କଟକ ୨।୪: ପୋଲିସ ଅଫିସର ପରିଚୟ ଦେଇ ଚାକିରି ଆଶାୟୀଙ୍କୁ ଠକେଇ । ଏଭଳି ଅଭିଯୋଗରେ ବାଦାମବାଡ଼ି ଥାନା ପୋଲିସ ଜଣେ ନକଲି ପୋଲିସ ଅଫିସରଙ୍କୁ ଗିରଫ କରିଛି । ନକଲି ପୋଲିସ ଅଧିକାରୀ ହେଲେ ତିଗିରିଆ ନୂଆପାଟଣାର ଗୁଣ୍ଡିଚା ଦଳେଇ । ଏବେ ହୋମଗାର୍ଡ ଚାକିରି ପାଇଁ ନିଯୁକ୍ତି ପ୍ରକ୍ରିୟା ଆରମ୍ଭ ହୋଇଥିବାର ସୁଯୋଗ ନେଇ ମାହାଙ୍ଗାର ଜିତାଂଶୁ ପରିଡା ନାମକ ଯୁବକଙ୍କୁ ହୋମଗାର୍ଡ ଚାକିରି କରାଇ ଦେବାକୁ କହି ଗୁଣ୍ଡିଚା ଟଙ୍କା ଠକି ନେଇଥିବା ଡିସିପି ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ଚାକିରି ଆଶାୟୀଙ୍କ ଭିତରେ ବିଶ୍ବାସ ଜନ୍ମାଇବା ପାଇଁ ଗୁଣ୍ଡିଚା ପୋଲିସ ଇନ୍ସପେକ୍ଟରଙ୍କ ୟୁନିଫର୍ମ, ପରିଚୟ ପତ୍ର ଓ ବ୍ୟାଚ ଆଦି ବ୍ୟବହାର କରୁଥିଲେ । ଏସବୁ ଜିନିଷ ପୋଲିସ ଅଭିଯୁକ୍ତଙ୍କ ନିକଟରୁ ଜବତ କରିଛି । ଏହାସହ ଅଭିଯୁକ୍ତଙ୍କ ଠାରୁ ପୋଲିସ ଗୋଟିଏ ଲାପଟପ, ୫ଟି ମୋବାଇଲ ଫୋନ୍ ଓ ଗୋଟିଏ ଚେକ୍ ବୁକ୍ ଜବତ କରିଛି । ଅଭିଯୁକ୍ତ ଗୁଣ୍ଡିଚା ଏହି ଘଟଣା ବ୍ୟତୀତ ଆରଆଇ, ଅମିନ ଚାକିରି ଦେବାକୁ କହି ପ୍ରାୟ ୩୦ଜଣ ଯୁବକ, ଯୁବତୀଙ୍କୁ ଠକିଥିବା ଡିସିପି ସୂଚନା ଦେଇଛନ୍ତି । ଅଭିଯୁକ୍ତଙ୍କ ବ୍ୟାଙ୍କ ଆକାଉଣ୍ଟକୁ ପୋଲିସ ଫ୍ରିଜ୍ କରିଛି । ଏହାସହ ଟଙ୍କା ନେଇ କୌଣସି ଚାକିରି ପ୍ରଲୋଭନ ଦେଉଥିବା ବ୍ୟକ୍ତିଙ୍କ ସମ୍ପର୍କରେ ପୋଲିସକୁ ସୂଚନା ଦେବା ପାଇଁ ଡିସିପି ନିବେଦନ କରିଛନ୍ତି ।

କିଛିଦିନ ତଳେ ରାଜଧାନୀରେ ନକଲି ପୋଲିସ ଡିଏସପିଙ୍କୁ ବନ୍ଧିଥିଲା ପୋଲିସ । ନକଲି ଡିଏସ୍‌ପି ଜଣଙ୍କ ହେଲେ ମାନସ ରଞ୍ଜନ ସେନାପତି । ତାଙ୍କ ଘର ଭଦ୍ରକ ବାସୁଦେବପୁର ଅଞ୍ଚଳରେ ହୋଇଥିବା ବେଳେ ସେ ଭୁବନେଶ୍ୱର ଖାରବେଳନଗର ଥାନା ଅଞ୍ଚଳରେ ଥିବା ମଧୁସୂଦନ ନଗରରେ ରହୁଥିଲା l 

ତେବେ ଏହି ନକଲି ପୋଲିସ ବାବୁ ଜଣଙ୍କ ନକଲି ପରିଚୟ ପତ୍ର ଦେଖାଇ ନିଜକୁ DSP କହି ଅନେକ ଲୋକଙ୍କୁ ଚାକିରି କରାଇଦେବାକୁ କହି ଠକିଥିବା ଅଭିଯୋଗ ହୋଇଥିଲା । ଏଭଳି ଅଭିଯୋଗ ପରେ ପରେ ତାଙ୍କୁ ପୋଲିସ ଗିରଫ କରିଥିଲା । ସହିଦନଗର ଅଞ୍ଚଳରୁ ନାଇଟ ବ୍ଲକିଂ ଚେକିଂ ବେଳେ ତାଙ୍କୁ ପୋଲିସ ଧରିଥିବା ଜଣାପଡିଥିଲା । ତାଙ୍କ ନିକଟରୁ ପୋଲିସ ୟୁନିଫର୍ମ, ନକଲି ନିଯୁକ୍ତି ପତ୍ର, ୨ ଲକ୍ଷରୁ ଅଧିକ ଜାଲ୍ ନୋଟ୍, ନକଲି ପୋଲିସ ଆଇକାର୍ଡ, କାର୍, ଲାପଟପ୍, ମୋବାଇଲ ଫୋନ ଜବତ ହୋଇଥିଲା l 

You Can Read:

ଗତ ୫ବର୍ଷରେ ବିଦ୍ୟୁତ ସଂସ୍ପର୍ଶରେ ଆସି ୨୭ ହାତୀଙ୍କ ମୃତ୍ୟୁ : ଶକ୍ତି ମନ୍ତ୍ରୀ