ରାଉରକେଲା, ୧୦।୧: ହକି ଇଣ୍ଡିଆ ଲିଗରେ ପ୍ରତିଦିନ ସଂଘର୍ଷପୂର୍ଣ୍ଣ ମୁକାବିଲା । ଗୁରୁବାର ରାଉରକେଲାର ବିର୍ସା ମୁଣ୍ଡା ହକି ଷ୍ଟାଡିୟମରେ ଖେଳାଯାଇଥିବା ମ୍ୟାଚରେ ଗୋନାଶିକାକୁ ମାତ୍ ଦେଇଛି କଳିଙ୍ଗ ଲାନସର୍ସ । ୨-୧ ଗୋଲରେ ପରାସ୍ତ କରି ଦ୍ବିତୀୟ ବିଜୟ ହାସଲ କରିଛି । ଏଥିସହ ଦଳ ପଏଣ୍ଟ ଟେବୁଲର ତୃତୀୟ ସ୍ଥାନକୁ ଉନ୍ନୀତ ହୋଇଛି ।
ବେଦାନ୍ତ କଳିଙ୍ଗ ଲାନସର୍ସ ଓ ଗୋନାଶିକା ମ୍ୟାଚ୍ ବେଶ୍ ପ୍ରତିଦ୍ୱନ୍ଦ୍ୱିତାପୂର୍ଣ୍ଣ ମ୍ୟାଚ୍ ହୋଇଥିଲା । ପ୍ରଥମ କ୍ୱାର୍ଟରରେ ଗୋନାଶିକା ଗୋଲ୍ ଖାତା ଖୋଲିଥିଲା । ୧୪ ମିନିଟରେ ଏସ୍ଭି ସୁନୀଲ ଚମତ୍କାର ଫିଲ୍ଡ ଗୋଲ୍ ଦେଇ ଦଳକୁ ଅଗ୍ରଣୀ କରାଇଥିଲେ । ଦ୍ୱିତୀୟ କ୍ୱାର୍ଟରରେ ଲାନସର୍ସ ଏହି ଗୋଲ୍ ପରିଶୋଧ କରିଥିଲା । ୨୮ ମିନିଟରେ କିନା ଆଣ୍ଟୋଇନେ ପ୍ରଥମ ଗୋଲ୍ ଦେଇଥିଲେ । ପୁଣି ତୃତୀୟ କ୍ୱାର୍ଟର ଆରମ୍ଭରୁ ଲାନସର୍ସ ଦ୍ୱିତୀୟ ଗୋଲ୍ ୩୩ ମିନିଟରେ ଦେଇ ୨-୧ରେ ଆଗୁଆ ରହିଥିଲା । ଖେଳର ପରବର୍ତ୍ତୀ ସମୟ ଅତି ସଂଘର୍ଷପୂର୍ଣ୍ଣ ରହିଥିଲା । ଗୋନାଶିକା ପ୍ରତ୍ୟାବର୍ତ୍ତନ କରିବା ନେଇ ସମସ୍ତ ବଳ ଲଗାଇ ଦେଇଥିଲା । ସେମିତି ଲାନସର୍ସ ମଧ୍ୟ ଅଧିକ ଗୋଲ୍ ଦେବା ନେଇ ତୀବ୍ର ଆକ୍ରମଣ କରିଥିଲା । କିନ୍ତୁ ଉଭୟ ଦଳ ନିଜ ନିଜର ପ୍ରୟାସରେ ବିଫଳ ରହିଥିଲେ । ଶେଷରେ ଗୋଟିଏ ଗୋଲରେ ଅଗ୍ରଣୀ ସହ ଲାନସର୍ସ ଏହି ମ୍ୟାଚରେ ବିଜୟୀ ହୋଇଛି । ସିଜନରେ ଲାନସର୍ସ ୫ଟି ମ୍ୟାଚ୍ରୁ ୨ଟି ବିଜୟ, ଗୋଟିଏ ଖେଳର ନିର୍ଦ୍ଧାରିତ ସମୟରେ ମଧ୍ୟରେ ଡ୍ର’ ଏବଂ ୨ଟି ପରାଜୟ ସହ ମୋଟ୍ ୭ ପଏଣ୍ଟ ପାଇଛି । ବେଙ୍ଗଲ ଟାଇଗର୍ସ ୯, ତାମିଲନାଡୁ ଡ୍ରାଗନ୍ସ ୯ ଏବଂ ଲାନସର୍ସ ୭ ପଏଣ୍ଟ ପାଇଁ ଟେବୁଲରେ ଯଥାକ୍ରମେ ପ୍ରଥମରୁ ତୃତୀୟ ସ୍ଥାନରେ ରହିଛନ୍ତି ।
