ନୂଆଦିଲ୍ଲୀ: ଆମେରିକାର ଏକ ହିନ୍ଦୁ ସଂଗଠନ ଆଗାମୀ ରାଷ୍ଟ୍ରପତି ନିର୍ବାଚନରେ କମଲା ହାରିସ୍ଙ୍କ ପରିବର୍ତ୍ତେ ଡୋନାଲ୍ଡ ଟ୍ରମ୍ପଙ୍କୁ ସମର୍ଥନ ଦେବା ପାଇଁ ଘୋଷଣା କରିଛନ୍ତି । ହିନ୍ଦୁ ସଂଗଠନ ଦାବି କରିଛି ଯେ କମଲା ହାରିସ୍ ଯଦି ରାଷ୍ଟ୍ରପତି ନିର୍ବାଚନ ଜିତନ୍ତି ତେବେ ଭାରତ ଏବଂ ଆମେରିକା ସମ୍ପର୍କ ଅସ୍ଥିର ହୋଇପାରେ । ହିନ୍ଦୁ ସଂଗଠନ ପେନସଲଭେନିଆ, ଜର୍ଜିଆ ଏବଂ ନର୍ଥ କ୍ୟାରୋଲିନା ପରି ରାଜ୍ୟରେ ଟ୍ରମ୍ପଙ୍କ ପକ୍ଷରେ ମତଦାତାଙ୍କୁ ଏକଜୁଟ୍ କରିବା ଆରମ୍ଭ କରିଛି ।
ଆମେରିକାର ହିନ୍ଦୁ ସଂଗଠନ ହିନ୍ଦୁଜ୍ ଫର୍ ଆମେରିକା ଫର୍ଷ୍ଟର ଅଧ୍ୟକ୍ଷ ଏବଂ ପ୍ରତିଷ୍ଠାତା ଉତ୍ସବ ସନ୍ଦୁଜା କମଲାଙ୍କୁ ନେଇ ବଡ଼ ବୟାନ ଦେଇଛନ୍ତି । ସେ କହିଛନ୍ତି ଯେ ଯଦି କମଲା ହାରିସ୍ ରାଷ୍ଟ୍ରପତି ନିର୍ବାଚିତ ହୁଅନ୍ତି, ତେବେ ହୋଇପାରେ ସୁପ୍ରିମକୋର୍ଟରେ ସେ କିଛି ଉଦାରବାଦୀ ଲୋକଙ୍କୁ ନିଯୁକ୍ତି ଦେଇପାରନ୍ତି, ଯାହାଙ୍କ ନିଷ୍ପତ୍ତି ଏସୀୟ-ଆମେରିକୀୟ ଲୋକଙ୍କ ଉପରେ ପଡ଼ିପାରେ । ଉଲ୍ଲେଖଯୋଗ୍ୟ ଯେ କମଲା ହାରିସ୍ ଏକ ଉଦାରବାଦୀ ନେତା ଏବଂ ବାମପନ୍ଥୀ ବିଚାରଧାରାକୁ ସମର୍ଥନ କରନ୍ତି । ଡୋନାଲ୍ଡ ଟ୍ରମ୍ପ ମଧ୍ୟ ଚେତାବନୀ ଦେଇସାରିଛନ୍ତି ଯେ ହାରିସ୍ ଯଦି ନିର୍ବାଚନ ଜିତନ୍ତି ତେବେ ସେ ଇମିଗ୍ରେସନ ନୀତି ଉପରେ ଉଦାର ଆଭିମୁଖ୍ୟ ରଖିପାରନ୍ତି ।
ଉତ୍ସବ ସନ୍ଦୁଜା କହିଛନ୍ତି, 'ଟ୍ରମ୍ପ, ଭାରତର ସମର୍ଥକ ଏବଂ ତାଙ୍କର ପ୍ରଧାନମନ୍ତ୍ରୀ ମୋଦୀଙ୍କ ସହ ସମ୍ପର୍କ ଭଲ ରହିଛି । ଟ୍ରମ୍ପଙ୍କ କାର୍ଯ୍ୟକାଳରେ ଦୁଇ ଦେଶ ମଧ୍ୟରେ ଅନେକ ଗୁରୁତ୍ୱପୂର୍ଣ୍ଣ ପ୍ରତିରକ୍ଷା ଏବଂ ପ୍ରଯୁକ୍ତିରେ ବୁଝାମଣା ହୋଇଛି । ଅନ୍ୟପଟେ କମଲା ହାରିସ୍ ଭାରତ ଏବଂ ଭାରତୀୟଙ୍କୁ ନେଇ ଅନେକ ଆପତ୍ତିଜନକ ବୟାନ ଦେଇଛନ୍ତି, କିନ୍ତୁ ଟ୍ରମ୍ପ ଭାରତର ଆଭ୍ୟନ୍ତରୀଣ ମାମଲାରେ କେବେ ଦଖଲ ଦେଇ ନାହାନ୍ତି ।'