ଭୁବନେଶ୍ୱର,୨୦।୦୯: ଉତ୍ତର- ପୂର୍ବ ବଙ୍ଗୋପସାଗରରେ ଆସନ୍ତା ୨୨, ୨୩ ତାରିଖ ବେଳକୁ ଏକ ଲଘୁଚାପ ସୃଷ୍ଟି ହେବା ସମ୍ଭାବନା ଅଛି । ଏହା ପ୍ରଭାବରେ ୨୩ରୁ ଓଡ଼ିଶାରେ ବର୍ଷା ଆରମ୍ଭ ହେବ । ଅତି କମ୍ରେ ୪୮ ଘଣ୍ଟା ବର୍ଷିବ । ପ୍ରାକ୍ ଆକଳନ ଅନୁସାରେ ଏହା ସାରା ରାଜ୍ୟରେ ପ୍ରବଳ ବର୍ଷା କରାଇପାରେ । ଅବପାତ ନ ହେଲେ ବର୍ଷା ପରିମାଣ କମିବ । ଏଭଳି ପୂର୍ବାନୁମାନ କରିଛନ୍ତି କୃଷି ପାଣିପାଗ ବିଶେଷଜ୍ଞ ପ୍ରଫେସର ସୁରେନ୍ଦ୍ରନାଥ ପଶୁପାଳକ ।
ପ୍ରଫେସର ପଶୁପାଳକ କହିଛନ୍ତି, ଲଘୁଚାପ ସୃଷ୍ଟି ହେବା ପରେ ତାହା ୪୮ ଘଣ୍ଟା ଭିତରେ ପାରାଦୀପ ପାଖାପାଖି ଓଡ଼ିଶା ଉପକୂଳରେ ପହଞ୍ଚିବ । ପରବର୍ତ୍ତୀ ୧୨ରୁ ୨୪ ଘଣ୍ଟା ଭିତରେ ପ୍ରାୟତଃ ସମ୍ବଲପୁର ପାଖ ଦେଇ ଛତିଶଗଡ଼ ଓ ମଧ୍ୟପ୍ରଦେଶ ଆଡ଼କୁ ମୁହାଁଇପାରେ । ଯଦି ଘନୀଭୂତ ହୋଇ ଅବପାତରେ ପରିଣତ ହେବ, ତେବେ ସମୁଦ୍ରରେ ଅଧିକ ୨୪ ଘଣ୍ଟା ରହିପାରେ।
ଚାଷୀଙ୍କ ଉଦ୍ଦେଶ୍ୟରେ ପ୍ରଫେସର ପଶୁପାଳକ ପରାମର୍ଶ ଦେଇ କହିଛନ୍ତି, ଖାଲି ରହିଥିବା କ୍ଷେତରେ ପ୍ରାକ୍ ରବି ଫସଲ ଯଥା ମୁଗ, ବିରି, ଅଳସୀ ଓ ପନିପରିବା ଲଗାଇବା ଉଚିତ । ଧାନ ଫସଲରେ ସାର ପ୍ରୟୋଗ କରନ୍ତୁ । ଯେଉଁ ସ୍ଥାନରେ ଅଣଜଳସେଚିତ ଅଞ୍ଚଳରେ ମାଟି ବତର ନଥିବ, ଧାନରେ ୨ ପ୍ରତିଶତ ୟୁରିଆ ଓ ଡାଲି ଜାତୀୟ ଫସଲରେ ୨% ଡିଏପି ସାର ସିଞ୍ଚନ କରନ୍ତୁି।
