ନୂଆଦିଲ୍ଲୀ: ଆଉ କେଇ ଘଣ୍ଟା ପରେ ଭାରତ ଓ ଅଷ୍ଟ୍ରେଲିଆ ମଧ୍ୟରେ ଆରମ୍ଭ ହୋଇଯିବ ବହୁ ପ୍ରତୀକ୍ଷିତ ବର୍ଡର-ଗାଭାସ୍କର ଟ୍ରଫି। ପାଞ୍ଚ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ର ପ୍ରଥମ ମ୍ୟାଚ୍ ଆସନ୍ତାକାଲି ପର୍ଥରେ ଭାରତୀୟ ସମୟ ସକାଳ ୭ଟା ୩୦ରେ ଆରମ୍ଭ ହେବ। ରୋହିତ ଶର୍ମା ଉପଲବ୍ଧ ନ ଥିବାରୁ ଯଶପ୍ରୀତ ବୁମରା ଦଳର ମଙ୍ଗ ସମ୍ଭାଳିବେ। ମ୍ୟାଚ୍ର ଅବ୍ୟବହିତ ପୂର୍ବରୁ ଯଶପ୍ରୀତ ବୁମରା ସାମ୍ବାଦିକ ସମ୍ମିଳନୀ କରିଛନ୍ତି। ଆଉ ଅନେକ ପ୍ରଶ୍ନର ଉତ୍ତର ରଖିଛନ୍ତି। ବରିଷ୍ଠ ଦ୍ରୁତ ବୋଲର ମହମ୍ମଦ ଶାମି ଅଷ୍ଟ୍ରେଲିଆରେ ଟେଷ୍ଟ ସିରିଜ୍ ସମୟରେ ଦଳକୁ ଫେରିବେ କି ନାହିଁ ତା ଉପରେ ବୁମରା ଗୁରୁତ୍ଵପୂର୍ଣ୍ଣ ସୂଚନା ଦେଇଛନ୍ତି।
ମ୍ୟାଚ୍ ପୂର୍ବରୁ ଆୟୋଜିତ ସାମ୍ବାଦିକ ସମ୍ମିଳନୀରେ ବୁମରା କହିଛନ୍ତି, ଶାମି ଭାଇ କ୍ରିକେଟ୍ ଖେଳିବା ଆରମ୍ଭ କରି ଦେଇଛନ୍ତି। ସେ ଦଳର ଜଣେ ଗୁରୁତ୍ଵପୂର୍ଣ୍ଣ ଖେଳାଳି। ମୋତେ ପୂର୍ଣ୍ଣ ବିଶ୍ଵାସ ଦଳ ପ୍ରବନ୍ଧକ ତାଙ୍କ ଉପରେ ନଜର ରଖିଛନ୍ତି। ଆଶା କରୁଛି ଆପଣ ତାଙ୍କୁ ଅଷ୍ଟ୍ରେଲିଆରେ ଦେଖିବାକୁ ପାଇବେ।ଉଲ୍ଲେଖନୀୟ କିଛି ମିଡ଼ିଆରେ ପ୍ରକାଶିତ ଖବର ଅନୁଯାୟୀ, ଅଧିନାୟକ ରୋହିତ ଶର୍ମାଙ୍କ ସହ ମହମ୍ମଦ ଶାମି ଅଷ୍ଟ୍ରେଲିଆ ଯାତ୍ରା କରିବେ ଏବଂ ଆଡିଲେଡ୍ ଟେଷ୍ଟ ପୂର୍ବରୁ ଭାରତୀୟ ଦଳରେ ଯୋଗ ଦେବେ।
ପ୍ରଥମ ଟେଷ୍ଟ ଆସନ୍ତାକାଲି ପର୍ଥରେ ଖେଳାଯିବ। ଏହା ପରେ ଦ୍ଵିତୀୟ ଟେଷ୍ଟ ଡିସେମ୍ବର ୬ରୁ ଆଡିଲେଡ୍ରେ ଦିବାରାତ୍ର ଖେଳାଯିବ। ପ୍ରଥମ ଓ ଦ୍ଵିତୀୟ ଟେଷ୍ଟ ମଧ୍ୟରେ ଲମ୍ବା ବ୍ରେକ ରହିଛି। ତେଣୁ ଏହି ସମୟରେ ଉଭୟ ଖେଳାଳି ଦଳ ସହ ଯୋଗ ଦେଇ ପାରନ୍ତି।
