ଚାନ୍ଦବାଲି ୧୪/୧୧: ମାଆ ଚାହିଁଛି ଫେରିବ ପୁଅ,୫ ବର୍ଷ ପରେ ଫେରିଲା ମୃତଦେହ । ବାକି ଟଙ୍କା ମାଗିବାରୁ ମାରିଦେଲା ଠିକାଦାର। ଚାନ୍ଦବାଲିରୁ ଆସିଛି ଦାଦନର ଦୟନୀୟ କାହାଣୀ । ପୁଅକୁ ହରାଇ ବୁକୁଫଟା ଚିତ୍କାର କରୁଛି ଦୁଃଖିନୀ ମାଆ । ସବୁ କିଛି ହରାଇ ମୁକ ପାଲଟି ଯାଇଛି ବାପା । ଆପଣ କାହାକୁ ଆଶ୍ବାସନା ଦେବେ ? କାହାକୁ କେଉଁ ଭାଷାରେ ସମବେଦନା ଦେବେ ? ପରିବାରର ରୋଜଗାରିଆ ପୁଅକୁ ଯିଏ ହରାଇଛି ସେ ଜାଣିଛି ତା ମରମ ବେଦନା । ଏମିତି କେତେ ମୃତଦେହ ଭିଟାମାଟିକୁ ଆସିଛି ଆଉ କେତେ ମାଆ କୋଳ ଶୂନ୍ୟ ହୋଇଯାଇଛି । ଚାଖଣ୍ଡେ ପେଟ ପାଇଁ ୨ ମୁଠା ଦାନା ଯୋଗାଡ କରିବାକୁ ଦାଦନ ଯାଇଥିବା ପରିବାର ଆଜି ଉଚ୍ଛନ୍ନ ।
ସୁଦୁର ତାମିଲନାଡୁ ଯାଇ ସୂତା କଳରେ କାମ କରି ଯିଏ ପରିବାର ଚଳାଉଥିଲା ସେ ଆଜି ଆଉ ନାହିଁ । ଘରକୁ ଫେରିଛି ତାର ମୃତଦେହ ।ରୋଜଗାର ଆଶାରେ ଯାଇ ସବୁଦିନ ପାଇଁ ଶୋଇଯାଇଛନ୍ତି ଭଦ୍ରକ ବାଂଶଡା ଥାନା ଖେରଙ୍ଗ ପଞ୍ଚାୟତ ପଳାଶପୁର ଗାଁର ଯୁବକ ସିଦ୍ଧାର୍ଥ ରାଉତ । ଫୋନରେ ପୁଅ କହିଥିଲା ଘରକୁ ଆସୁଛି । ହେଲେ ହଠାତ ତାର ମୃତ୍ୟୁ ଖବର ଶୁଣି ନିଜକୁ ସମ୍ଭାଳି ପାରୁନାହାନ୍ତି ପରିବାର ଲୋକ । କୋହଭରା କଣ୍ଠରେ କହୁଛନ୍ତି ଆମ ପୁଅ ଆତ୍ମହତ୍ୟା କରିନି । ପଇସା ପାଇଁ ଠିକାଦାର ତପନ ମାରିଦେଇଥିବା ଆଣିଛନ୍ତି ସଂଗୀନ ଅଭିଯୋଗ । ନ୍ୟାୟ ପାଇଁ ବାଂଶଡା ଥାନାର ଦ୍ବାରସ୍ଥ ହୋଇଛନ୍ତି ।
ପଳାଶପୁର ଗାଁରେ ରୋଜଗାରର କୌଣସି ମାଧ୍ୟମ ନଥିଲା ।ପେଟ ଚାଖଣ୍ଡକ ପାଇଁ ଘର ଛାଡି ସୁଦୂର ତାମିଲନାଡୁ ଯାଇଥିଲେ ସିଦ୍ଧାର୍ଥ ।ମାତ୍ର ୧୮ ବର୍ଷ ବୟସରେ ଚାନ୍ଦବାଲି ବଳସାହି ଗାଁର ଠିକାଦାର ତପନ ମଲ୍ଲିକଙ୍କ ଭରସାରେ ପହଞ୍ଚିଥିଲେ ତାମିଲନାଡୁରେ । ସେଠାରେ କୋଇଲି ପାଳିୟମ ସ୍ଥିତ ଏକ ସୂତା ମିଲ୍ରେ କାମ କରୁଥିଲେ । ମାସ ଯାକ ପରିଶ୍ରମ ପରେ ତାଙ୍କୁ ଦରମା ଦେଉନଥିଲା ଠିକାଦାର । ପଇସା ମାଗିଲେ ମାଡ ଗାଳି କରିବା ସହ ନିର୍ଯାତନା ବି ମିଳୁଥିଲା । କେବଳ ଖାଇବାକୁ ଦେଇ ସବୁ ଟଙ୍କା ହଡପ କରିନେଉଥିଲା ତପନ । ଏମିତି ଦିନେ କି ଦି ଦିନ ନୁହେଁ ଦୀର୍ଘ ୫ ବର୍ଷ କାଳ ଠିକାଦାର ତପନର ନିର୍ଯାତନାର ଶିକାର ହୋଇଥିଲେ ସିଦ୍ଧାର୍ଥ । ଯେତେବେଳେ ଅସହ୍ୟ ହେଲା ଏ ସଂପର୍କରେ ପରିବାର ଲୋକଙ୍କୁ ଜଣାଇଥିଲେ ।
ମୃତ୍ୟୁର ୩ ଦିନ ପରେ ସିଦ୍ଧାର୍ଥଙ୍କ ମୃତଦେହ ଭିଟାମାଟିରେ ପହଞ୍ଚିବା ପରେ ଶୋକରେ ବୁଡିଛି ପୁରା ଗାଁ । କାନ୍ଦବୋବାଳିରେ ଫାଟି ପଡୁଛି ପରିବେଶ । ସାଙ୍ଗସାଥୀ ପରିବାର ସ୍ବଜନ ସମସ୍ତେ ଝୁରୁଛନ୍ତି ।
ପେଟ ପାଟଣା ପାଇଁ ସିଦ୍ଧାର୍ଥଙ୍କ ପରି ଅନେକ ଯାଉଛନ୍ତି ସତ । ହେଲେ ସେଠାରେ ଅକାଳ ମୃତ୍ୟୁ ଘଟୁଛି । ଅବସ୍ଥା ଏମିତି ହେଉଛି ଯେ ମୃତଦେହ ଆସିବାକୁ ଦିନ ଦିନ ଲାଗିଯାଉଛି । ଦାଦନ ସମସ୍ୟାର ସମାଧାନ ନାଁରେ ଗୋଲାପି ଚିତ୍ର ଦେଖାଉଛନ୍ତି ସରକାର ।ହେଲେ ସିଦ୍ଧାର୍ଥଙ୍କ ଦୁର୍ଦ୍ଦଶାର କାହାଣୀ କହୁଛି ବାସ୍ତବତା କଣ ? ଏବେ ସମୟ କହିବ ତାଙ୍କ ପରିବାରକୁ ନ୍ୟାୟ ମିଳୁଛି କି ନାହିଁ ?
