ନୂଆଦିଲ୍ଲୀ: ସୋମବାର GSAT 24 ସାଟେଲାଇଟର ଆନୁଷ୍ଠାନିକ ଆରମ୍ଭ ହୋଇଛି । ଏହି ସାଟେଲାଇଟର ପୂରା ସର୍ଭିସ ୧୦ ବର୍ଷ ପାଇଁ ଟାଟା ପ୍ଲେ ନେଇଛି । ଏହାପରେ ଟାଟା ପ୍ଲେରେ ଏବେ ୬୦୦ ପରିବର୍ତ୍ତେ ୯୦୦ ଚ୍ୟାନେଲ ବଢିଆ ପିକ୍ଚର କ୍ୱାଲିଟି ସହ ଦେଖିବାକୁ ମିଳିବ । ଏହି ଅବସରରେ ଇସ୍ରୋ ମୁଖ୍ୟ ଏସ ସୋମନାଥ ମଧ୍ୟ ଉପସ୍ଥିତ ରହିଥିଲେ । ସମ୍ପୂର୍ଣ୍ଣ ରୂପେ ମେଡ୍ ଇନ୍ ଇଣ୍ଡିଆ ଏହି GSAT 24 ସାଟେଲାଇଟ୍ ଟେଣ୍ଟକୁ ୨୦୨୨ ଜୁନ ଲଞ୍ଚ କରାଯାଇଥିଲା, କିନ୍ତୁ ଏହାର ସର୍ଭିସ ସୋମବାରରୁ ଆରମ୍ଭ ହୋଇଛି । ପ୍ରାୟ ୩୬ ହଜାର କିଲୋମିଟର ଦୂରରୁ ଏହି ସାଟେଲାଇଟର ପୂରା ସର୍ଭିସକୁ ପୂରା କ୍ଷମତା ସହ ଆସନ୍ତା ୧୦ ବର୍ଷ ପାଇଁ ଟାଟା ପ୍ଲେ ନିଜ ପାଖକୁ ନେଇଛି ।
ଟାଟା ପ୍ଲେର ଏମଡି ହରିତ ନାଗପାଲ କହିଛନ୍ତି ଯେ ଏହା ଏକ ନୂଆ ସାଟେଲାଇଟ୍, ଏହାପରେ ଆମର ଚ୍ୟାନେଲ ଦେବା କ୍ଷମତା ଏବେ ଅଧିକ ହୋଇଯିବ । ପୂର୍ବରୁ ଆମେ ୬୦୦ ଚ୍ୟାନେଲ ଯୋଗାଇ ପାରୁଥିଲୁ, କିନ୍ତୁ ଏବେ ୯୦୦ ଚ୍ୟାନେଲ ଦେଇପାରିବୁ । ଏହାସହ ପିକ୍ଚର ଏବଂ କ୍ୱାଲିଟି ଅଧିକ ଭଲ ହୋଇପାରିବ ।
ପଢନ୍ତୁ: ଭାରତର ପ୍ରଥମ 5G ୱାୟାରଲେସ୍ Wi-Fi ହେଲା ଲଞ୍ଚ୍, ଏକାସାଙ୍ଗରେ ଚାଲିପାରିବ ୬୪ ଡିଭାଇସ୍
ସେ କହିଛନ୍ତି ଯେ ବର୍ତ୍ତମାନ ସୁଦ୍ଧା ଟାଟା ପ୍ଲେ ଭିନ୍ନ-ଭିନ୍ନ ସାଟେଲାଇଟ୍ ଜରିଆରେ ଲୋକଙ୍କ ପାଖରେ ପହଞ୍ଚୁଥିଲା । କିନ୍ତୁ ଏବେ ସବୁ ଚ୍ୟାନେଲ ଗୋଟିଏ ସାଟେଲାଇଟ୍ ଜରିଆରେ ପହଞ୍ଚିବ । ଏହି ସାଟେଲାଇଟକୁ ନ୍ୟୁସ୍ପେସ୍ ଇଣ୍ଡିଆ ଲିମିଟେଡ୍ ଇସ୍ରୋର ନିର୍ଦ୍ଦେଶରେ ଟାଟା ପ୍ଲେ ପାଇଁ ତିଆରି କରିଥିଲା ।
ଅନ୍ୟପଟେ ଏନଏସଆଇଏଲର ଅଧ୍ୟକ୍ଷ ରାଧା କୃଷ୍ଣନ କହିଛନ୍ତି ଯେ ଏହା ଡିଟିଏଚର ଚାହିଦାକୁ ପୂରଣ କରିବ । ଏହି ସାଟେଲାଇଟକୁ ଇସ୍ରୋ ନିର୍ମାଣ କରିଛି । ଏନଏସଆଇଏଲ ଏହାକୁ ଫଣ୍ଡିଂ କରିଛି । ଏହି ସାଟେଲାଇଟର ସମସ୍ତ ଅଧିକାରକୁ ଟାଟା ପ୍ଲେ ୧୦ ବର୍ଷ ପାଇଁ ନେଇଛି । ଏଥିପାଇଁ ଆମେ ଯାହା ନିବେଶ କରିଛୁ, ତାହାଠୁ ଅଧିକ ପାଇବା ନେଇ ଅନୁମାନ ରଖିଛୁ ।
କେନ୍ଦ୍ର ସୂଚନା ପ୍ରସାରଣ ମନ୍ତ୍ରଣାଳୟର ସଚିବ ଅପୂର୍ବ ଚନ୍ଦ୍ରା କହିଛନ୍ତି ଯେ ପ୍ରଧାନମନ୍ତ୍ରୀଙ୍କ ମାର୍ଗଦର୍ଶନରେ ଏନଏସଆଇଏଲ ଏହି ପଦକ୍ଷେପ ଗ୍ରହଣ କରିଥିଲା । ପୂର୍ବରୁ କିଛି ଚ୍ୟାନେଲ ଦେଖିବାକୁ ପାଉଥିଲେ, କିଛି ନାହିଁ । କିନ୍ତୁ ଏବେ ସବୁ ଦେଖିବାକୁ ମିଳିବ । ଏହା ଆତ୍ମନିର୍ଭର ଭାରତ ଦିଗରେ ଆଉ ଏକ ବଡ଼ ପଦକ୍ଷେପ । ଇସ୍ରୋ ମୁଖ୍ୟ ଏହାକୁ ସ୍ପେସ ଦୁନିଆରେ ଆଉ ଏକ ପାଦ ବୋଲି କହିଛନ୍ତି, ଆଗକୁ ମଧ୍ୟ ଏହିପରି ସାଟେଲାଇଟ୍ ଲଞ୍ଚ କରାଯିବ ।
Also Read: ଲାଗାତାର ଦ୍ୱିତୀୟ ଦିନରେ ବୃଦ୍ଧି ସହ ବନ୍ଦ ହେଲା ପୁଞ୍ଜି ବଜାର, ନିବେଶକଙ୍କ ଲାଭ ୧.୧୯ ଲକ୍ଷ କୋଟି ଟଙ୍କା
