ପୁରୀ ୦୩/୦୭ : ଆଉ ମାତ୍ର ୪ଦିନ ପରେ ମହାପ୍ରଭୁଙ୍କ ବିଶ୍ୱ ପ୍ରସିଦ୍ଧ ରଥ ଯାତ୍ରା । ଏଣୁ ରଥ ନିର୍ମାଣ ସାରିବାକୁ ବ୍ୟଗ୍ର ନିର୍ମାଣକାରୀ । ମଙ୍ଗଳବାର ରଥରେ ଧ୍ୱଜବତା ଲଗାଯାଇଛି । ଦୁଆରଘଡ଼ାକୁ ମଜଭୁତ କରି ଧରି ରଖେ ଧ୍ୱଜ ବତା । ଧ୍ୱଜବତାରେ କଣ୍ଟା ବାଡ଼ିଆ ହୋଇ ରଥରେ ଫିଟିଂ ହୋଇଛି । ଧ୍ୱଜବତାରେ ମହାପ୍ରଭୁଙ୍କ ଆଜ୍ଞାମାଳ ସ୍ଥାପନ ହେବ ।
ତିନି ରଥରେ ୪ଗୋଟି କରି ୧୨ ଗୋଟି ଧ୍ୱଜବତା ଲାଗିଛି । ଏଥିସହ ରଥରେ କଣ ଫାଉଡ଼ା ଓ ମଣ୍ଡଣି ବତା ଲଗାଯାଇଛି । ପ୍ରତି ଭୂଇଁର କୋଣରେ ୧୨ଟି କଣଫାଉଡ଼ା ଲାଗିଲା । ସେଥିରେ ମଣ୍ଡଣି ବତା ଲଗାଯାଇଛି । ଏହାଯୋଗୁ ରଥ ହୃଷ୍ଟପୃଷ୍ଠ ଓ ସୁନ୍ଦର ଦେଖାଯିବ । ରଥରେ କନାମଣ୍ଡଣିରେ ଏହା ସହାୟକ ହେବ । ଆଗକୁ ରଥର ଚାରିପଟେ ଠେକରାବାଡ ଲାଗିବ । କମାର ସେବକମାନେ ଧୂଳିଦଣ୍ଡା କଣ୍ଟା, ଧ୍ୱଜ ବତା କଣ୍ଟା ତିଆରି ରଥ ଖଳାକୁ ଯୋଗାଇଥିଲେ ।
ସିଂହାସନ ଉପରେ କନକମୁଣ୍ଡି କାମ ଶେଷ ପର୍ଯ୍ୟାୟରେ । କନକମୁଣ୍ଡିରେ ପିତଳ ଚାଦର ବୁଲିବ । ଯେପରି ରଥରେ ଅବସ୍ଥାନ ସମୟରେ ଶ୍ରୀବିଗ୍ରହଙ୍କ ଶ୍ରୀଅଙ୍ଗ ଓଦା ହେବ ନାହିଁ । ରଥ ଉପରେ ଅଁଳାଶ୍ରୀ ଲଗାଇ ରଥ ରକ୍ଷକଙ୍କୁ ସ୍ଥାପନ କରାଗଲେ ରଥକାମ ସରିବ କୁହନ୍ତି ନିର୍ମାଣକାରୀ । ଏବେ ରଥ ଉପରେ ଠାକୁରମାନଙ୍କ ସିଂହାସନ କାମ ଜାରି ରହିଛି । ବିଶ୍ୱକର୍ମାମାନେ ପଟା ବାଡ଼େଇ ସିଂହାସନ ବୁଜିଛନ୍ତି । ବୁଜା ସ୍ଥାନରେ ଗାଈପଲ ଚିତ୍ର କରିଛନ୍ତି ଚିତ୍ରକର ।
ପୂର୍ବରୁ ଧମକ ଉପରେ ଜଗତପୃଷ୍ଠଶ୍ରେଣୀ ରଖିଥିଲେ । ତା’ଉପରେ ପଟା ପଡି ସିଂହାସନ ପରିଛା ପଡିଲା । ପୁଣି ପଟା ପଡ଼ି ଚକା ପଡିବ । ଚକାବେଦିରେ ଠାକୁରେ ଅବସ୍ଥାନ କରିବେ । ବେଦି ପଛପଟେ ରହିବ ପ୍ରଭା । ପ୍ରଥମେ ବିଶ୍ୱକର୍ମାମାନେ ପ୍ରଭା କାମ ସାରିଥିବା ବେଲେ ତା ପରେ ରୁପକାରମାନେ ସେଥିରେ କିର୍ତ୍ତୀମୁଖ ଓ ଉଭୟପାଶ୍ୱର୍ରେ ମଗରମୁଣ୍ଡ କରୁଛନ୍ତି ।
ଓଲଟ ଶୁଆ ଫିଟିଂ ପାଇଁ ନାରାଜ କଣ୍ଟା ୧୨ ଓ କଳସ ଫିଟିଂ ପାଇଁ ବାଗିଆ କଣ୍ଟା ୩୬ଟି ତିଆରୁଛନ୍ତି କମାର ସେବକ । ଚିତ୍ରକରମାନେ ରଥର ଗୁଜ ସମେତ ବିଭିନ୍ନ ଅଂଶକୁ ରଙ୍ଗଦେଇ ସୌନ୍ଦର୍ଯ୍ୟପୂର୍ଣ୍ଣ କରୁଛନ୍ତି । ପାଶ୍ୱର୍ଦେବାଦେବୀଙ୍କୁ ରଙ୍ଗ କରିବାରେ ଚିତ୍ରକର ନିମଗ୍ନ ରହିଛନ୍ତି । ଶ୍ରୀମନ୍ଦିର କାର୍ଯ୍ୟାଳୟ ଉପର ମହଲାରେ ରଥ କନାମଣ୍ଡଣି କାର୍ଯ୍ୟ ଆଗେଇ ଚାଲିଛି ।
