କନ୍ଧମାଳ ୧୩/୧୧: ସ୍କୁଲ ଟଏଲେଟରୁ ମିଳିଲା ଛାତ୍ରଙ୍କ ଝୁଲନ୍ତା ମୃତଦେହ । ହତ୍ୟା ଅଭିଯୋଗ ଆଣିଲେ ପରିବାର ଲୋକ । କନ୍ଧମାଳ ଜିଲ୍ଲା ଖଜୁରୀପଡା ଥାନା ଆର୍‌.ନୂଆଗାଁ କଳିଙ୍ଗ ଆଦର୍ଶ ଆବାସିକ ବିଦ୍ୟାଳୟରେ ଛାତ୍ରଙ୍କ ଅସ୍ବାଭାବିକ ମୃତ୍ୟୁକୁ ନେଇ ଆଲୋଡନ । ଛାତ୍ର ନିବାସରେ ଜଣେ ଦଶମ ଶ୍ରେଣୀ ଛାତ୍ର ବେକରେ ଗାମୁଛା ବାନ୍ଧି ଜୀବନ ହାରିଥିବା କୁହାଯାଉଛି । ମୃତକ ଆନନ୍ଦେଶ୍ବର ମଲ୍ଲିକ । ବୁଧବାର ସକାଳୁ ଅନ୍ୟ ଛାତ୍ରମାନେ ଶୌଚାଳୟ ଯିବା ସମୟରେ ଆନନ୍ଦେଶ୍ବରଙ୍କ ମୃତଦେହ ଦେଖି ହଷ୍ଟେଲ ଇନଚାର୍ଜଙ୍କୁ ଜଣାଇଥିଲେ । ଖବର ପାଇ ଖଜୁରୀପଡା ଥାନା ପୋଲିସ ପହଞ୍ଚିଥିଲେ । ପରିବାର ଲୋକଙ୍କ ଉପସ୍ଥିତିରେ ତାଙ୍କ ମୃତଦେହ ଉଦ୍ଧାର କରାଯାଇଥିଲା । ପୁଅକୁ ହତ୍ୟା କରାଯାଇଥିବା ଅଭିଯୋଗ ଆଣିଛନ୍ତି ପରିବାର ଲୋକ । ବିଭିନ୍ନ ଦିଗକୁ ନେଇ ଛାନ୍‌ଭିନ୍‌ କରୁଛି ପୋଲିସ ।