ନୂଆଦିଲ୍ଲୀ ୧୬।୧୦: ଏଣିକି ଡ୍ରାଇଭିଂ ଟେଷ୍ଟରେ କରାଯିବନି କୌଣସି ମାନବ ହସ୍ତକ୍ଷେପ । ପାସ ଓ ଫେଲର ନିଷ୍ପତ୍ତି ନେବ ମେସିନ । ଏଣିକି ଡ୍ରାଇଭିଂ ଟେଷ୍ଟର ମୂଲ୍ୟାୟନ କରିବ ଏଆଇ । ଗତବର୍ଷ ୬ଟି ସ୍ଥାନରେ ପରୀକ୍ଷାମୂଳକ ଭାବେ ଏହି ବ୍ୟବସ୍ଥାର ପ୍ରୟୋଗ କରାଯାଇଥିଲା। ଏହା ସଫଳ ହୋଇଛି । ପ୍ରାଥମିକ ପର୍ଯ୍ୟାୟରେ ୧୯ଟି ସ୍ଥାନରେ କରାଯିବ । ଏନେଇ ଶେଷ ପର୍ଯ୍ୟାୟରେ ପହଞ୍ଚିଛି ଏଆଇ ଟେଷ୍ଟିଂ । ଖୁବଶୀଘ୍ର ଏହାକୁ କରାଯିବ ଉଦଘାଟନ ।
ଡ୍ରାଇଭିଂ ଟେଷ୍ଟିଂ ବେଳେ ସ୍ୱଚ୍ଛତା ରହୁନଥିବା ଅଭିଯୋଗ ଆସୁଥିଲା। ଡ୍ରାଇଭିଂ ନଜାଣି ଲାଇସେନ୍ସ ପାଇବା କାରଣରୁ ରାସ୍ତାରେ ଦୁର୍ଘଟଣା ହେଉଛି । ଏଥିରେ ସ୍ୱଚ୍ଛତା ଆଣିବା ପାଇଁ ପରିବହନ ବିଭାଗ ସ୍ୱୟଂଚାଳିତ ଯାନ ପରୀକ୍ଷା ପ୍ରଣାଳୀକୁ ଆପଣାଇଛି । ଏହାଦ୍ୱାରା ପରୀକ୍ଷା କରାଯାଉଥିବା ଟ୍ରାକକୁ ଅତ୍ୟାଧୁନିକ ଜ୍ଞାନକୌଶଳରେ ବିକଶିତ କରାଯାଉଛି। ଟ୍ରାକରେ କ୍ୟାମେରା, ସେନସର ଓ ରେଡାର ଦ୍ୱାରା ପରିଚାଳନା କରାଯିବ ।
ପରୀକ୍ଷା ଦେବାକୁ ଆସୁଥିବା ଗାଡି ଚାଳକ ଜଣକ କୌଣସି ତୃଟି କରିବା ମାତ୍ରେ ମେସିନ ସଙ୍ଗେ ସଙ୍ଗେ ଜଣାଇଦେବ ଏବଂ ପରୀକ୍ଷା ଦେଉଥିବା ଚାଳକ ଜଣକ ପାସ କି ଫେଲ ତାହା ମଧ୍ୟ ନିର୍ଦ୍ଧାରଣ କରିଦେବ । କ୍ୟାମେରା ଜରିଆରେ ଚାଳକ ଜଣକ ଠିକ ଭାବେ ଗାଡି ଚାଳନା କରୁଛନ୍ତି ନା ନାହିଂ ତାହା ପ୍ରମାଣ ରହିବ । ଏପରିକି ଯଦି କେହି ଅଭିଯୋଗ କରନ୍ତି ତେବେ ତାଙ୍କୁ ପ୍ରମାଣ ସ୍ୱରୂପ ଦେଖାଇ ମଧ୍ୟ ଦିଆଯାଇପାରିବ ବୋଲି ଜଣାପଡ଼ିଛି।
