ନୂଆଦିଲ୍ଲୀ: ଆହ୍ଲାବାଦ ହାଇକୋର୍ଟଙ୍କ ନିଷ୍ପତ୍ତିକୁ ସୁପ୍ରିମ କୋର୍ଟରେ ଚ୍ୟାଲେଞ୍ଜ। ଜ୍ଞାନବ୍ୟାପୀ ମସ୍ଜିଦ୍ର ପ୍ରତ୍ନତାତ୍ତ୍ୱିକ ସର୍ବେକ୍ଷଣ(ଆର୍କୋଲୋଜିକାଲ ସର୍ଭେ) କରିବା ନେଇ ଆହ୍ଲାବାଦ ହାଇକୋର୍ଟ ଅନୁମତି ଦେଇଥିବାରୁ ଗୁରୁବାର(୩ ଅଗଷ୍ଟ) ମୁସ୍ଲିମ ପକ୍ଷରୁ ଏହା ବିରୋଧରେ ସୁପ୍ରିମକୋର୍ଟରେ ଆବେଦନ କରାଯାଇଛି।
ପ୍ରଧାନ ବିଚାରପତି ଡି.ଇ ଚନ୍ଦ୍ରଚୂଡଙ୍କ ଆଗରେ ଓକିଲ ନିଜାମ ପାଶାଙ୍କ ଦ୍ୱାରା ଏହି ଆବେଦନ କରାଯାଇଛି। ମାମଲାର ତୁରନ୍ତ ଶୁଣାଣି ପାଇଁ ପାଶା ଆବେଦନ କରିଛନ୍ତି। ସେପଟେ ପ୍ରଧାନ ବିଚାରପତିଙ୍କ ନେତୃତ୍ୱରେ ୫ ଜଣିଆ ଖଣ୍ଡପୀଠ ଜାମ୍ମୁ-କାଶ୍ମୀର ଧାରା ୩୭୦ ଉପରେ ଶୁଣାଣି କରୁଛନ୍ତି। ଏହା ଭିତରେ ଜ୍ଞାନବ୍ୟାପୀ ନେଇ ତୁରନ୍ତ ଶୁଣାଣି କରିବା ସମ୍ଭବ ଲାଗୁ ନାହିଁ।
ଆହ୍ଲାବାଦ ହାଇକୋର୍ଟରୁ ସବୁଜ ସଙ୍କେତ ପାଇବା ପରେ ପ୍ରତ୍ନତାତ୍ତ୍ୱିକ ସର୍ଭେ ଅଫ୍ ଇଣ୍ଡିଆ (ASI) ଦଳ ଶୁକ୍ରବାର ଦିନ ବାରାଣାସୀର ଜ୍ଞାନବ୍ୟାପୀ ପରିସରରେ ସର୍ଭେ ଆରମ୍ଭ କରିବେ। ଜିଲ୍ଲା ମାଜିଷ୍ଟ୍ରେଟ୍ ଏସ୍. ରାଜଲିଙ୍ଗମ୍ କହିଛନ୍ତି ଯେ ASI ଶୁକ୍ରବାର ଠାରୁ ଜ୍ଞାନବ୍ୟାପୀ କ୍ୟାମ୍ପସର ସର୍ଭେ କାର୍ଯ୍ୟ ଆରମ୍ଭ କରିବ।
ପଢ଼ନ୍ତୁ-ଜାରି ରହିବ ଜ୍ଞାନବାପୀ ମସଜିଦରେ ASI ସର୍ଭେ, ମୁସଲିମ ପକ୍ଷର ଆବେଦନକୁ ଖାରଜ କଲେ HC
ଏହି ସର୍ଭେ କରିବା ପାଇଁ ସେ ଜିଲ୍ଲା ପ୍ରଶାସନ ଠାରୁ ସହଯୋଗ ଲୋଡିଛନ୍ତି। ତାଙ୍କୁ ସହଯୋଗ ଯୋଗାଇ ଦିଆଯିବ। ସେ କହିଛନ୍ତି ଯେ ସୁରକ୍ଷା ସମ୍ପର୍କରେ ବାରାଣାସୀର ପୋଲିସ କମିଶନରଙ୍କ ସହ ଆଲୋଚନା ହୋଇଛି ଏବଂ ଶୁକ୍ରବାର ଦିନ ଏହି ସର୍ଭେ କରିବାକୁ ଜିଲ୍ଲା ପ୍ରଶାସନ ସମ୍ପୂର୍ଣ୍ଣ ପ୍ରସ୍ତୁତ ଅଛି ବୋଲି ସେ କହିଛନ୍ତି। କାଲି ସକାଳେ ୭ଟାରେ ସର୍ଭେକ୍ଷଣ ଆରମ୍ଭ ହେବ।
ସୁପ୍ରିମକୋର୍ଟରେ ଦ୍ୱାରସ୍ଥ ହୋଇଥିବା ଆଇନଜୀବୀ ପାଶା କହିଛନ୍ତି, "ଆହ୍ଲାବାଦ ହାଇକୋର୍ଟ ଆଜି ଏକ ଆଦେଶ ଦେଇଛନ୍ତି। ଆମେ ଏହି ଆଦେଶ ବିରୋଧରେ ଏକ ଏସଏଲପି ଦାଖଲ କରିଛୁ। ଜୁରୁରୀ ଶୁଣାଣି ପାଇଁ ମୁଁ ଏକ ଇମେଲ ପଠାଇଛି । ସେମାନଙ୍କୁ ସର୍ଭେ ଜାରି କରନ୍ତୁ ନାହିଁ।"
ମୁସଲିମ ପକ୍ଷ ଅଞ୍ଜୁମନ ଇନ୍ତେଜାମିଆ ମସଜିଦ କମିଟି ଦ୍ୱାରା ଦାଖଲ କରାଯାଇଥିବା SLPରେ ଜବାବ ଦେଇ ସିଜେଆଇ ଚନ୍ଦ୍ରଚୂଡ଼ କହିଛନ୍ତି ଯେ ମୁଁ ତୁରନ୍ତ ଇମେଲକୁ ଦେଖିବି।
