ନୂଆଦିଲ୍ଲୀ ୧୨।୦୧; ପଞ୍ଜାବ ଭଟିଣ୍ଡା ଜିଲ୍ଲା ବଲ୍ଲୋ ଗାଁର ଗ୍ରାମ ପଞ୍ଚାୟତ ବିବାହ ସମାରୋହକୁ ନେଇ ନିକଟରେ ଏକ ନିଆରା ନିଷ୍ପତ୍ତି ନେଇଛି । ସେ ଅନୁସାରେ, ଯେଉଁ ପରିବାର ବିବାହ ସମାରୋହରେ ଡିଜେ ବଜାଇବେ ନାହିଁ ଓ ମଦ ବାଣ୍ଟିବେ ନାହିଁ ସେହି ପରିବାରଗୁଡି଼କୁ ନଗଦ ୨୧ ହଜାର ଟଙ୍କା ପୁରସ୍କାର ମିଳିବ । ଏଥିଲାଗି ପଞ୍ଚାୟତରେ ଏକ ପ୍ରସ୍ତାବ ପାସ୍ ବି ହୋଇଛି ।
ସରପଞ୍ଚ ଅମରଜିତ କୌରଙ୍କ ଅନୁସାରେ, ଗାଁର ମଙ୍ଗଳ ଓ ନିଶା ବିରୋଧରେ ଏକ ଅଭିଯାନ ଭାବେ ଏହି ନିଷ୍କତ୍ତି ନିଆଯାଇଛି । ଏହାଦ୍ୱାରା କେବଳ ଯେ ବିବାହ ସମାରୋହରେ ଅନାବଶ୍ୟକ ଖର୍ଚ୍ଚ କମିବ ତା’ ନୁହେଁ, ମଦ୍ୟପାନ ଉପରେ ବି ଲଗାମ ଲାଗିବ । ସାଧାରଣତଃ ଗାଁରେ ଯେଉଁ ବିବାହ ସମାରୋହରେ ମଦ ପରଷାଯାଏ ଓ ଡିଜେରେ ଉଚ୍ଚ ସ୍ୱରରେ ଗୀତ ବାଜେ ସେହି ସମାରୋହରେ ହିଁ ଅଧିକ ଝଗଡ଼ା ହେଉଥିବା ଦେଖାଯାଏ ।
ଏଥିସହିତ ଡିଜେରେ ଉଚ୍ଚ ସ୍ୱରରେ ଗୀତ ବାଜିବା ଯୋଗୁ ଛାତ୍ରଛାତ୍ରୀଙ୍କର ପାଠପଢ଼ାରେ ବିଘ୍ନ ହୋଇଥାଏ । ତାକୁ ଏଡ଼ାଇବାକୁ ଏହି ପଦକ୍ଷେପ ନିଆଯାଇଛି । ଏହା ସାମାଜିକ ସୁଧାର ଆଣିବା ସହିତ ପ୍ରାୟ ୫୦୦୦ ଜନସଂଖ୍ୟା ବିଶିଷ୍ଟ ବଲ୍ଲୋର ଜନତାଙ୍କର ଆର୍ଥିକ ବିକାଶରେ ସହାୟକ ହେବ ବୋଲି ସେ ଆଶା ପ୍ରକାଶ କରିଛନ୍ତି । ବଲ୍ଲୋର ଜନତା ମଧ୍ୟ ଏ ସଂପର୍କରେ ସକାରାତ୍ମକ ଆଭିମୁଖ୍ୟ ପୋଷଣ କରିଛନ୍ତି ।
