ନୂଆଦିଲ୍ଲୀ: ଚଳିତ ଆଇପିଏଲ୍ ସିଜିନରେ ମୁମ୍ବାଇ ଇଣ୍ଡିଆନ୍ସକୁ ଦଳର ତାରକା ଦ୍ରୁତ ବୋଲର ଯଶପ୍ରୀତ ବୁମରାଙ୍କ ଅନୁପସ୍ଥିତି ବାରି ହୋଇ ପଡ଼ିଛି। ଏବେ ତାଙ୍କର ଆହତ ସମସ୍ୟା ଓ ପ୍ରତ୍ୟାବର୍ତ୍ତନ ନେଇ ସଦ୍ୟତମ ସୂଚନା ଆସିଛି। ମିଡିଆ ରିପୋର୍ଟ ଅନୁସାରେ ବୁମରା ଆଗାମୀ ଦିନେ କି ଦୁଇ ଦିନ ଭିତରେ ମୁମ୍ବାଇ ଇଣ୍ଡିଆନ୍ସ ଦଳ ସହ ଯୋଗ ଦେଇ ପାରନ୍ତି। କିଛି ଦିନ ପୂର୍ବରୁ ଖବର ଆସିଥିଲା ଯେ, ବୁମରା ଏପ୍ରିଲ ୭ରେ ଖେଳା ଯିବାକୁ ଥିବା ଆରସିବି ବିପକ୍ଷ ମ୍ୟାଚ୍ ଖେଳି ପାରନ୍ତି?
ଇଣ୍ଡିଆ ଟୁଡେ ଅନୁସାରେ ବୁମରା ଆଗାମୀ ଦିନେ କି ଦୁଇ ଦିନ ଭିତରେ ମୁମ୍ବାଇ ଶିବିରରେ ଯୋଗ ଦେବେ। କୌଣସି ମ୍ୟାଚ୍ ପାଇଁ ମଇଦାନକୁ ଓହ୍ଲାଇବା ପୂର୍ବରୁ ବୁମରାଙ୍କୁ ନିଜକୁ ଫିଟନେସ୍ ସାବ୍ୟସ୍ତ କରିବାକୁ ପଡ଼ିବ। ସେଥିପାଇଁ ବୁମରାଙ୍କୁ ଦୁଇଟି ଅଭ୍ୟାସ୍ ମ୍ୟାଚ୍ ଖେଳିବାକୁ ପଡ଼ିବ। ଏହି କାରଣରୁ ବୁମରା ଏପ୍ରିଲ ୭ରେ ବେଙ୍ଗାଲୁରୁ ବିପକ୍ଷ ମ୍ୟାଚ୍ରୁ ବଞ୍ଚିତ ହୋଇ ପାରନ୍ତି। କିନ୍ତୁ ଏପ୍ରିଲ ୧୩ ତାରିଖ ଦିଲ୍ଲୀ କ୍ୟାପିଟାଲ୍ସ ବିପକ୍ଷ ମ୍ୟାଚ୍ ଖେଳିବା ନିଶ୍ଚିତ ଲାଗୁଛି।
ବୁମରା ବର୍ଡର-ଗାଭାସ୍କର ଟ୍ରଫିରେ ଅଷ୍ଟ୍ରେଲିଆ ବିପକ୍ଷ ଶେଷ ତଥା ପଞ୍ଚମ ମ୍ୟାଚ୍ପରେ କ୍ରିକେଟ୍ରୁ ଦୂରରେ ଅଛନ୍ତି। ତାଙ୍କ ପିଠିର ନିମ୍ନ ଭାଗରେ ସମସ୍ୟା ଦେଖା ଦେଇଥିଲା। ତେଣୁ ବୁମରା ଚାମ୍ପିଅନ୍ସ ଟ୍ରଫିରୁ ବାଦ୍ ପଡ଼ିଥିଲେ।ମୁମ୍ବାଇ ଇଣ୍ଡିଆନ୍ସ ସହିତ ବିସିସିଆଇର ମେଡିକାଲ୍ ଟିମ୍ ମଧ୍ୟ ସୁନିଶ୍ଚିତ କରିବାକୁ ଚାହୁଁଛନ୍ତି ଯେ, ବୁମରା ସଂପୂର୍ଣ୍ଣ ଫିଟ୍ ସହ ପଡ଼ିଆକୁ ଫେରନ୍ତୁ। ଅନ୍ୟପଟେ ବୁମରାଙ୍କ ଅନୁପସ୍ଥିତିରେ ମୁମ୍ବାଇ ଏ ପର୍ଯ୍ୟନ୍ତ ସତ୍ୟନାରାୟଣ ରାଜୁ, ଭିଗ୍ନେଶ ପୁଥୁର ଓ ଅଶ୍ଵନୀ କୁମାରଙ୍କୁ ସୁଯୋଗ ଦେଇ ସାରିଛି। ତିନି ବୋଲର ପ୍ରଭାବଶାଳୀ ପ୍ରଦର୍ଶନ କରି ସଭିଙ୍କୁ ପ୍ରଭାବିତ କରିଛନ୍ତି। ଅନ୍ୟପଟେ ମୁମ୍ବାଇ ନିରାଶ ଜନକ ପ୍ରଦର୍ଶନ କରି ୪ଟି ମ୍ୟାଚ୍ରୁ କେବଳ ଗୋଟିଏ ଜିତିଛି।
ବର୍ତ୍ତମାନ ଟ୍ରେଣ୍ଟ ବୋଲ୍ଟ ଓ ଦୀପକ ଚହର ମୁମ୍ବାଇ ଇଣ୍ଡିଆନ୍ସର ଦ୍ରୁତ ବୋଲିଂ ଆକ୍ରମଣ ସମ୍ଭାଳୁଛନ୍ତି। ବୁମରାଙ୍କ ପ୍ରତ୍ୟାବର୍ତ୍ତନ ପରେ ଦଳର ବୋଲିଂ ଲାଇନ ଅପ୍ ଆହୁରି ମଜବୁତ ହୋଇଯିବ। ତେବେ ଏ ପର୍ଯ୍ୟନ୍ତ ବୁମରାଙ୍କ ପ୍ରତ୍ୟାବର୍ତ୍ତନ ନେଇ କୌଣସି ଆନୁଷ୍ଠାନିକ ସୂଚନା ଦିଆଯାଇ ନାହିଁ।
