ଭୁବନେଶ୍ୱର,୨୬/୧୦: ବାତ୍ୟା ଦାନା ପ୍ରଭାବରେ ମାସ ଶେଷ ଯାଏ ପାଗ ମେଘୁଆ ରହିବ। ବିଭିନ୍ନ ସ୍ଥାନରେ କାଁ ଭାଁ ବର୍ଷା ହେବ। ଶନିବାରଠୁ ବର୍ଷା ପ୍ରାୟତଃ କମିଯିବ । ୩୧ ତାରିଖ ତଥା ଦୀପାବଳି ଦିନ ସୁନ୍ଦରଗଡ଼, ଝାରସୁଗୁଡ଼ା ସମେତ ଉତ୍ତର ପଶ୍ଚିମ ଆଭ୍ୟନ୍ତରରେ ବର୍ଷା ହୋଇପାରେ ବୋଲି ବରିଷ୍ଠ ପାଣିପାଗ ବିଶେଷଜ୍ଞ ପ୍ରଫେସର ସୁରେନ୍ଦ୍ରନାଥ ପଶୁପାଳକ ଆକଳନ କରିଛନ୍ତି ।
ଗତ କିଛି ସପ୍ତାହ ଧରି ରାଜ୍ୟରେ ପାଗ ଖରାଟିଆ ହେଉଥିଲା । ବାୟୁମଣ୍ଡଳରେ ଆର୍ଦ୍ରତା ଅଧିକ ରହିବା ଯୋଗୁ ଭୀଷଣ ଗୁଳୁଗୁଳି ଅନୁଭୂତ ହେଉଥିଲା । ଦିନରେ ଖରାଦିନ ଭଳି ଟାଣ ଖରା ଓ ଗରମ ଅନୁଭୂତ ହେଉଥିଲା । ପୂର୍ବ କେନ୍ଦ୍ରୀୟ ବଙ୍ଗୋପସାଗରରେ ବାତ୍ୟା ସ୍ଥିତି ପରେ ପାଗ ଥଣ୍ଡା ପଡ଼ିଯାଇଛି । ଗତ ୨ଦିନ ଧରି ରାତି ବେଳା ସାମାନ୍ୟ ଥଣ୍ଡା ଅନୁଭୂତ ହେଉଛି ।
ଗୁରୁବାର ଫୁଲବାଣୀରେ ରାତିର ତାପମାତ୍ରା ସବୁଠୁ କମ୍ ବା ୧୭.୫ ଡିଗ୍ରୀ, ଅନୁଭୂତ ହୋଇଥିଲା । ଦାରିଙ୍ଗିବାଡ଼ି, ଢେଙ୍କାନାଳ, ଅନୁଗୁଳ, ନବରଙ୍ଗପୁର ଭଳି ସ୍ଥାନରେ ରାତିରେ ଥଣ୍ଡା ପଡ଼ିଥିଲା । ଏହି ୫ଟି ସ୍ଥାନର ତାପମାତ୍ରା ୨୦ ଡିଗ୍ରୀ ତଳେ ରହିଥିଲା । ଆଗକୁ ମଧ୍ୟ ଏହିଭଳି କୋହଲା ପାଗ ଜାରି ରହିବ ବୋଲି ପାଣିପାଗ ବିଶେଷଜ୍ଞମାନେ ପୂର୍ବାନୁମାନ କରିଛନ୍ତି ।
ସୋଆ ଜଳବାୟୁ ଓ ପରିବେଶ କେନ୍ଦ୍ର ନିର୍ଦ୍ଦେଶକ ଡକ୍ଟର ଶରତ ଚନ୍ଦ୍ର ସାହୁ କହିଛନ୍ତି, ଶନିବାର ପାଗ ମେଘୁଆ ରହିବ । ବାତ୍ୟା ଦାନା ଦୁର୍ବଳ ହୋଇ ଲଘୁଚାପ ଅବସ୍ଥାକୁ ଆସିବା ସହ ସନ୍ଧ୍ୟା ପରେ ମିଳେଇ ଯାଇପାରେ । ୨୭ରୁ ପାଗ ଫିଟିବ । ତା’ ପରେ ଆଉ ବିଶେଷ ବର୍ଷା ସମ୍ଭାବନା ନାହିଁ ।
ପ୍ରଫେସର ପଶୁପାଳକ ଚାଷୀଙ୍କୁ ପରାମର୍ଶ ଦେଇ କହିଛନ୍ତି, ଯେଉଁମାନଙ୍କର ଫସଲ ନଷ୍ଟ ହୋଇଛି ସେମାନେ ଆଗାମୀ ରବି ଫସଲ ପାଇଁ ନିଜ ଜମିକୁ ପ୍ରସ୍ତୁତ କରନ୍ତୁ । ସମୁଦ୍ର ନିକଟବର୍ତ୍ତୀ ଅଞ୍ଚଳ ବା ପୁରୀ, ଜଗତସିଂହପୁରର ଖାଲୁଆ ଜମିରେ ନଭେମ୍ବର ମାସରେ ଧାନ ଚାଷ କରନ୍ତୁ । ସମୁଦ୍ର ପାଣି ମାଡ଼ି ଆସିଥିଲେ ଲୁଣି ପାଣିକୁ ସହି ପାରୁଥିବା କିସମର ଧାନ ବିହନ ଲଗାନ୍ତୁ । କମ୍ ଦିନିଆ ବୁଟ କିସମ ମଧ୍ୟ ଲୁଣା ମାଟିରେ ଭଳ ଅମଳ କ୍ଷମ ହୋଇପାରିବ । ଉପକୂଳବର୍ତ୍ତୀ ଅଞ୍ଚଳରେ ଦେଶୀ ମୁଗ ଚାଷ କରିପାରିବେ ।
ଶୀତ ଅଧିକ ଅନୁଭୂତ ହେଉଥିବା ସ୍ଥାନରେ ମୁଗ କିସମ ଲାଗି ପାରିବ । ରବି ପନିପରିବା ଲଗାନ୍ତୁ । ଏବେ ଚିନାବାଦାମ, ସୂର୍ଯ୍ୟମୁଖୀ ଓ ସୋରିଷ ଲଗାଇପାରିବେ । ଯେଉଁମାନଙ୍କର ଧାନ ପାଚିଯାଇଛି କିନ୍ତୁ ବିଲରୁ କଟାଯାଇନି, ସେମାନେ ତୁରନ୍ତ କାଟି ନିରାପଦ ସ୍ଥାନ ରଖନ୍ତୁ । ନଚେତ୍ ୩ ପ୍ରତିଶତ ଲୁଣି ପାଣି ସିଞ୍ଚନ କରନ୍ତୁ । ଯେଉଁ ସ୍ଥାନରେ ବାତ୍ୟା ଜନିତ ବର୍ଷା ହୋଇନି ଓ ଝିପିଝିପି ବର୍ଷା ଲାଗି ରହିଛି, ସେଠାରେ ଚକଡ଼ା ପୋକର ପ୍ରାର୍ଦୁଭାବ ବଢ଼ିପାରେ । ଏହାକୁ ଦମନ କରିବାକୁ ପଦକ୍ଷେପ ନେବାକୁ ପରାମର୍ଶ ଦେଇଛନ୍ତି ।