ନୂଆଦିଲ୍ଲୀ: ୟୁରୋ କପ୍ ଚାମ୍ପିଅନସିପରେ ରୋମାନିଆର ଗର୍ଜନ । ୟୁକ୍ରେନକୁ ୩-୦ ଗୋଲରେ ପରାସ୍ତ କରିଛି ଦଳ । ୟୁରୋପ ଫୁଟବଲରେ ଦୁର୍ବଳ ଦଳ କୁହାଯାଉଥିବା ରୋମାନିଆ ଐତିହାସିକ ବିଜୟ ହାସଲ କରିଛି । ଗ୍ରୁପ୍-ଇ’ ଲିଗ ପର୍ଯ୍ୟାୟ ମ୍ୟାଚ୍ରେ ୟୁକ୍ରେନକୁ ପରାସ୍ତ କରିଛି । ୟୁରୋ ଚାମ୍ପିଅନ୍ସିପ୍ ଇତିହାସରେ ଏହା ରୋମାନିଆର ଦ୍ୱିତୀୟ ବିଜୟ । ବିଶ୍ୱକପ୍ ଓ ୟୁରୋକୁ ମିଶାଇ ରୋମାନିଆ ମୋଟ୍ ୧୭ଟି ମ୍ୟାଚ୍ ଖେଳିଛି ଓ ଏଥିରୁ ୫ଟି ମ୍ୟାଚ୍ ଡ୍ର’ କରିଥିବାବେଳେ ୧୦ ମ୍ୟାଚ୍ରେ ପରାଜୟର ସାମ୍ନା କରିଛି । ଶେଷ ଥର ପାଇଁ ରୋମାନିଆ ୨୦୦୦ ମସିହାରେ ୟୁରୋ ଚାମ୍ପିଅନ୍ସିପ୍ର ଏକ ମ୍ୟାଚ୍ରେ ଇଂଲଣ୍ଡକୁ ୩-୨ ଗୋଲ୍ରେ ପରାଜିତ କରିଥିଲା ।
ମ୍ୟାଚ୍ ଆରମ୍ଭରୁ ଶେଷ ପର୍ଯ୍ୟନ୍ତ ୟୁକ୍ରେନ୍ ପ୍ରଭାବ ବିସ୍ତାର କରିଥିଲା । ମ୍ୟାଚରେ ୭୨ ପ୍ରତିଶତ ସମୟ ୟୁକ୍ରେନ୍ ଖେଳାଳିଙ୍କ ନିକଟରେ ବଲ୍ ରହିଥିଲା । ମାତ୍ର ରୋମାନିଆ ସୀମିତ ସୁଯୋଗର ସଦୁପଯୋଗ କରି ବିଜୟୀ ହାସଲ କରିଛି । ୯୦ମିନିଟ୍ ମଧ୍ୟରେ ରୋମାନିଆ ମାତ୍ର ୯ଟି ସୁଯୋଗ ସୃଷ୍ଟି କରିଥିଲା ଓ ଏଥିରୁ ୩ଟି ଗୋଲ୍ ହୋଇଥିଲା । ଅନ୍ୟପଟେ ୟୁକ୍ରେନ୍ ୧୩ଟି ସୁଯୋଗ ହାତଛଡ଼ା କରିଥିଲା । ମ୍ୟାଚ୍ ଆରମ୍ଭରୁ ୟୁକ୍ରେନ୍ର ପଲା ଭାରି ରହିଥିଲା । ରୋମାନିଆ ନିକଟରେ ସେଭଳି କୌଣସି ତାରକା ଖେଳାଳି ନଥିଲେ । ତଥାପି ୨୯ତମ ମିନିଟ୍ରେ ନିକୋଲାଇ ଷ୍ଟାନସିୟୁ ଏକ ଗୋଲ୍ କରିବା ପରେ ମ୍ୟାଚ୍ର ରୂପରେଖ ବଦଳି ଯାଇଥିଲା । ୟୁକ୍ରେନ୍ ଲୟ ହରାଇ ବସିଥିଲା ଏବଂ ରୋମାନିଆ ଟ୍ରାକକୁ ଫେରିଥିଲା ।
ମ୍ୟାଚର ଦ୍ୱିତୀୟାର୍ଦ୍ଧରେ ରୋମାନିଆ ଆଉ ୨ଟି ଗୋଲ୍ କରିଥିଲା । ୫୩ତମ ମିନିଟ୍ରେ ରଜଭାନ ମାରିନ ଓ ୫୭ତମ ମିନିଟ୍ରେ ଡେନିସ ଡ୍ରାଗସ ଏହି ଗୋଲ୍ କରିଥିଲେ । ମିଡ୍ ଫିଲ୍ଡର ଡେନିସ ମାନ୍ ୨ଟି ଗୋଲ୍ରେ ସହାୟତା କରିଥିଲେ ।
ସେପଟେ ଫୁଟବଲ୍ ତାରକାଙ୍କ ଭଣ୍ଡାର ଥିବା ଫ୍ରାନ୍ସ ଚଳିତ ୟୁରୋ ଚାମ୍ପିଅନସିପ୍ରେ ସହଜ ବିଜୟ ସହ ଅଭିଯାନ ଆରମ୍ଭ କରିଛି । ଗ୍ରୁପ୍-ଡି’ରେ ଫ୍ରାନ୍ସ ଅଷ୍ଟ୍ରୀୟାକୁ ଭେଟିଥିଲା । କେବଳ ମାକ୍ସିମିଲାନ ଓବରଙ୍କ ଏକ ତ୍ରୁଟିକୁ ଛାଡ଼ିଦେଲେ ଅଷ୍ଟ୍ରୀୟା ସମ୍ପୂର୍ଣ୍ଣ ୯୦ ମିନିଟ୍ ଯାକ କଡ଼ା ଟକ୍କର ଦେଇଥିଲା । ୨୦୨୨ ବିଶ୍ୱକପ୍ ରନର୍ସ ଅପ୍ ଫ୍ରାନ୍ସ ଦକ୍ଷତା ମୁତାବକ ପ୍ରଦର୍ଶନ କରିବାରେ ବିଫଳ ହୋଇଥିଲା । ଅନେକ ସୁଯୋଗ ହାତଛଡ଼ା କରିଥିଲା ଫ୍ରାନ୍ସ । ଅବଶ୍ୟ ଅଷ୍ଟ୍ରୀୟା ଅଧିକ ସମୟ ବଲ୍କୁ ନିୟନ୍ତ୍ରଣରେ ରଖିଥିଲା । ୩୮ତମ ମିନିଟ୍ରେ ଓବର ଫ୍ରାନ୍ସ ଫରୱାର୍ଡ କିଲିଆନ ଏମ୍ବାପେଙ୍କୁ ଅଟକାଇବାକୁ ପ୍ରୟାସ କରି ତ୍ରୁଟି କରିଥିଲେ । ବଲ୍କୁ ନିୟନ୍ତ୍ରଣ କରିନପାରି ଓବର ନିଜ ଗୋଲ୍ ପୋଷ୍ଟରେ ବଲ୍ ପହଞ୍ଚାଇ ଦେଇଥିଲେ । ଫଳରେ ଫ୍ରାନ୍ସ ଅଗ୍ରଣୀ ହାସଲ କରିଥିଲା ।
