ମୁମ୍ବାଇ,୦୯/୦୧: ଭାରତୀୟ ସେୟାର ବଜାରକୁ ନେଇ ଆଶାବାଦୀ ସିଟି ଗ୍ରୁପ୍ । ପୁଞ୍ଜି ବଜାରକୁ ନେଇ କିଛି ଭିନ୍ନ ରିପୋର୍ଟ ପ୍ରକାଶ କରିଛି ଆମେରିକାର ଏହି ପ୍ରମୁଖ ବ୍ୟାଙ୍କ । ଭାରତର ୫ ଟ୍ରିଲିୟନ ଡଲାର ସେୟାର ବଜାରରେ ଲଗାତର ଦଶମ ବର୍ଷ ବୃଦ୍ଧି ଦେଖିବାକୁ ମିଳିବ । ବ୍ୟାଙ୍କର ରିପୋର୍ଟ ମୁତାବକ, ଆର୍ଥିକ ବିକାଶରେ ସୁଧାର ସହ ମଜଭୁତ୍ କର୍ପୋରେଟ୍ ଆୟ ଯୋଗୁ ଘରୋଇ ସେୟାର୍ ବଜାରରେ ଦ୍ରୁତ ବୃଦ୍ଧି ଅନୁମାନ ରହିଛି । ଏହା ଚଳିତ ବର୍ଷ ୧୮% ପର୍ଯ୍ୟନ୍ତ ବଢ଼ିପାରେ ବୋଲି କୁହାଯାଇଛି ।
ଚଳିତବର୍ଷ ନ୍ୟାସ୍ନାଲ ଷ୍ଟକ୍ ଏକ୍ସଚେଞ୍ଜ ନିଫ୍ଟି ୫୦ ସୂଚକାଙ୍କ ୨୬,୦୦୦ ପଏଣ୍ଟ ଛୁଇଁବ ବୋଲି ପୂର୍ବାନୁମାନ କରିଛି ସିଟି ଗ୍ରୁପ୍ । ଅର୍ଥାତ୍ ଏ ବର୍ଷ ୧୦% ବୃଦ୍ଧି ଦେଖିବାକୁ ମିଳିବ । ଗତବର୍ଷ ସିଟି ବ୍ୟାଙ୍କ ପକ୍ଷରୁ ୨୨,୫୦୦ ପଏଣ୍ଟ ପର୍ଯ୍ୟନ୍ତ ନିଫ୍ଟି ଯିବ ବୋଲି ଆକଳନ କରିଥିଲା । ହେଲେ ଏହାଠାରୁ ୫% ଅଧିକ ବଢ଼ିଥିଲା ନିଫ୍ଟି ।
ବ୍ୟାଙ୍କ ପକ୍ଷରୁ କୁହାଯାଇଛି, ପୁଞ୍ଜି ବଜାରରେ ତାଲିକାଭୁକ୍ତ କମ୍ପାନିଗୁଡ଼ିକର ବିବିଧ ବ୍ୟବସାୟକୁ ଦୃଷ୍ଟିରେ ରଖି ଭାରତର ଅଭିବୃଦ୍ଧି ଦୃଶ୍ୟପଟ ମଜଭୁତ ଏବଂ ଅପେକ୍ଷାକୃତ କମ୍ ରିସ୍କପୂର୍ଣ୍ଣ ଲାଗୁଛି । କିଛି ନୀତିଗତ ସହାୟତା ସହ ବର୍ଷ ୨୦୨୫ରେ ଅର୍ଥନୀତି ୬.୫% ଅଭିବୃଦ୍ଧିକୁ ଫେରିପାରେ । କିନ୍ତୁ ଘରୋଇ ନିବେଶରେ ମଜଭୁତ ସୁଧାର ଏତେ ଶୀଘ୍ର ଆସିନପାରେ ।
ସିଟି ଗ୍ରୁପ୍ ପୂର୍ବରୁ ମୋର୍ଗାନ ଷ୍ଟେନ୍ଲୀ ବି ଭାରତୀୟ ବଜାର ପାଇଁ ଦୁଇ ଅଙ୍କ ରିଟର୍ଣ୍ଣର ଭବିଷ୍ୟବାଣୀ କରିଥିଲା । ବ୍ରୋକରେଜ୍ ସଂସ୍ଥାର କହିବାନୁସାରେ, ବିଏସ୍ଇ ସେନ୍ସେକ୍ସ ୨୦୨୫ରେ ୧୮% ରିଟର୍ଣ୍ଣ ଦେବ । ଏହାର କାରଣ ହେଉଛି ଖୁଚୁରା କ୍ରୟ ନୂଆ ସେୟାର ଯୋଗାଣଠାରୁ ଆଗରେ ରହିବ । ୨୦୨୪ରେ ବ୍ୟକ୍ତିଗତ ନିବେଶକ ନ୍ୟାସ୍ନାଲ ଷ୍ଟକ୍ ଏକ୍ସଚେଞ୍ଜ ଅଫ୍ ଇଣ୍ଡିଆ ଲିମିଟେଡ୍ରେ ୧.୫ ଲକ୍ଷ କୋଟି ଟଙ୍କାର ସେୟାର କିଣିଛନ୍ତି, ଯାହା ଏକ ରେକର୍ଡ । ବଜାର ବିଶେଷଜ୍ଞମାନଙ୍କ କହିବାନୁସାରେ, ମଜଭୁତ ଘରୋଇ ପୁଞ୍ଜି ପ୍ରବାହ ମନ୍ଥର ଚାହିଦା, ନିମ୍ନମୁଖୀ ମୁଦ୍ରା ଭଣ୍ଡାର ଏବଂ ବର୍ଦ୍ଧିତ ବିଶ୍ୱ ଅନିଶ୍ଚିତତା ବିରୋଧରେ ବଫର୍ ହୋଇ ରହିବ ।
