ନୂଆଦିଲ୍ଲୀ ୧୫।୩: ଆମେରିକାର ଟ୍ରମ୍ପ ପ୍ରଶାସନ ଖୁବ୍ ଶୀଘ୍ର ୪୧ ଦେଶଙ୍କ ଉପରେ କଡ଼ା କଟକଣା ଲାଗୁ କରିବାକୁ ବିଚାର କରୁଛି। ନ୍ୟୁଜ ଏଜେନ୍ସୀ ରୟଟର୍ସ ଅନୁସାରେ ଏକ ଇଟର୍ଣ୍ଣାଲ ମେମୋରେ ୧୨ରୁ ଅଧିକ ଦେଶର ନାଗରିକଙ୍କ ଉପରେ ଯାତ୍ରା କଟକଣା ଲାଗୁ ହୋଇପାରେ। ମେମୋରେ ୪୧ ଦେଶଙ୍କ ତାଲିକା ରହିଛି। ଯେଉଁଗୁଡିକୁ ୩ ଅଲଗା ଅଲଗା ସମୂହରେ ବିଭାଜିତ କରାଯାଇଛି। ଏହି ସୂଚୀରେ ପାକିସ୍ତାନର ମଧ୍ୟ ନାମ ରହିଛି। ଏଣୁ ପାକିସ୍ତାନୀ ନାଗରିକଙ୍କ ନିମନ୍ତେ ଆମେରିକା ଯିବା ଏବେ କଷ୍ଟକର ହେବ।
ମେମୋର ପ୍ରଥମ ସମୂହରେ ୧୦ଟି ଦେଶଙ୍କୁ ରଖା ଯାଇଛି। ଏଥିରେ ଆଫଗାନିସ୍ତାନ, ଇରାନ, ସିରିୟା, କ୍ୟୁବା ଓ ଉତ୍ତରକୋରିଆ ଭଳି ଦେଶଙ୍କୁ ରଖା ଯାଇଛି। ଏହି ସବୁ ଦେଶର ନାଗରିକଙ୍କ ଭିସା ଉପରେ ସମ୍ପୂର୍ଣ୍ଣ କଟକଣା ଜାରି ହେବ। ସେହିପରି ଦ୍ୱିତୀୟ ସମୂହରେ ୫ଟି ଦେଶ ଇରିଟ୍ରିୟା, ହାଇତୀ, ଲାଓସ, ମ୍ୟାଁମାର ଓ ଦକ୍ଷିଣ ସୁଦାନ ଅଛନ୍ତି। ଏହି ଦେଶର ନାଗରିକଙ୍କୁ ଭିସା ଜାରି କରିବାରେ ଆଂଶିକ କଟକଣା ରହିବ। ଏଣୁ ପର୍ଯ୍ୟଟକଙ୍କ ସହିତ ଛାତ୍ର ଭିସା ଓ ଅନ୍ୟ ଅପ୍ରବାସୀ ଭିସା ପ୍ରଭାବିତ ହେବ ବୋଲି ଆଶଙ୍କା କରାଯାଉଛି।
ତୃତୀୟ ସମୂହରେ ୨୬ଟି ଦେଶ ଅଛନ୍ତି। ଏଥିରେ ବେଲାଋଷ, ପାକିସ୍ତାନ ଓ ତୁର୍କିମେନିସ୍ତାନ ଭଳି ଦେଶମାନେ ଅଛନ୍ତି। ଏହି ସବୁ ଦେଶଙ୍କ ନାଗରିକଙ୍କୁ ଭିସା ଜାରି କରିବାରେ ଆଂଶିକ କଟକଣା ଲାଗୁ ହେବ। ତେବେ ଏହି ଦେଶମାନଙ୍କୁ ୬୦ ଦିନ ମଧ୍ୟରେ ସୁରକ୍ଷା ସମ୍ପର୍କିତ ଅଭାବ ଦୂର କରିବାକୁ ସୁଯୋଗ ଦିଆଯିବ। ଜନୈକ ଆମେରିକୀୟ ଅଧିକାରୀଙ୍କ ଅନୁସାରେ ଏହି ସୂଚୀ ପରିବର୍ତ୍ତନ ହୋଇପାରେ। ଏଥିରୁ କିଛି ଦେଶଙ୍କୁ ହଟାଇ ମଧ୍ୟ ଦିଆଯାଇପାରେ ଓ କିଛି ନୂଆ ଦେଶଙ୍କୁ ଯୋଡା ଯାଇପାରେ। ତେବେ ଚୂଡ଼ାନ୍ତ ସୂଚୀ ପ୍ରଶାସନର ମଞ୍ଜୁରୀ ପରେ ଜାରି ହେବ।
ଯଦି ଟ୍ରମ୍ପ ପ୍ରଶାସନ ଭିସା କଟକଣା ଜାରି କରେ ଏହା ନୂଆ ନୀତି ହେବ ନାହିଁ। କାରଣ ଅତୀତରେ ଡୋନାଲ୍ଡ ଟ୍ରମ୍ପ ମୁସଲମାନ ବହୁଳ ୭ଟି ଦେଶଙ୍କ ନାଗରିକଙ୍କ ନିମନ୍ତେ ଯାତ୍ରା କଟକଣା ଜାରି କରିଥିଲେ, ଯାହାକୁ ୨୦୧୮ ମସିହାରେ ସୁପ୍ରିମକୋର୍ଟ ମଧ୍ୟ କାୟମ ରଖିଥିଲେ। ଡୋନାଲ୍ଡ ଟ୍ରମ୍ପ ରାଷ୍ଟ୍ରପତି ଭାବେ ଦାୟିତ୍ୱ ଗ୍ରହଣ କରିବା ସହ ଜାନୁୟାରୀ ୨୦ରେ ଏକ କାର୍ଯ୍ୟକାରୀ ଆଦେଶ ଜାରି କରିଥିଲେ। ଏଥିରେ ଆମେରିକାରେ ପ୍ରବେଶ ଚାହୁଁଥିବା ବିଦେଶୀ ନାଗରିକଙ୍କ ସୁରକ୍ଷା ଯାଞ୍ଚକୁ ଅଧିକ କଠୋର କରିବାକୁ କୁହାଯାଇଥିଲା।
