କୋଲକାତା ୨୦।୧: ଆରଜି କର ମେଡିକାଲ କଲେଜ ଓ ହସ୍ପିଟାଲ ଡାକ୍ତର ଦୁଷ୍କର୍ମ ଓ ହତ୍ୟା ମାମଲାରେ ଦୋଷୀଙ୍କୁ କୋର୍ଟ ସୋମବାର ଆଜୀବନ ଜେଲଦଣ୍ଡାଦେଶ କରିଛନ୍ତି। ତେବେ ଏଥିରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ସନ୍ତୁଷ୍ଟ ନୁହନ୍ତି। ସେ କହିଛନ୍ତି ଯେ ଏହି ମାମଲାର ଯାଞ୍ଚକୁ କୋଲକାତା ପୋଲିସ ଠାରୁ ଜୋରଜବରଦସ୍ତ ଛଡାଇ ନିଆଯାଇଥିଲା। ଯଦି କୋଲକାତା ପୋଲିସ ମାମଲାର ତଦନ୍ତ କରିଥାନ୍ତା ତେବେ ଦୋଷୀକୁ ନିଶ୍ଚିତ ମୃତ୍ୟୁଦଣ୍ଡାଦେଶ ହୋଇଥାନ୍ତା।
ମୁର୍ସିଦାବାଦ ଜିଲ୍ଲାରେ ଗଣମାଧ୍ୟମ ସହ ଆଲୋଚନାରେ ମମତା ବାନାର୍ଜୀ ମାମଲାର ସିବିଆଇ ଯାଞ୍ଚ ଉପରେ ପ୍ରଶ୍ନ ଉଠାଇଛନ୍ତି। ସେ କହିଛନ୍ତି ଯେ ଆମେ ସମସ୍ତେ ମୃତ୍ୟୁ ଦଣ୍ଡାଦେଶ ଦାବି କରିଥିଲୁ। ତେବେ କୋର୍ଟ ଦୋଷୀଙ୍କୁ ମୃତ୍ୟୁପର୍ଯ୍ୟନ୍ତ ଜେଲଦଣ୍ଡାଦେଶ କରିଛନ୍ତି। ମାମଲା କୋଲକାତା ପୋଲିସ ହାତରୁ ଜୋରଜବରଦସ୍ତ ଛଡାଇ ନିଆଯାଇଥିଲା। ଯଦି କୋଲକାତା ପୋଲିସ ମାମଲାର ତଦନ୍ତ କରିଥାନ୍ତା ତେବେ ତାର ମୃତ୍ୟୁଦଣ୍ଡ ସୁନିଶ୍ଚିତ ହୋଇଥାନ୍ତା।
ମୁଖ୍ୟମନ୍ତ୍ରୀ କହିଛନ୍ତି ଯେ ଆମେ ଜାଣିନୁ ଯାଞ୍ଚ କେମିତି ହେଲା। ତେବେ ରାଜ୍ୟ ପୋଲିସ ଦ୍ୱାରା ଯାଞ୍ଚ କରାଯାଇଥିବା ଏପରି ଅନେକ ମାମଲାରେ ଦୋଷୀଙ୍କୁ କୋର୍ଟ ମୃତ୍ୟୁଦଣ୍ଡାଦେଶ କରିଛନ୍ତି। ଏଣୁ ଏହି ନ୍ୟାୟରେ ମୁଁ ସନ୍ତୁଷ୍ଟ ନୁହେଁ ବୋଲି ମମତା ବାନାର୍ଜୀ କହିଛନ୍ତି। ସିଆଲଦାହ ଅତିରିକ୍ତ ଜିଲ୍ଲା ଓ ଦୌରାଜଜ ଅନିର୍ବାଣ ଦାସଙ୍କ କୋର୍ଟ ଶନିବାର ରାୟ ଘୋଷଣା କରି ଅଭିଯୁକ୍ତକୁ ମାମଲାରେ ଦୋଷୀ ସାବ୍ୟସ୍ତ କରିଥିଲେ। ସୋମବାର ମାମଲାରେ ଦଣ୍ଡାଦେଶ କରାଯାଇଥିବା ବେଳେ ଜଜ୍ ଏହାକୁ ‘ରେୟାରେଷ୍ଟ ଅଫ ରେୟାର’କେସ୍ ସ୍ୱୀକାର କରି ନାହାନ୍ତି। ଏଣୁ କୋର୍ଟ ଅପରାଧୀକୁ ଆଜୀବନ କାରାଦଣ୍ଡାଦେଶ ସହ ୫୦ ହଜାର ଟଙ୍କା ଜରିମନା ନିର୍ଦ୍ଦେଶ ଦେଇଛନ୍ତି।
ସଞ୍ଜାୟ ରାୟକୁ କୋର୍ଟ ଆଜୀବନ ଜେଲଦଣ୍ଡାଦେଶ କରିଥିବା ବେଳେ ରାଜ୍ୟ ସରକାରଙ୍କୁ ପୀଡ଼ିତାଙ୍କ ପରିଜନଙ୍କୁ ୧୭ଲକ୍ଷ ଟଙ୍କା କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଛନ୍ତି। ଏହା ଉପରେ ପୀଡିତାଙ୍କ ଅଭିଭାବକ କହିଛନ୍ତି ଯେ ଆମକୁ କ୍ଷତିପୂରଣର କୌଣସି ଆବଶ୍ୟକତା ନାହିଁ। ସଞ୍ଜୟ ରାୟକୁ କୋର୍ଟ ବିଏନଏସର ଧାରା ୬୪,୬୬ ଓ ୧୦୩(୧) ଅନୁସାରେ ଦୋଷୀ ସାବ୍ୟସ୍ତ କରିଛନ୍ତି। ଏହି ଧାରାମାନଙ୍କରେ ଦୋଷୀଙ୍କୁ ସର୍ବାଧିକ ମୃତ୍ୟୁଦଣ୍ଡ ଅଥବା ଆଜୀବନ ଜେଲଦଣ୍ଡର ବ୍ୟବସ୍ଥା ରହିଛି। ତେବେ ଜଜ ଦୋଷୀଙ୍କୁ ଆଜୀବନ ଜେଲଦଣ୍ଡାଦେଶ କରିଛନ୍ତି।
