ରାଉରକେଲା, ୯।୧: ବିର୍ସା ମୁଣ୍ଡା ହକି ଷ୍ଟାଡିୟମରେ ହକି ଇଣ୍ଡିଆ ଲିଗ୍ ଜାରି । ବୁଧବାର ଦୁଇଟି ମ୍ୟାଚ୍ ଖେଳାଯାଇଥିଲା । ପ୍ରଥମ ମ୍ୟାଚ୍ ତାମିଲନାଡୁ ଡ୍ରାଗନ୍ସ ବନାମ ଗୋନାଶିକା ଏବଂ ଦ୍ବିତୀୟ ମ୍ୟାଚ୍ ହାଇଦ୍ରାବାଦ ତୋଫାନ ଏବଂ ୟୁପି ରୁଦ୍ରସ୍ ମଧ୍ୟରେ ହୋଇଥିଲା । ପ୍ରଥମ ମ୍ୟାଚରେ ତାମିଲନାଡ଼ୁ ବିଜୟୀ ହୋଇଥିବା ବେଳେ ଦ୍ବିତୀୟ ମ୍ୟାଚରେ ହାଇଦ୍ରାବାଦ ତୋଫାନ ଜିତିଛି ।
ତାମିଲନାଡ଼ୁ ଡ୍ରାଗନ୍ସ ଏକ ସଂଘର୍ଷପୂର୍ଣ୍ଣ ମ୍ୟାଚରେ ଗୋନାଶିକାକୁ ୬-୫ ଗୋଲରେ ପରାସ୍ତ କରିଛି । ମାତ୍ର ହାଇଦ୍ରାବାଦ ତୋଫାନ ୩-୦ ଗୋଲରେ ଏକତରଫା ଭାବେ ୟୁପି ରୁଦ୍ରସକୁ ମାତ୍ ଦେଇଛି । ତାମିଲନାଡ଼ୁ ଡ୍ରାଗନ୍ସ ୫୯ ମିନିଟରେ ବିଜୟୀ ଗୋଲ୍ ସ୍କୋର କରିଥିଲା । ଗୋନାଶିକା ପକ୍ଷରୁ ୫, ୭, ୩୯, ୪୩ ଓ ୫୮ ମିନିଟରେ ଏବଂ ଡ୍ରାଗନ୍ସ ପକ୍ଷରୁ ୧୫, ୧୯, ୩୩, ୫୦, ୫୫ ଓ ୫୯ ମିନିଟରେ ଗୋଲ ସ୍କୋର ହୋଇଥିଲା । ଡ୍ରାଗନ୍ସ ୪ଟି ମ୍ୟାଚରୁ ୩ଟି ଜିତିବାରେ ସଫଳ ହୋଇଛି । ୯ ପଏଣ୍ଟ ସହ ଟେବୁଲରେ ବେଙ୍ଗଲ ଟାଇଗର୍ସ ପଛକୁ ଦ୍ୱିତୀୟ ସ୍ଥାନରେ ରହିଛି । ତୃତୀୟ ପରାଜୟ ସହ ଗୋନାଶିକା ନୈରାଶ୍ୟଜନକ ପ୍ରଦର୍ଶନ ଜାରି ରଖିଛି । ଦଳ ସିଜନରେ ୪ଟି ମ୍ୟାଚ୍ରୁ ଗୋଟିଏ ମ୍ୟାଚ୍ ଜିତିବାରେ ସମର୍ଥ ହୋଇଛି । ସେପଟେ ତୋଫାନ ଓ ୟୁପି ରୁଦ୍ରସ୍ ମ୍ୟାଚ ଏକତରଫା ରହିଥିଲା । ତୋଫାନ ୬, ୧୪ ଓ ୩୨ ମିନିଟରେ ୩ଟି ଗୋଲ୍ ଦେଇଥିଲା । ଶିଳାନନ୍ଦ ଲାକ୍ରା ୩୨ ମିନିଟରେ ଗୋଟିଏ ଗୋଲ୍ ଦେବାରେ ସଫଳ ରହିଥିଲେ । ତୋଫାନ ଏହି ବିଜୟ ସହ ମୋଟ୍ ୫ ପଏଣ୍ଟ ହାସଲ କରିଛି ।
