଯୋଗୁଁ ୟୁଏସଏ ପରାଜିତ ହେଉଛି ।
ଶୃଙ୍ଖଳିତ ବୋଲିଂ ବିଭାଗ ବିପକ୍ଷରେ ଇଂଲଣ୍ଡ ଫେଲ ମାରିଛି । ଦକ୍ଷିଣ ଆଫ୍ରିକା ବିପକ୍ଷରେ ଦଳର ବ୍ୟାଟିଂ ବିଫଳତା ପରାଜୟର ମୁଖ୍ୟ କାରଣ ସାଜିଥିଲା । ମାତ୍ର ରବିବାର ଦଳ ନିକଟରେ ବିଜୟ ସୁଯୋଗ ରହିଛି । ତଥାପି ୟୁଏସକୁ ହାଲକା ଭାବେ ନେବା ଭାରି ପଡ଼ିପାରେ ।
ବ୍ରିଜଟାଉନ୍ର କେନସିଙ୍ଗଟନ ଓଭାଲ ଗ୍ରାଉଣ୍ଡ ବ୍ୟାଟିଂ ପାଇଁ ବେଶ୍ ଅନୁକୂଳ । ମାତ୍ର ଏଠାରେ ସ୍ପିନରମାନେ ପିଚ୍ର ଫାଇଦା ଉଠାଇ ପାରିବେ । ଦିନ ବେଳା ଏହି ମ୍ୟାଚ୍ ରହିଥିବାରୁ ଟସ୍ ବିଜୟୀ ଦଳ ବ୍ୟାଟିଂ ନିଷ୍ପତ୍ତି ନେଇ ପାରନ୍ତି ।
