ଭୁବନେଶ୍ୱର,୨୬/୧୧: ବୁଧବାରଠୁ ରାଜ୍ୟରେ କମିପାରେ ଜାଡ଼ । ପାଣିପାଗ କେନ୍ଦ୍ରର ସୂଚନା ଅନୁଯାୟୀ, ଅଧିକାଂଶ ସ୍ଥାନରେ ପାରଦ ପ୍ରାୟ ୨ରୁ ୪ଡିଗ୍ରୀ ସେଲସିୟସ୍ ବଢ଼ିବାର ସମ୍ଭାବନା ରହିଛି ।
ଜି.ଉଦୟଗିରି ସବୁଠୁ ଥଣ୍ଡା ଅଞ୍ଚଳ । ଏଠାରେ ରାତିର ତାପମାତ୍ରା ୮.୨ ଡିଗ୍ରୀ ରେକର୍ଡ ହୋଇଛି । ଫୁଲବାଣୀରେ ୧୦ଡିଗ୍ରୀ, ଭବାନୀପାଟଣା ଓ ଦାରିଙ୍ଗିବାଡ଼ିରେ ୧୧, ରାଉରକେଲାରେ ୧୧.୨, ଝାରସୁଗୁଡ଼ାରେ ୧୧.୫, ସୁନ୍ଦରଗଡ଼, ବଲାଙ୍ଗିର ଓ କୋରାପୁଟରେ ୧୧.୮, ନବରଙ୍ଗପୁରରେ ୧୨.୫, ଅନୁଗୁଳରେ ୧୩, ବୌଦ୍ଧରେ ୧୩.୫, କେନ୍ଦୁଝରରେ ୧୩.୫ ଓ ଭଦ୍ରକରେ ୧୪ ଡିଗ୍ରୀ ତାପମାତ୍ରା ରେକର୍ଡ କରାଯାଇଛି ।
ଏପଟେ ଫୁଲବାଣୀ ଓ ରାଉରକେଲାରେ ଘନ କୁହୁଡ଼ି ଦୃଶ୍ୟମାନ ହୋଇଛି । ଭବାନୀପାଟଣାରେ ମଧ୍ୟମ ଧରଣର କୁହୁଡ଼ି ଦେଖାଯାଇଥିଲା । ସୁନ୍ଦରଗଡ଼ ଓ କୋରାପୁଟରେ ସ୍ୱଳ୍ପ କୁହୁଡ଼ି ଦେଖିବାକୁ ମିଳିଥିଲା । ଆସନ୍ତା ଦୁଇ ଦିନ ସୁନ୍ଦରଗଡ଼, କଳାହାଣ୍ଡି, କନ୍ଧମାଳ ଓ କୋରାପୁଟରେ ସ୍ୱଳ୍ପରୁ ମଧ୍ୟମ ଧରଣର କୁହୁଡ଼ି ଦୃଶ୍ୟମାନ ହୋଇପାରେ ବୋଲି ପାଣିପାଗ ବିଭାଗ ଆକଳନ କରିଛି ।
